NI Marcos ti nangisurat iti maysa kadagiti uppat a libro ti Biblia maipapan iti biag ni Jesus. Dayta ti kaababaan ken kalakaan a basaen. Asino ni Marcos? Panagkunam, am-ammona ngata ni Jesus?— * Kitaentayo no ania dagiti narigat a suot a nakaipasanguan ni Marcos ken ammuentayo no apay a nagtultuloy kas maysa a Kristiano.

Damo a nadakamat iti Biblia ti nagan ni Marcos kalpasan a ni Ari Herodes Agripa impaibaludna ni apostol Pedro. Maysa nga anghel ti nangwayawaya ken Pedro bayat ti rabii ket dagus a napan iti balay ti ina ni Marcos a ni Maria, nga agnanaed idiay Jerusalem. Nawayawayaan ni Pedro agarup sangapulo a tawen kalpasan a natay ni Jesus idi Paskua ti 33 K.P.—Aramid 12:1-5, 11-17.

Ammom kadi no apay a napan ni Pedro iti pagtaengan da Maria?—Nalabit gapu ta am-ammona ti sumagmamano a miembro ti pamiliada ken ammona nga aggigimong dagiti adalan ni Jesus iti pagtaengan da Maria. Nabayagen nga adalan ti kasinsin ni Marcos a ni Bernabe, sipud pay idi Piesta ti Pentecostes 33 K.P. Iti daydi a tiempo, dinakamat ti Biblia ti kinamanagpadagusna kadagiti kabbaro nga adalan. No kasta, mabalin nga am-ammo ni Jesus da Bernabe ken ti ikitna a ni Maria ken ti kasinsinna a ni Marcos.—Aramid 4:36, 37; Colosas 4:10.

Iti Ebangheliona, kinuna ni Marcos nga idi karabiyan ti pannakaaresto ni Jesus, adda agtutubo a nakakawes laeng iti makinruar a pagan-anay iti “lamolamo a bagina.” Idi a ni Jesus ket kinemmeg dagiti kabusor, kinuna ni Marcos a nakalibas dayta nga agtutubo. Asino ngata dayta nga agtutubo?—Wen, nalabit a ni Marcos a mismo! Isu nga idi pimmanaw ni Jesus ken dagiti apostolna iti daydi a rabii, agparang a nagkawes ni Marcos iti makinruar a pagan-anay sa simmurot.—Marcos 14:51, 52.

Wen, ni Marcos ket naregta nga adipen ti Dios. Nalabit a presente idi naiparukpok ti nasantuan nga espiritu idi Pentecostes 33 K.P. Nasinged pay kadagiti matalek nga adipen ti Dios, kas ken Pedro. Kinaduaanna met ti kasinsinna a ni Bernabe, ti nangyam-ammo ken Saulo kenni Pedro. Napasamak daytoy agarup tallo a tawen kalpasan a nagparang ni Jesus kenni Saulo babaen ti maysa a sirmata. Kalpasan ti adu a tawen, napan ni Bernabe idiay Tarso tapno birokenna ni Saulo.—Aramid 9:1-15, 27; 11:22-26; 12:25; Galacia 1:18, 19.

 Idi 47 K.P., napili da Bernabe ken Saulo nga agmisionero. Inkuyogda ni Marcos, ngem iti di nailawlawag a rason, pinanawanna ida ket nagawid idiay Jerusalem. Nakapungtot ni Pablo, ti Romano a nagan ni Saulo. Dina pinalabas ti imbilangna a dakkel a nagkurangan ni Marcos.—Aramid 13:1-3, 9, 13.

Idi nagawid da Pablo ken Bernabe manipud iti panagmisioneroda, impadamagda dagiti nasayaat a nagapuananda. (Aramid 14:24-28) Kalpasan ti sumagmamano a bulan, implanoda a sarungkaran dagiti baro nga adalan a nakasabaanda idi. Kayat ni Bernabe nga ikuyogda ni Marcos ngem ammom kadi no ania ti kuna ni Pablo?—Kinunana a ‘di umiso dayta’ ta pinanawan ida idin ni Marcos. Sigurado a naladingitan ni Marcos iti simmaruno a napasamak!

Rimsua ti maysa a riri ken kalpasan a ‘bimtak ti nakaro a panagpungtot,’ nagsina da Pablo ken Bernabe. Ni Bernabe inkuyogna ni Marcos tapno kaduana a mangasaba idiay Chipre, bayat a ni Pablo inkuyogna ni Silas tapno sumarungkar kadagiti kabbaro nga adalan, kas dati a planoda. Sigurado a naladingitan ni Marcos ta isu ti nakaigapuan ti panagriri da Pablo ken Bernabe!—Aramid 15:36-41.

Ditay ammo no apay a nagawid idi ni Marcos. Nalabit nga adda naimbag a rasonna. Aniaman dayta, agparang a nagtalek ni Bernabe a saanen a maulit dayta. Ket saan a nagkamali. Nagtalinaed a nakikadua kenkuana ni Marcos! Idi agangay, nakikadua ken Pedro a nagmisionero iti nakaad-adayo a Babilonia.  Manipud sadiay, impaw-it ni Pedro ti kablaawna, sana innayon, “ken kasta met ni Marcos nga anakko.”—1 Pedro 5:13.

Nagsinged ti relasion da Pedro ken Marcos gapu ta agpadada nga agserserbi iti Dios! Agminar met dayta no basaentayo ti Ebanghelio ni Marcos. Dagiti kapaliiwan ni Pedro ti inlanad ni Marcos. Kas pagarigan, pagdidiligenyo dagiti salaysay maipapan iti bagyo a napasamak iti Baybay ti Galilea. Innayon ni Marcos dagiti detalye no sadino a paset ti bangka ti nagturogan ni Jesus ken no ania ti nagpungananna, bambanag a mapaliiw ti maysa a mangngalap a kas ken Pedro. Apay a ditay basaen a mismo ket pagdidiligen dagiti salaysay ti Biblia iti Mateo 8:24; Marcos 4:37, 38; ken Lucas 8:23?

Idi agangay, idi naibalud ni Pablo idiay Roma, kinomendaranna ni Marcos gapu iti kinasungdona. (Colosas 4:10, 11) Ken uray idi naibalud manen sadiay ni Pablo, nagsurat ken Timoteo ket kiniddawna nga ikuyogna ni Marcos, a kunkunana: “Adu ti usarna kaniak maipaay iti panagserbi.” (2 Timoteo 4:11) Wen, anian nga agkakaimbag a pribilehio ti tinagiragsak ni Marcos gapu ta nagtultuloy a nagserbi!