Ti Biblia Balbaliwanna ti Biag

ANIA a nasaysayaat a banag ngem iti naballigi a negosio ti nabirokan ti maysa a lalaki a taga-Scotland? Ania ti nakatulong iti maysa a lalaki a taga-Brazil tapno mabalbaliwanna ti imoral a biagna ken maikkatna ti agdroga iti cocaine? Kasano a naisardeng ti maysa a lalaki a taga-Slovenia ti nalabes a panagin-inumna? Basaem dagiti salaysayda.

“Impagarupko Idi a Naragsaken ti Biagko.”​—JOHN RICKETTS

PANNAKAYANAKNA: 1958

NAKAYANAKANNA: SCOTLAND

PAKASARITAANNA: BAKNANG A NEGOSIANTE

TI NAPALABASKO: Dimmakkelak iti nanam-ay a pamilia. Agakar-akarkami ta ni tatangko ket maysa nga opisial iti armada ti Britania. Malaksid iti Scotland, nagnaedkami met idiay England, Germany, Kenya, Malaysia, Ireland, ken Cyprus. Sipud idi walo ti tawenko, nagyanak kadagiti eskuelaan ti Scotland nga addaan iti pagkaseraan. Idi agangay, nagturposak idiay Cambridge University.

Idi agtawenak iti 20, rinugiak ti walo-tawen a karerak a panagnegosio iti langis. Idi damo, nagnegosioak idiay Abagatan nga America, idi kuan idiay Africa, ken kalpasanna idiay Makinlaud nga Australia. Idi addaak idiay Australia, nangibangonak iti kompania nga agpapautang, ngem inlakok met la dayta idi agangay.

Dakkel ti naglakuak isu a nagretiroak idi agtawenak iti 40. Binusbosko ti panawenko iti panagbiahe ken panagpasiar. Namindua a linikmutko ti Australia babaen iti motorsiklo, ken pinasiarko met ti intero a lubong. Impagarupko idi a naragsaken ti biagko.

NO KASANO A BINALBALIWAN TI BIBLIA TI BIAGKO: Sakbay pay a nagretiroak, kayatkon nga ammuen no kasano a makapagyamanak iti Dios iti biag nga intedna kaniak. Nakimisaak manen iti Anglican Church kas ar-aramidek idi ubingak. Ngem awan ti adu a maisuroda a nagtaud iti Biblia. Idi kuan, nakipagadalak kadagiti Mormon, ngem naupayak ta saanda unay nga agtalek iti Biblia.

Maysa nga aldaw, nagtuktok iti ridawko dagiti Saksi ni Jehova. Dagus a nadlawko nga ibasbasarda amin iti Biblia dagiti pannursuroda. Imbasada kaniak ti 1 Timoteo 2:3, 4. Kuna dagita a bersikulo a pagayatan ti Dios a “maisalakan koma ti amin a kita ti tattao ken dumtengda iti umiso a pannakaammo iti kinapudno.” Nasdaawak ta impaganetget dagiti Saksi a saan laeng a basta pannakaammo ti kasapulan no di ket umiso a pannakaammo a naibatay iti Biblia.

Ti pannakipagadalko iti Biblia kadagiti Saksi ni Jehova ti nakatulong kaniak a maaddaan iti umiso a pannakaammo. Kas pagarigan, naammuak a ti Dios ken ni Jesus ket saan a paset ti  misterio a Trinidad, imbes ketdi nagdumada a persona. (Juan 14:28; 1 Corinto 11:3) Naragsakanak a makaammo iti dayta a simple a kinapudno. Nasayanganak met iti adu a tiempo a binusbosko a mangtarus iti palso ken di matartarusan a doktrina!

Idi agangay, umat-atenderakon kadagiti gimong dagiti Saksi ni Jehova. Naallukoyak iti nasayaat a panaglalangen ken kababalin ti tunggal maysa sadiay. Panagriknak, kaslada santo. Ti pudpudno nga ayatda ti nangkombinsir kaniak a nasarakakon ti pudno a relihion.​—Juan 13:35.

NO KASANO A NAGUNGGONAANAK: Kalpasan a nabautisaranak, naam-ammok ti maysa a nakasaysayaat a babai nga agnagan Diane. Dimmakkel iti pamilia a Saksi, ken adu a makaay-ayo a kababalin ti nakitak kenkuana. Nagkasarkami idi agangay. Imbilangko a bendision ni Jehova ti relasionmi ken Diane kasta met ti suportana kaniak.

Tinarigagayanmi ken Diane ti umakar iti lugar a dakdakkel ti pakasapulan iti manangaskasaba iti naimbag a damag manipud iti Biblia. Idi 2010, immakarkami idiay Belize iti Makintengnga nga America. Agserserbikami ditoy kadagiti tattao a mangay-ayat iti Dios ken mawaw iti kinapudno iti Biblia.

Natalna itan ti panunotko ta nasarakakon ti kinapudno maipapan iti Dios ken iti Saona, ti Biblia. Kas amin-tiempo a ministro, maragragsakanak a mangisuro iti Biblia iti adu a tattao. Anian a ragsak ti makakita iti kas kaniak a simmayaat ti biagna gapu iti kinapudno iti Biblia! Naammuak met laengen ti kasayaatan a pamay-an a makapagyamanak iti Dios iti biag nga intedna.

“Nakasingsing-petda Kaniak.”​—MAURÍCIO ARAÚJO

PANNAKAYANAKNA: 1967

NAKAYANAKANNA: BRAZIL

PAKASARITAANNA: IMORAL IDI TI BIAGNA

TI NAPALABASKO: Dimmakkelak idiay Avaré, maysa a natalna ken bassit nga ili iti estado ti São Paulo. Gistay adda amin trabaho dagiti tattao sadiay.

Natay ni tatangko idi sikognak pay laeng ni Nanang. Idi ubingak, gundawayak nga isuot dagiti bado ni Nanang no kasta nga awan iti balaymi. Nagbalin a kasla babai ti tigtignayko, ket imbilangdak dagiti tattao kas bakla. Idi agangay, nakidennaak kadagiti padak a lallaki, agtutubo man wenno adulto.

Iti maudi a tawtawen ti kinatin-edyerko, masansan a mapanak kadagiti bar, nightclub, ken uray kadagiti simbaan tapno agsawarak iti makadennak, lallaki man wenno babbai. No piesta ti carnival, agkawesak iti bado ti babai ket agsalaak kadagiti parada. Nagbalinak a sikat.

Karaman kadagiti gagayyemko ket dagiti bakla, prostitute, ken managdroga. Sumagmamano kadakuada ti nangimpluensia kaniak nga agaramat iti crack cocaine, ket naadiktoak idi agangay. No dadduma, agpatpatnagkami nga agsay-up iti cocaine. Adda met gundaway nga  agmalmalemak nga agdroga. Nagbalinak a nakakutkuttong nga uray la nagdinamag nga addaanak iti AIDS.

NO KASANO A BINALBALIWAN TI BIBLIA TI BIAGKO: Iti daydi a tiempo, adda dagiti nakasaritak a Saksi ni Jehova. Nakasingsingpetda kaniak. Maysa kadagiti imbasada a teksto ti Biblia ket ti Roma 10:13, nga agkuna: “Tunggal maysa nga umawag iti nagan ni Jehova maisalakanto.” Gapuna, nabigbigko ti kinapateg ti panangusar iti nagan ni Jehova. No kasta nga agpatpatnag nga agusarak iti cocaine, lukatak ti tawa, tumangadak iti langit, ken agluluaak nga agkararag ken agpakpakaasi a tulongannak ni Jehova.

Maasianak ken nanangko a madandanagan iti pannakakitana a daddadaelek ti bagik iti droga, isu nga insardengko ti agdroga. Di nagbayag kalpasanna, inawatko ti awis dagiti Saksi ni Jehova a panagadal iti Biblia. Impasiguradoda kaniak a pumigsa ti pakinakemko a mangikkat iti panagdroga. Pudno ti imbagada!

Bayat nga intultuloyko ti agadal iti Biblia, nabigbigko a masapul a balbaliwak ti kabibiagko. Talaga a narigatko a maikkat ti kinabaklak, ta inkakaubingak dayta. Ngem nakatulong kaniak ti saankon a pannakikadkadua kadagiti dati a barkadak. Insardengko metten ti mapan kadagiti bar ken nightclub.

Nupay saan a kaskarina a makapagbalbaliwak, maliwliwaak ta maseknan kaniak ni Jehova ken maawatanna ti panagreggetko. (1 Juan 3:19, 20) Idi 2002, naikkatkon dagiti homoseksual nga ar-aramidko, ken iti dayta a tawen nabautisaranak kas Saksi ni Jehova.

NO KASANO A NAGUNGGONAANAK: Nasdaaw ni nanangko iti panagbalbaliwko isu a nangrugi met a makipagadal iti Biblia, nupay nabayag idin a naistrok. Napatanorna ti panagayat ken Jehova ken iti kinapudno iti Biblia.

Walo a tawenen nga agserserbiak iti amin-tiempo a ministerio, a busbusbosek ti kaaduan a tiempok iti panangisuro iti Biblia. Aklonek a no dadduma masapul a labanak dagiti di umiso a tarigagayko. Ngem ammok a no diak tumulok kadagita a tarigagay, agbalinak a makaay-ayo ken Jehova.

Ti nasinged a relasionko ken Jehova ken ti panagbiagko maitunos iti pagayatanna ti nangnayon iti panagraemko iti bagik. Maysaak itan a naragsak a lalaki.

“Nalaingak nga Uminum.”​—LUKA ŠUC

PANNAKAYANAKNA: 1975

NAKAYANAKANNA: SLOVENIA

PAKASARITAANNA: DATI A MANGNGINUM

TI NAPALABASKO: Nayanakak idiay Ljubljana, ti kabesera ti Slovenia. Naragsak ti panagubingko agingga idi uppat ti tawenko. Idi kuan, nagpakamatay ni tatangko isu a nagtrabaho ni Nanang tapno mapakannakami nga agkabsat.

Idi agtawenak iti 15, nakipagnaedak ken lolak. Kaykayatko dayta ta kaarrubana ti adu a gagayyemko. Ad-adu met ti wayawayak ngem idi  addaak iti pagtaenganmi. Idi agtawenak iti 16, inrugik ti makikadua iti tattao a paggugustoda ti uminum iti arak iti ngudo ti lawas. Pinaatiddogko ti buokko, nagkawesak kas rebelioso, ken agsigarilioak metten idi agangay.

Pinadasko ti nagduduma a droga ngem nagustuak ti panaginum. Di nagbayag, umad-adun ti mainumko nga arak. Saan a madmadlaw a nakainumak ta mailemmengko dayta. Masansan a ti laeng agat-arak a sang-awko ti mangipadlaw a nakainumak. Uray no kasta, awan ti mangipagarup a naglalaok ti nainumko a sumagmamano a litro nga arak, vodka, wenno serbesa!

Namin-adu a siak ti mangyawid kadagiti gagayyemko kalpasan ti panaginummi iti disco, uray no mamindua nga ad-adu ti nainumko nga arak. Maysa nga aldaw, nangngegko a binirngasannak ti maysa a gayyemko iti “sarangusong”​—gapu ta nalaingak nga uminum. Talaga a nasaktan ti riknak.

Dayta ti namagpanunot kaniak no ania ti ar-aramidek iti biagko. Nariknak nga awan serserbi ti biagko. Kasla awan pulos ti naimbag a maar-aramidak.

NO KASANO A BINALBALIWAN TI BIBLIA TI BIAGKO: Iti daydi a gundaway, nadlawko a simmingpet ti maysa a kaklasek. Kayatko a maammuan ti makagapu isu nga inawisko a mapankami iti maysa a café. Bayat ti panagtungtongmi, inlawlawagna a makipagad-adal gayam iti Biblia kadagiti Saksi ni Jehova. Imbagana ti dadduma a naadalna, nga idi la a mangngegak ta nagubingak nga awan a pulos naespirituan a banag a naisuro kaniak. Rinugiak ti makigimong ken makipagadal iti Biblia kadagiti Saksi.

Naammuak iti panagadalko iti Biblia ti adu a nagsasayaat ken makagutugot a kinapudno. Kas pagarigan, naammuak nga agbibiagtayon iti kuna ti Biblia a ‘maudi nga al-aldaw.’ (2 Timoteo 3:1-5) Naammuak met a dandanin ikkaten ti Dios dagiti dakes a tattao ditoy daga ken ikkanna iti gundaway dagiti naimbag a tattao nga agbiag nga agnanayon iti Paraiso. (Salmo 37:29) Nagutugotak a mangbalbaliw iti biagko tapno maibilangak kadagidiay a naimbag a tattao.

Inrugik nga ipadamag kadagiti gagayyemko ti maipapan kadagiti maad-adalko a kinapudno iti Biblia. Adu ti nanglais kaniak ngem dayta ti nakatulong kaniak tapno mabigbigko a saanda a pudno a gagayyem. Nabigbigko a ti bisiok a panaginum ket gapu iti pannakikadkaduak kadakuada. Kanayon a padpadaananda ti ngudo ti lawas tapno agbartekda manen.

Insardengko ti makikadua kadakuada ket inrugik ti makilangen kadagiti Saksi ni Jehova. Naparegtaak iti pannakikaduak kadagiti Saksi ta managayatda iti Dios ken ikagkagumaanda ti agbiag maitunos kadagiti nadiosan a pagalagadan. In-inut a naisardengko ti nalabes a panagin-inumko.

NO KASANO A NAGUNGGONAANAK: Agyamanak ken Jehova ta diakon kasapulan ti arak tapno agbalinak a naragsak. Diak ammo no ayanko itan no diak insardeng ti bisiok nga aginum. Ngem kombinsidoak a nasaysayaat itan ti biagko.

Iti napalabas a pito a tawen, naaddaanak iti pribilehio nga agserbi iti sanga nga opisina dagiti Saksi ni Jehova iti Slovenia. Naaddaanak iti makagunggona a biag gapu iti pannakaammok ken Jehova ken ti panagserbik kenkuana.