Ti Biblia Balbaliwanna ti Biag

ANIA ti nangtignay iti maysa a balasang tapno sublianna ti nabangonanna a relihion? Basaem ti salaysayna.

“Adda Itan Pudno a Panggep ti Biagko.”​—LISA ANDRÉ

PANNAKAYANAKNA: 1986

NAKAYANAKANNA: LUXEMBOURG

PAKASARITAANNA: NAIWAWA NGA ANAK

TI NAPALABASKO: Dimmakkelak iti bassit nga ili ti Bertrange iti asideg ti siudad ti Luxembourg. Nadalus, natalna, ken narang-ay ti ilimi. Siak ti buridek kadakami a lima nga agkakabsat. Saksi ni Jehova dagiti dadakkelko, ket inkagumaanda nga iyukuok iti pusomi dagiti Nakristianuan a prinsipio.

Idi balasitangak pay, nangrugi a pagduaduaak ti sursuro dagiti Saksi ni Jehova. Idi damo, diak inkankano dayta, ngem in-inut a kimmapuy ti pammatik. Inaramid dagiti dadakkelko ti amin a kabaelanda tapno maiturongdak iti umiso a dana, ngem diak impangpangag ida. Inlimedko ti nakibarkada kadagiti rebelioso nga agtutubo. Inapalak ida ta maaramidda ti amin a kaykayatda. Adu ti imoral nga ar-aramidmi, ket masansan nga agraragsak, agdroga, ken agbartekkami. Naragsakak idi damo a makikaduaak kadagiti tattao a kasla agpempennek iti ragsak.

Ngem iti kinapudnona, saanak a naragsak. Awan ngamin ti mariknak a panggep ti biag iti pannakikaduak kadakuada ta saanda a maseknan iti aniaman. Ngem naidumaak, ta maseknanak kadagiti agraraira a parikut, kas iti kinaawan hustisia ditoy lubong. Nagbanaganna, ad-adda a nagbalinak a naliday.

NO KASANO A BINALBALIWAN TI BIBLIA TI BIAGKO: Naminsan, idi agtawenak iti 17, nadlaw ni nanangko ti napalalo a lidayko. Impakaasina nga adalek manen ti Biblia. Imparegtana nga usigek ti linaonna saakto agdesision no iyaplikarko dagita wenno saan. Natukay ti riknak iti imbagana ket nagbaliw ti panangmatmatko. Immanamongak nga iyadalannak iti Biblia ni manangko a Caroline, a kaduana ni Akif a lakayna. Saan a Saksi ni Jehova dagiti nagannak ni manong Akif, isu nga adulton idi naammuanna ti kinapudno. Gapu iti napalabas ni kayongko, ammok a maawatanna ti kasasaadko isu nga inyebkasko kenkuana dagiti pakaseknak.

Dati nga ammok a di mayanatup iti maysa a Saksi ti kabibiagko, ngem impapanko nga  awan bibiang ti sabsabali no ania ti ar-aramidek. Ngem idi nagadalakon iti Biblia, naamirisko a mabalin a masaktan ni Jehova iti ar-aramidek. (Salmo 78:40, 41; Proverbio 27:11) Nabigbigko met a maapektaran gayam ti sabsabali.

Bayat nga intultuloyko ti agadal iti Biblia, naammuak a nainkalintegan a patien a ti Biblia ket Sao ti Dios. Kas pagarigan, naammuak ti adu a padto ti Biblia a nakaskasdaaw ti pannakatungpalda. Dagita ti nakatulong kaniak a nangiwaksi kadagiti panagduaduak idi damo.

Kalpasan ti agarup makatawen sipud inrugik manen ti agadal iti Biblia, kaduak dagiti dadakkelko a bimmisita iti manongko nga agtartrabaho kas boluntario iti sanga nga opisina dagiti Saksi ni Jehova idiay Germany. Naragsakanak unay idi nakitak a nakaragragsak ni manongko. Kasta ti rikna a nabayagen a sapsapulek! Naapresiarko met ti dadduma pay a Saksi a boluntario sadiay. Naidumada unay no idilig kadagiti di napudno a barkadak a paggugustoda ti delikado a panagragragsak. Di nagbayag, naimpusuan a nagkararagak ken Jehova ket inkarik a tungpal-biag a pagserbiak. Idi agtawenak iti 19, insimbolok ti dedikasionko ken Jehova babaen ti panagpabautisarko.

NO KASANO A NAGUNGGONAANAK: Adda itan pudpudno a panggep ti biagko. Naragsakak a mangisursuro iti Biblia iti sabsabali, ket tultulongak ida a mangammo ken Jehova ken kadagiti karina iti masanguanan. Nagunggonaan met ti pamiliak​—saandakon a pakadanagan.

Ammok dagiti napalabas a biddutko, ngem diak unayen pampanunoten dagita. Imbes ketdi, pampanunotek ti naan-anay a panangpakawan kaniak ni Jehova ken ti naayat nga interesna kaniak. Umanamongak iti nailanad iti Proverbio 10:22, nga agkuna: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.”

[Blurb iti panid 12]

“Adu ti imoral nga ar-aramidmi, ket masansan nga agraragsak, agdroga, ken agbartekkami”

[Blurb iti panid 13]

“Ammok dagiti napalabas a biddutko, ngem diak unayen pampanunoten dagita”