Amin Kadi a “Kristiano” ket Talaga a Kristiano?

KASANO kaadu dagiti Kristiano? Sigun iti Atlas of Global Christianity, dandani 2.3 bilion ti bilangda iti intero a lubong idi 2010. Ngem kinuna ti isu met la a reperensia a dagita a Kristiano ket nabingbingay iti nasurok a 41,000 a denominasion nga addaan iti nadumaduma a doktrina ken pagalagadan. Gapu ta kasta unay ti kaadu dagiti “Kristiano” a relihion, di pakasdaawan nga adu ti matikaw wenno maup-upay pay ketdin. Mabalin a maikunada, ‘Amin ngata nga agkunkuna a Kristiano ket talaga a Kristiano?’

Tapno masungbatan dayta, paliiwem daytoy a pagarigan. Ipapantayon nga agbiaheka iti sabali a pagilian. Siempre, damagen ti opisial ti imigrasion no ania a pagilian ti pagnanaedam. Kalikagumanna met a mangipakitaka iti pakabigbigam, nalabit maysa nga I.D. wenno pasaporte. Umasping iti dayta, saan nga umdas ti panangibaga ti maysa a pudno a Kristiano a patienna ni Kristo. Masapul nga adda ipakitana a pammaneknek wenno pakabigbigan. Ania ngata dayta?

Damo a nausar ti termino a “Kristiano” kalpasan ti 44 C.E. Ti historiador iti Biblia a ni Lucas kinunana: “Immuna idiay Antioquia a dagiti adalan babaen ti nadibinuan a panangiwanwan naawaganda iti Kristiano.” (Aramid 11:26) Dagidiay naawagan iti Kristiano ket ad-adalan ni Kristo. Kasano nga agbalin ti maysa a tao kas adalan ni Jesu-Kristo? Kastoy ti kuna ti The New International Dictionary of New Testament Theology: “Ti panagbalin nga adalan ni Jesus kaipapananna ti situtulok a panangisakripisio [ti maysa] iti biagna . . . iti intero a panagbiagna.” Ti ngarud pudno a Kristiano situtulok ken naan-anay a sursurotenna dagiti pannursuro ken bilin ni Jesus.

Adda kadi masarakantayo a kasta a tattao kadagiti adu nga agkunkuna a Kristiano ita? Ania ti kinuna ni Jesus a pakabigbigan dagiti pudno a pasurotna? Pangngaasim ta usigem ti sungbat ti Biblia kadagitoy a saludsod. Kadagiti sumaganad nga artikulo, usigentayo ti kinuna ni Jesus a lima a pakabigbigan a makatulong kadatayo a mangilasin kadagiti pudno a pasurotna. Usigentayo met no kasano nga imparangarang dagita dagiti Kristiano idi umuna a siglo. Ken ikagumaantayo met a lasinen no siasino kadagiti adu nga agkunkuna a Kristiano ita ti mangan-annurot kadagita.