Umadanika iti Dios

“Pinaluknengna ti Rupa ni Jehova”

“SAANAK siguron a maikari,” kuna ti maysa a lalaki a simiasi kadagiti pagalagadan ti Dios a naammuanna idi ubing pay. Idi kayatnan ti agbalbaliw, nagdanag di la ket ta saanen a pakawanen ti Dios. Ngem daytoy nga agbabbabawi a nakabasol naaddaan iti namnama iti salaysay ti Biblia maipapan ken Manases, a nailanad iti 2 Cronicas 33:1-17. No ipagarupmo a saankan a maikari gapu kadagiti naaramidam a basol, mabalin met a maliwliwaka iti inaramid ni Manases.

Napadakkel ni Manases iti sangakabbalayan nga agdaydayaw iti Dios. Ti amana a ni Ezekias ti maysa kadagiti kasayaatan nga ari ti Juda. Nayanak ni Manases agarup tallo a tawen kalpasan a namilagruan a pinaatiddog ti Dios ti biag ni amana. (2 Ar-ari 20:1-11) Imbilang la ketdi ni Ezekias a daytoy nga anakna ket sagut maigapu iti asi ti Dios, iti kasta inkagumaanna nga inyukuok kenkuana ti panagayat iti pudno a panagdaydayaw. Ngem no dadduma, adda dagiti annak a saan a sumurot iti addang dagiti nagannakda nga agdaydayaw iti Dios. Kasta ti napasamak iti kaso ni Manases.

Agtawen laeng ni Manases iti 12 idi matay ni amana. Makapaladingit ta “inaramidna no ania ti dakes kadagiti mata ni Jehova.” (Bersikulo 1, 2) Naimpluensiaan kadi ti agtutubo nga ari gapu kadagiti manangbalakad nga awan panangipategda iti pudno a panagdaydayaw? Awan ti kasta a kunaen ti Biblia, ngem nadakamat a naigamer ni Manases iti panagdayaw iti idolo ken nagbalin a naulpit. Nangibangon kadagiti altar ti palso a didios, indatonna dagiti annakna, inannurotna ti espiritismo, ken nangikabil iti kinitikitan nga imahen iti templo ni Jehova idiay Jerusalem. Gapu iti kinasubeg ni Manases, saanna nga impangag dagiti pakdaar ni Jehova, ti Dios a nangaramid iti milagro a nakaigapuan ti pannakayanakna.​—Bersikulo 3-10.

Idi agangay, impalubos ni Jehova a sikakawar a maipan ni Manases idiay Babilonia. Bayat ti pannakaidestierona, adda gundawayna a mangutob iti kasasaadna. Nabigbigna kadi a saan a nabaelan a salakniban dagiti awanan gaway ken awanan biag nga idolona? Pinampanunotna kadi dagiti insuro kenkuana ni amana idi ubing pay? Aniaman ti kasasaad, nagbaliw ti kababalin ni Manases. Kunaen ti rekord: “Pinaluknengna ti rupa ni Jehova a Diosna ket impakpakumbabana ti bagina iti kasta unay . . . Ket nagkarkararag Kenkuana.” (Bersikulo 12, 13) Ngem talaga kadi a pakawanen ti Dios ti tao a nakaaramid kadagiti kasta ti kadagsenna a basol?

Natukay ti rikna ni Jehova gapu iti naimpusuan a panagbabawi ni Manases. Impangag ti Dios ti panagpakaasina “ket isu insublina idiay Jerusalem iti kinaarina.” (Bersikulo 13) Kas pammaneknek iti panagbabawina, inlinteg ni Manases dagiti naaramidanna a dakes, ket tinalipuposna ti idolatria manipud iti pagarianna ken pinaregtana dagiti iturayanna nga ‘agserbida ken Jehova.’​—Bersikulo 15-17.

No ipagarupmo a saankan a maikari iti pammakawan ti Dios gapu kadagiti napalabas a basolmo, laglagipem ti inaramid ni Manases. Daytoy a salaysay ket paset ti naipaltiing a Sao ti Dios. (Roma 15:4) Nalawag ngarud a kayat ni Jehova a maammuantayo nga isu “sisasagana a mamakawan.” (Salmo 86:5) Napateg kenkuana ti kasasaad ti puso, saan a ti basol. No ti managbasol nga agbabbabawi ti pusona ket agkararag ken pagreggetanna nga aramiden ti naimbag, mabalin a ‘mapaluknengna ti rupa ni Jehova,’ kas iti inaramid ni Manases.​—Isaias 1:18; 55:6, 7.

Singasing a Basaen iti Biblia iti Enero:

◼ 2 Cronicas 29-36–Esdras 1-10