Ania ti Nasantuan nga Espiritu?

INSALUDSOD idi ni Jesus kadagiti adalanna: “Siasino kadakayo ti ama a, no ti anakna dumawat iti ikan, nalabit iyawatnanto kenkuana ti maysa a serpiente imbes nga ikan? Wenno no dumawat met iti itlog, iyawatnanto kenkuana ti maysa a manggagama?” (Lucas 11:11, 12) Dagiti ubbing idiay Galilea magustuanda ti mangan iti itlog ken ikan isu a dagita ti kiniddawda kadagiti ammada.

Kuna ni Jesus a masapul nga itultuloytayo ti agkiddaw iti nasantuan nga espiritu, a kas iti mabisin nga ubing a dumawdawat iti taraonna. (Lucas 11:9, 13) No maawatantayo no ania a talaga ti nasantuan nga espiritu, matarusantayo ti napateg nga akemna iti biagtayo. Gapuna, usigentayo nga umuna no ania ti isursuro ti Biblia maipapan iti nasantuan nga espiritu.

“Ti Pannakabalin ti Kangatuan”

Nalawag nga ibaga ti Biblia a ti nasantuan nga espiritu ket maysa a puersa nga us-usaren ti Dios a mangitungpal iti pagayatanna. Idi a ni anghel Gabriel impakaammona ken Maria a maaddaanto iti anak a lalaki uray isu ket maysa a birhen, kinuna ti anghel: “Ti nasantuan nga espiritu umayto kenka, ket ti pannakabalin ti Kangatuan salinongannakanto. Iti dayta met a rason ti mayanak maawaganto iti nasantuan, Anak ti Dios.” (Lucas 1:35) Sigun kadagita a sasao ni Gabriel, agkanaig ti nasantuan nga espiritu ken ti “pannakabalin ti Kangatuan.”

Adda met la ti kasta nga ideya iti dadduma a paset ti Biblia. Kinuna ni propeta Mikias: “Siak napnoak iti bileg, babaen ti espiritu ni Jehova.” (Mikias 3:8) Inkari ni Jesus kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu.” (Aramid 1:8) Ken dinakamat ni apostol Pablo ti “pannakabalin ti nasantuan nga espiritu.”​—Roma 15:13, 19.

Gapuna, ania ti konklusiontayo? Agkanaig ti nasantuan nga espiritu ken ti pannakabalin ti Dios. Ti nasantuan nga espiritu ket ti pannakabalin (wenno puersa) ni Jehova nga us-usarenna  a mangitungpal iti panggepna. Anian a nakaskasdaaw a puersa dayta! Ditay matukod ti pannakabalin a nausar iti pannakaparsua ti intero nga uniberso. Babaen ken propeta Isaias, insingasing ni Jehova nga utobentayo ti sumaganad: “Itangadyo dagiti matayo sadi ngato ket kitaenyo. Siasino ti namarsua kadagitoy a banag? Isu Daydiay mangiruruar iti buyotda sigun a mismo iti bilang, isuda amin awaganna sigun a mismo iti nagan. Gapu iti kinaruay iti dinamiko nga enerhia, kasta met a yantangay isu nakired iti pannakabalin, awan uray maysa kadakuada ti mapukpukaw.”​—Isaias 40:26.

Gapuna, ipakita ti Biblia a timmaud ti organisado ken nakaur-urnos nga uniberso babaen ti “dinamiko nga enerhia,” wenno pannakabalin ti Mannakabalin-amin a Dios. Nalawag a nakabilbileg ti aktibo a puersa ti Dios, ken agpannuray iti dayta ti biagtayo.​—Kitaenyo ti kahon a“Ti Akem ti Nasantuan nga Espiritu.”

 Adu ti mabalin a pangusaran ni Jehova iti nasantuan nga espirituna, kas iti panangparsuana iti uniberso. Ngem mabalinna met nga usaren dayta maipaay kadagiti tattao. Adu ti salaysay iti Biblia a mangipakita no kasano a pinabileg ti Dios dagiti adipenna ditoy daga babaen ti aktibo a puersana.

“Ti Espiritu ni Jehova Adda Kaniak”

Ti ministerio ni Jesus ket makapainteres a pamalatpatan no kasano a pinabileg ti Dios dagiti adipenna babaen ti nasantuan nga espirituna. “Ti espiritu ni Jehova adda kaniak,” kinuna ni Jesus kadagiti taga-Nazaret. (Lucas 4:18) Ania ti nagapuanan ni Jesus babaen ti “pannakabalin ti espiritu”? (Lucas 4:14) Pinaimbagna ti amin a kita ti sakit, pinaglinakna ti nadawel a baybay, pinakanna ti rinibu a tattao babaen ti sumagmamano a tinapay ken ikan, ken pinagungarna pay dagiti natay. Ni apostol Pedro dineskribirna ni Jesus kas “maysa a lalaki nga imparang a silalatak . . . ti Dios babaen kadagiti mannakabalin nga aramid ken kadagiti tanda ken kadagiti pagilasinan nga inaramid ti Dios babaen kenkuana.”​—Aramid 2:22.

Awanen ita dagiti kasta a milagro a gapuanan ti nasantuan nga espiritu. Ngem adda dagiti nakaskasdaaw a maaramidanna para kadatayo. Sidadaan ni Jehova a mangipaay iti nasantuan nga espirituna kadagiti agdaydayaw kenkuana, kas impasigurado ni Jesus kadagiti adalanna. (Lucas 11:13) Gapuna, naikuna ni apostol Pablo: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” (Filipos 4:13) Mabalin met kadi nga agtignay iti biagmo ti nasantuan nga espiritu iti kasta a pamay-an? Ti sumaganad nga artikulo usigenna dayta a saludsod.

[Kahon/Ladawan iti panid 5]

No Apay a Saan a Persona ti Nasantuan nga Espiritu

Ti Biblia inyarigna ti nasantuan nga espiritu iti danum. Idi nagkari ti Dios iti ilina a bendisionannanto ida, kinunana: “Mangibukbokakto iti danum iti daydiay mawaw, ken tumartaredted a barbaresbes iti rabaw ti namaga a disso. Iparukpokkonto ti espirituk iti bin-im, ken ti bendisionko kadagiti kaputotam.”​—Isaias 44:3.

Idi imparukpok ti Dios ti espirituna kadagiti adipenna, ‘napnoda iti nasantuan nga espiritu.’ Ni Jesus, Juan a Mammautisar, Pedro, Pablo, Bernabe, ken dagiti adalan a naguummong idi Pentecostes 33 K.P. ket nailadawan a napnoda amin iti nasantuan nga espiritu.​—Lucas 1:15; 4:1; Aramid 4:8; 9:17; 11:22, 24; 13:9.

Usigem daytoy: Mabalin kadi a ti maysa a persona ket ‘maiparukpok’ iti nagduduma a tattao? Maikunam kadi a ti maysa a persona ‘mapunnona’ ti intero a grupo dagiti tattao? Saan a lohikal dayta. Ti Biblia tukoyenna dagiti tattao a napno iti sirib, pannakaawat, wenno uray pay iti umiso a pannakaammo. Ngem di pulos nangdakamat iti maysa a tao a napno iti sabali a persona.​—Exodo 28:3; 1 Ar-ari 7:14; Lucas 2:40; Colosas 1:9.

Ti Griego a sao a naipatarus nga “espiritu” ket pneuʹma, a mangipasimudaag iti di makita a pannakabalin. Sigun iti Expository Dictionary of New Testament Words ni Vine, ti sao a pneuʹma “kangrunaan a tukoyenna ti angin . . . ken anges; nangruna ti espiritu a di makita, saan a pisikal, ken nabileg a kas iti angin.”

Nalawag ngarud a ti nasantuan nga espiritu ket saan a persona. a

[Footnote]

[Credit Line]

Photodisc/SuperStock