“Kadagiti amin a nagkauna a Griego a pilosopo, ni Plato ti kabilgan a nakaimpluensia iti panangmatmat ti kaaduan maipapan iti impierno.”—Histoire des enfers (Ti Pakasaritaan ti Impierno), ni Georges Minois, panid 50.

“Sipud idi ngalay ti maikadua a siglo AD, dagiti Kristiano a nasursuruan iti pilosopia a Griego nariknada a nasken nga iyebkasda ti pammatida sigun iti panangmatmat dagiti Griego a pilosopo . . . Ti pilosopia a kasayaatan kadakuada isu ti Platonismo [dagiti pannursuro ni Plato].”—The New Encyclopædia Britannica (1988), Tomo 25, panid 890.

“Patalgedan ti pannursuro ti Simbaan nga adda impierno ken agnanayon dayta. Dagiti matay a nakabasol iti nadagsen dagus a mapan ti kararuada idiay impierno wenno ‘agnanayon nga apuy’ tapno madusada. Agnanayon a pannakaisina iti Dios ti kangrunaan a pannusa idiay impierno.”—Catechism of the Catholic Church, 1994 nga edision, panid 270.

“Ta dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman . . . ta awan ti aramid wenno uray gakat wenno uray pannakaammo wenno uray sirib idiay Sheol, ti disso a papanam.”—Eclesiastes 9:5, 10.

Ti Hebreo a sao a Sheol, a tukoyenna ti “taeng dagiti natay,” ket naipatarus nga “impierno” iti dadduma a bersion ti Biblia. Ania ti ipalgak daytoy a teksto maipapan iti kasasaad dagiti natay? Matutuokda kadi idiay Sheol tapno maikaroda dagiti basbasolda? Saan, agsipud ta “saanda a pulos sipapanunot iti aniaman.” Dayta ti makagapu nga idi agtutuok ni patriarka a Job gapu iti nakaro a sakit, impakaasina iti Dios: “O italimengnak koma iti Sheol.” (Job 14:13) No ti Sheol ket disso ti agnanayon a pannakatutuok, apay koma a kiddawen ni Job ti mapan sadiay? Sigun iti Biblia, ti impierno ket tumukoy laeng iti gagangay a tanem ti sangatauan, a sadiay awanen ti aniaman nga aramid.

Saan kadi nga ad-adda a nainkalintegan ken maitunos iti Kasuratan ti kasta a kaipapanan ti impierno? Ania koma a kadaksan nga aramid ti manggutugot iti managayat a Dios tapno agnanayon a tutuokenna ti maysa a nakabasol? (1 Juan 4:8) Ngem no ti impierno ket di umiso a sursuro, kasta met kadi ti biag idiay langit?

Idiligyo dagitoy a bersikulo ti Biblia: Salmo 146:3, 4; Aramid 2:25-27; Roma 6:7, 23