Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Kasano ti rumbeng a pananglagip iti ipapatay ni Jesus?

Imbilin ni Jesus kadagiti pasurotna a laglagipenda ti ipapatayna babaen iti simboliko a pannangan, nga agusarda iti tinapay ken arak. Ti tinapay irepresentarna ti bagi ni Jesus, ket ti arak irepresentarna ti darana.​—Basaem ti Lucas 22:19, 20.

Awan lebadura ti tinapay nga inusar ni Jesus. Iti Biblia, masansan a mausar ti lebadura a mangirepresentar iti basol. Maitutop ngarud nga irepresentar dayta a tinapay ti perpekto a bagi ni Jesus. Indaton ni Jesus ti bagina kas sakripisio, a namagpatingga iti panagidaton iti animal kas imbilin ti Linteg Mosaiko. (Hebreo 10:5, 9, 10) Ti arak isimbolona ti nagpateg a dara ni Jesus a naiparukpok kas sakripisio maipaay iti basbasoltayo.​—Basaem ti 1 Pedro 1:19; 2:24; 3:18.

2. Kaano ti rumbeng a pananglaglagip iti ipapatay ni Jesus?

Natay ni Jesus idi Paskua ti Nisan 14. Mangrugi ti aldaw dagiti Judio kalpasan a lumnek ti init. Iti rabii sakbay ti ipapatay ni Jesus, kaduana dagiti apostolna iti pannangan ti Paskua. Kalpasanna, rinugianna ti baro a pannangan kas panglaglagip iti ipapatayna.​—Basaem ti Lucas 22:14, 15.

Ita, laglagipen dagiti adipen ti Dios ti panangipaay ni Jesus iti biagna tapno mawayawayaan ti sangatauan manipud basol ken ipapatay. Maselebraran idi ti Paskua maminsan iti makatawen. (Exodo 12:5-7, 13, 17) Isu a maminsan met iti makatawen a maangay ti Memorial ti ipapatay ni Jesus​—kalpasan a lumnek ti init iti Nisan 14 maibatay iti lunar a kalendario iti Biblia.​—Basaem ti Juan 1:29.

  3. Siasino dagiti mangan iti tinapay ken uminum iti arak?

Sakbay nga impasa ni Jesus ti arak kadagiti pasurotna, kinunana: “Daytoy a kopa kaipapananna ti baro a tulag.” (1 Corinto 11:25) Ti baro a tulag ti nangsukat iti Mosaiko a Linteg, a no siiinget a tungpalen dayta dagiti Israelita, inkari ti Dios nga agbalinda nga ilina. (Exodo 19:5, 6) Nupay kasta, saan a nagtulnog ti Israel iti sao ti Dios. Gapuna, nangisagana ni Jehova iti baro a tulag.​—Basaem ti Jeremias 31:31.

Babaen iti baro a tulag, bendisionan ni Jehova ti adu a tattao. Agdagup laeng iti 144,000 ti karaman iti dayta a tulag. Babaen kadakuada, minilion a tattao iti amin a nasion ti mabendisionanto iti agnanayon a biag iti paraiso a daga. Ti sumagmamano a karaman iti baro a tulag ket agserserbi ita ken Jehova ditoy daga. Dagitoy laeng ti maikari a mangan iti tinapay ken uminum iti arak gapu ta ti kopa “kaipapananna ti baro a tulag.”​—Basaem ti Lucas 12:32; Apocalipsis 14:1, 3.

4. Kasanotayo a magunggonaan iti Memorial wenno pananglaglagip iti ipapatay ni Jesus?

Ti tinawen a Memorial ti ipapatay ni Jesus paunegenna ti apresasiontayo iti nagpaiduma nga ayat ni Jehova. Imbaonna ti Anakna tapno matay maigapu kadagiti basoltayo. Gapuna, no umatendertayo iti Memorial, rumbeng nga utobentayo ti kaipapanan ti ipapatay ni Jesus para kadatayo. Napateg nga usigen no kasanotayo a maipakita ti apresasion iti inaramid ni Jehova a Dios ken ni Jesus.​—Basaem ti Juan 3:16; 2 Corinto 5:14, 15.

Para iti kanayonan nga impormasion, kitaem ti panid 206-208 daytoy a libro, Ania a Talaga ti Isursuro ti Biblia?, nga impablaak dagiti Saksi ni Jehova.