Kararag

4 Maipapan iti Ania?

TI MODELO a kararag nga insuro ni Jesus—a maaw-awagan no dadduma iti Kararag ti Apo wenno Amami—ket ibilbilang ti kaaduan kas ti pagaammo kano a kararag a kanayon nga ulit-uliten dagiti agkunkuna a Kristiano. Kaskasdi, maysa dayta kadagiti kararag a kaaduanna a saan a maawatan dagiti tattao. Minilion a tattao ti basta mangulit-ulit iti dayta iti inaldaw. Ngem saan a kasta ti insuro ni Jesus. Kasano nga ammotayo?

Sakbay la unay nga inyebkas ni Jesus dayta a kararag, kinuna: “No agkarkararagkayo, dikay ulit-uliten a sawen ti isu met laeng a bambanag.” (Mateo 6:7) Konkontraen kadi ni Jesus dayta nga imbagana babaen ti panangtedna iti sasao nga ikabesa ken ulit-uliten? Sigurado a saan! Imbes ketdi, isursuro kadatayo ni Jesus no ania ti ikararagtayo, ken impakitana no ania dagiti rumbeng nga ipangpangrunatayo no agkararagtayo. Usigentayo no ania ti imbagana. Mabasa dayta a kararag iti Mateo 6:9-13.

“Amami nga adda iti langlangit, masantipikar koma ti naganmo.”

Impalagip ngarud ni Jesus kadagiti pasurotna nga amin a kararag ket rumbeng a maiturong iti Amana a ni Jehova. Ngem ammom kadi no apay a nakapatpateg ti nagan ti Dios ken no apay a nasken a masantipikar, wenno mapagbalin a nasantuan?

Sipud rugi ti pakasaritaan ti tao, addan nangpardaya iti sagrado a nagan ti Dios. Ni Satanas a kabusor ti Dios inawaganna ni Jehova a managulbod ken agimbubukodan nga Agturay nga awanan iti kalintegan a mangituray kadagiti parsuana. (Genesis 3:1-6) Adu ti kimmanunong ken Satanas, nga isursuroda a ti Dios ket naulpit, managibales, ken saan a maseknan wenno ilibakda pay ketdi nga adda Namarsua. Karurod pay ti dadduma ti mismo a naganna, nga inikkatda ti nagan a Jehova kadagiti impatarusda a Biblia ken imparitda ti pannakausar dayta.

Ipakita ti Biblia nga ilintegto ti Dios dagita a kinaawan hustisia. (Ezequiel 39:7) Babaen ti panangaramidna iti dayta, maipaaynanto ti amin a kasapulam ken risutenna pay dagiti parikutmo. Kasano? Masungbatan dayta iti sumaganad a sasao iti kararag ni Jesus.

“Umay koma ti pagariam.”

Adu ita ti makariro a kapanunotan dagiti mangisursuro iti relihion no maipapan iti Pagarian ti Dios. Ngem kas pagaammo dagiti agdengdengngeg ken Jesus, nabayagen nga impadto dagiti propeta ti Dios a ti Mesias, ti Manangisalakan a pinili ti Dios, isunto ti  mangituray iti maysa a Pagarian a mangbalbaliw iti lubong. (Isaias 9:6, 7; Daniel 2:44) Dayta a Pagarian ti mangsantipikar iti nagan ti Dios babaen ti panangibutaktakna iti kinaulbod ni Satanas ken panangparmekna kenkuana ken iti amin nga aramidna. Pagpatinggaen ti Pagarian ti Dios ti gubat, sakit, bisin, ken uray ti ipapatay. (Salmo 46:9; 72:12-16; Isaias 25:8; 33:24) No ikararagmo ti iyaay ti Pagarian ti Dios, ikarkararagmo a matungpal amin dagita a kari.

“Maaramid koma ti pagayatam, kas sadi langit, kasta met iti daga.”

Ipasimudaag ti sasao ni Jesus a sigurado a maaramid ti pagayatan ti Dios ditoy daga kas idiay langit a taeng ti Dios. Awan ti nakalapped iti pannakatungpal ti pagayatan ti Dios idiay langit; sadiay, ti Anak ti Dios ginubatna ni Satanas ken dagiti demoniona, ket intapuakna ida ditoy daga. (Apocalipsis 12:9-12) Kas iti umuna a dua a kiddaw iti modelo a kararag, tulongannatayo daytoy maikatlo a kiddaw a mangipangpangruna iti kapatgan a banag—ti pagayatan ti Dios, saan a ti pagayatantayo. Ti pagayatan ti Dios ti kanayon a makaipaay iti kasayaatan para iti amin a parsua. Isu nga uray ti perpekto a tao a ni Jesus, kinunana ken Amana: “Saan koma a ti pagayatak, no di ket ti pagayatam ti maaramid.”—Lucas 22:42.

“Itedmo kadakami ita nga aldaw ti tinapaymi.”

Simmaruno nga impakita ni Jesus a saan met a dakes nga ikararag dagiti personal a pakaseknan, a kas kadagiti praktikal a kasapulantayo iti inaldaw. Kinapudnona, no aramidentayo dayta, maipalagip kadatayo a ni Jehova daydiay “mangted iti biag ken anges ken amin a bambanag iti amin a tattao.” (Aramid 17:25) Ipalgak ti Biblia a ni Jehova ket naayat nga Ama a maragsakan a mangipaay iti kasapulan dagiti annakna. Ngem kas iti naimbag a nagannak, dina patgan dagiti kalikagum a saan a makagunggona kadakuada.

“Pakawanennakami kadagiti utangmi.”

Talaga kadi a nakautangka iti Dios? Kasapulam kadi ti pammakawanna? Adu ita ti saanen a makatarus no ania ti makuna a basol ken no kasano kaserioso dayta. Ngem isursuro ti Biblia a ti basol ti makagapu kadagiti kakaruan a parikut, ta dayta ti kangrunaan a makagapu no apay a matay ti tao. Masansan nga agbasoltayo amin, yantangay nayanaktayo a managbasol. Agpannuray ngarud iti pammakawan ti Dios ti namnamatayo a maaddaan iti agnanayon a biag. (Roma 3:23; 5:12; 6:23) Makapabang-ar a maammuan a kunaen ti Biblia: “Sika, O Jehova, naimbagka ken sisasagana a mamakawan.”—Salmo 86:5.

“Ispalennakami iti daydiay nadangkes.”

Mabigbigmo kadi no apay a kasapulam unay ti pannalaknib ti Dios? Adu ti saan a makabigbig iti kaadda “daydiay nadangkes,” a ni Satanas. Ngem insuro ni Jesus a talaga nga adda ni Satanas, ta inawaganna pay kas “ti agturay daytoy a lubong.” (Juan 12:31; 16:11) Pinagbalin ni Satanas a nakadakdakes daytoy lubong nga iturturayanna, ket tarigagayanna la ketdi nga agbalinka a dakes tapno saanka a maaddaan iti nasinged a relasion iti Amam a ni Jehova. (1 Pedro 5:8) Nupay kasta, nabilbileg nga amang ni Jehova ngem ni Satanas. Pagragsakan pay ni Jehova a salakniban dagidiay mangay-ayat Kenkuana.

Daytoy nga ababa a sumario dagiti kangrunaan a punto iti modelo a kararag nga insuro ni Jesus saanna a saklawen ti amin a mabalintayo nga ikararag. Laglagipem ti kuna ti 1 Juan 5:14 maipapan iti Dios: “Uray ania ti dawatentayo maitunos iti pagayatanna, denggennatayo.” Isu a dimo koma ipagarup a dagiti parikutmo ket saan a maikari nga imdengan ti Dios.—1 Pedro 5:7.

Kabayatanna, napateg kadi no kaano ken sadino nga agkararagtayo?