PAGSARITAANTAYO no ania ti kayat a sawen ti panagimon. Adda kadi tao a dimo magustuan gapu ta ibagbaga dagiti dadduma nga isu ket nasingpet, guapo, wenno intelihente? *— Bueno, kasta ti mapasamak no pagimonam ti maysa.

Rumsua ti imon iti uneg ti pamilia no dagiti nagannak adda paboranda nga anakda. Dakamaten ti Biblia ti maysa a pamilia a naaddaan iti dakkel a parikut gapu iti imon. Usigentayo ti problema a pinataudna ken ti maadaltayo iti dayta a pasamak.

Ni Jose ti maika-11 nga anak ni Jacob, ken nagimonan dagiti kakabsatna iti ama. Ammom kadi no apay?— Gapu ta isu ti paborito ni amada a Jacob. Kas pagarigan, nagpaaramid ni Jacob iti napintas a garitgaritan a kagay para ken Jose. Kasta unay ti panagayat ni Jacob kenni Jose “agsipud ta isu idi ti anak iti kinalakayna” ken ti inauna nga anakda iti dungdunguenna nga asawa a ni Raquel.

Kuna ti Biblia nga ‘idi nakita ti kakabsatna nga isu inayat ni amada nga ad-adda, ginurada ni Jose.’ Maysa nga aldaw, imbaga ni Jose iti pamiliada a natagtagainepna a nagrukbabda kenkuana, agraman ti mismo nga amada. “Nagimon kenkuana ti kakabsatna,” kuna ti Biblia, ket nakapungtot uray ti amada gapu iti panangisalaysayna iti kasta a tagtagainep.—Genesis 37:1-11.

Idi agangay, idi agtawen ni Jose iti 17, adda dagiti kakabsatna iti adayo a lugar a mangipaspastor kadagiti karnero ken kalding a taraken ti pamiliada. Gapuna, ni Jacob imbaonna ni Jose tapno mapanna kitaen ti kasasaadda. Ammom kadi no ania ti kayat nga aramiden kenkuana ti kaaduan kadagiti kakabsatna idi makitada  a sumungsungad?— Kayatda a papatayen! Ngem nagkedked ti dua a kabsatna, da Ruben ken Juda.

Idi adda dagiti lumabas a negosiante nga agturong idiay Egipto, kinuna ni Juda: “Ilakotayo.” Kasta ngarud ti inaramidda. Kalpasanna, nangpartida iti kalding sada insawsaw ti kagay ni Jose iti dara dayta a kalding. Idi impakitada ti kagay iti amada, inyikkisna: ‘Maysa la ketdi a nadamsak nga atap nga animal ti nangalun-on ken Jose!’—Genesis 37:12-36.

Idi agangay, naay-ayo ken Jose ti agturay iti Egipto a ni Faraon. Nailawlawagna ngamin ti kaipapanan ti dua kadagiti natagtagainep ni Faraon babaen ti tulong ti Dios. Ti umuna a tagtagainep ket maipapan iti pito a nasalun-at a baka ken pito a masakit a baka. Ti maikadua a tagtagainep ket maipapan iti pito a namnamsek a dawa ken pito a naippes a dawa. Kinuna ni Jose a dagita a tagtagainep agpada nga ipakpakaunada ti pito a tawen ti nabunga nga apit a sarunuen ti pito a tawen a bisin. Gapuna, imbilin ni Faraon a maisaad ni Jose kas mangimaton iti pannakaurnong dagiti taraon bayat dagiti tawen ti nawadwad nga apit tapno masaganaan ti dumteng a bisin.

Idi dimteng ti bisin, nagkasapulan iti taraon ti pamilia da Jose, nga agnanaed iti adayo a lugar. Gapuna, imbaon ni Jacob ti sangapulo a manong ni Jose tapno mapanda mangala iti taraon idiay Egipto. Nakasaritada ni Jose, ngem dida nabigbig. Saan nga imbaga ni Jose ti pudno a kinasiasinona, ket sinubokna dagiti kakabsatna. Nakitana ti panagbabawida iti di umiso a panangtratoda idi kenkuana. Kalpasanna, inyam-ammo met laeng ni Jose ti kinasiasinona. Nagiinnarakupda ken anian a ragsakda a nagkikita!—Genesis, kapitulo 40 agingga iti 45.

Ania ti naadalmo maipapan iti panagimon sigun iti daytoy a salaysay ti Biblia?— Ti imon ket mangyeg iti dakkel a parikut, a mabalin pay ketdi a mangituggod iti maysa tapno dangranna ti mismo a kabsatna! Basaentayo ti Aramid 5:17, 18 ken Aramid 7:54-59 ket kitaentayo no ania ti inaramid dagiti tattao kadagiti adalan ni Jesus gapu iti imon.— Kalpasan a mabasam daytoy, maawatam kadin no apay a nasken a liklikantayo ti agimon?—

Nagbiag ni Jose iti 110 a tawen. Naaddaan kadagiti annak, appo, ken appo iti tumeng. Masiguradotayo a masansan nga insuro kadakuada ni Jose nga ayatenda ti maysa ken maysa ket liklikanda ti agiinnimon.—Genesis 50:22, 23, 26.