Agsursuroka iti Sao ti Dios

Apay nga Ipalpalubos ti Dios ti Kinadakes ken Panagsagaba?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Kasano a nangrugi ti kinadakes?

Nangrugi ti kinadakes ditoy daga idi imbaga ni Satanas ti kaunaan a kinaulbod. Saan a dakes ni Satanas idi naparsua no di ket perpekto nga anghel, ngem “saan a nagtakder a di maisin iti kinapudno.” (Juan 8:44) Tinarigagayanna a mapan kenkuana ti panagdayaw nga agpaay laeng iti Dios. Nagulbod ni Satanas iti umuna a babai a ni Eva, ket inallukoyna nga agtulnog kenkuana imbes nga iti Dios. Kimmanunong ni Adan iti panagsukir ni Eva iti Dios. Ti desision ni Adan ket nagbanag iti panagsagaba ken ipapatay.​—Basaem ti Genesis 3:1-6, 17-19.

Insayangkat ni Satanas ti iyaalsa iti panagturay ti Dios idi a sinugsoganna ni Eva nga agsukir iti Dios. Kaaduan a tattao ti kimmanunong iti pananglaksid ni Satanas iti panangituray ti Dios. Gapuna, nagbalin ni Satanas nga “agturay iti lubong.”​—Basaem ti Juan 14:30; Apocalipsis 12:9.

2. Adda kadi depekto dagiti pinarsua ti Dios?

Dagiti tattao ken anghel a pinarsua ti Dios naan-anay a kabaelanda a tungpalen dagiti kalikaguman ti Dios. (Deuteronomio 32:4, 5) Naparsuatayo a nawaya a mangaramid iti naimbag wenno dakes. Gapuna, adda gundawaytayo a mangiparangarang iti ayattayo iti Dios.​—Basaem ti Santiago 1:13-15; 1 Juan 5:3.

3. Apay nga ipalpalubos ti Dios ti panagsagaba?

Ipalpalubos pay laeng ti Dios ti iyaalsa maibusor iti panangiturayna. Apay? Tapno maipakita nga awan ti maganab dagiti tattao no dida agpaituray Kenkuana. (Jeremias 10:23) Kalpasan ti 6,000 a tawen ti pakasaritaan ti tao, narisuten ti isyu. Saan a nabaelan dagiti agtuturay nga ikkaten ti gubat, krimen, kinaawan hustisia, ken sakit.​—Basaem ti Eclesiastes 7:29; 8:9; Roma 9:17.

Iti sabali a bangir, magunggonaan dagidiay agpaituray iti Dios. (Isaias 48:17, 18) Asidegen a pagpatinggaen ni Jehova ti amin a gobierno ti tao. Dagiti laeng agpaituray iti Dios ti agnaedto iti daga.​—Isaias 2:3, 4; 11:9; basaem ti Daniel 2:44.

  4. Ania a gundaway ti naipaay gapu iti kinaanus ti Dios?

Kinuna ni Satanas a saan a sisusungdo nga agtulnog ken Jehova dagiti tattao. Gapu iti kinaanus ti Dios, addaantayo amin ti gundaway a mangipakita no agpaituraytayo iti Dios wenno iti tao. Makita iti wagas ti panagbiagtayo no siasino ti pilientayo nga agturay.​—Basaem ti Job 1:8-11; Proverbio 27:11.

5. Kasano a maipakitatayo a pilpilientayo ti Dios kas Agturay?

Ipakpakitatayo a pilpilientayo ti Dios kas Agturay no sapulen ken annurotentayo ti pudno a panagdayaw a naibatay iti Saona, ti Biblia. (Juan 4:23) Saantayo met a makinamin iti politika ken gubat, kas ken Jesus.​—Basaem ti Juan 17:14.

Ar-aramaten ni Satanas ti pannakabalinna tapno maitandudo ti imoral ken dakes nga ar-aramid. No liklikantayo dagita nga aramid, mabalin a laisen wenno busorendatayo dagiti gagayyem ken kabagiantayo. (1 Pedro 4:3, 4) Ania ngarud ti pilientayo? Makikaduatayo kadi kadagiti tattao a mangay-ayat iti Dios? Agtulnogtayo kadi kadagiti naimbag ken naayat a lintegna? No kasta ti aramidentayo, mapaneknekantayo nga ulbod ni Satanas iti panangibagana nga awan asinoman nga agtulnog iti Dios.​—Basaem ti 1 Corinto 6:9, 10; 15:33.

Para iti kanayonan nga impormasion, kitaem ti kapitulo 11 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.

[Ladawan iti panid 16]

Pinili ni Adan ti dakes

[Ladawan iti panid 17]

Ipakita dagiti pilitayo no kayattayo ti agpaituray iti Dios