Ti Sungbat ni Jesus

Adu a relihioso a tattao ti agkuna a rumbeng a makiraman ti relihion iti politika. Patienda a napateg ti relihion tapno masolbar dagiti parikut ti tao. Ngem kuna ti dadduma a masapul nga agsina ti relihion ken politika. Ania ti makunam? Rumbeng kadi nga aglaok dagitoy a dadakkel nga institusion?

NADESKRIBIR ni Jesu-Kristo kas “tao a kadakkelan ti impluensiana iti historia ti relihion.” Ipapantayon a maisaludsodtayo kenkuana, ‘Rumbeng kadi a makiraman ti relihion iti politika?’ Ania ngata ti sungbatna? Idi adda ditoy daga, sinungbatanna dayta a saludsod babaen iti sasao ken ar-aramidna. Kas pagarigan, iti nalatak a diskursona, nangted ni Jesus kadagiti pagannurotan tapno maawatan dagiti pasurotna ti bambanag a mabalinda a pakiramanan iti komunidadda. Usigentayo ti sumagmamano a punto iti dayta a diskursona.

 Mangimpluensia iti Biag ti Sabsabali

Imbaga ni Jesus ti rumbeng a panangmatmat dagiti pasurotna iti lubong: “Dakayo ti asin ti daga; ngem no ti asin mapukawna ti bilegna, kasanonto a maisubli ti apgadna? Saanen a mabalin nga usaren iti aniaman a banag no di ket maibelleng iti ruar tapno payatpayaten dagiti tattao. Dakayo ti silaw ti lubong. . . . Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.” (Mateo 5:13-16) Apay nga indilig ni Jesus dagiti pasurotna iti asin ken silaw?

Ipasimudaag ti sasao ni Jesus a mayarig dagiti pasurotna iti asin, saan laeng nga agpaay iti bassit a grupo, no di ket iti amin a tattao. Kinunana pay a kaslada iti silaw, saan laeng nga agpaay iti sumagmamano a tattao, no di ket iti amin a mayat a malawlawagan. No kasta, nabatad a saan a kayat ni Jesus a sumina dagiti pasurotna iti kagimongan. Apay?

Panunotem daytoy: Ti asin dina mapreserba ti taraon no di mailaok iti dayta. Ti pagsilawan dina malawagan ti nasipnget a kuarto no mayadayo iti dayta. Nabatad ngarud ti rason no apay a saan nga imbilin ni Jesus a mapan dagiti adalanna iti maysa a lugar ket mangbukelda iti bukodda a komunidad. Dina met imbaga nga agpupokda kadagiti narelihiosuan nga institusion. Imbes ketdi, no kasano a napateg ti asin iti taraon ken ti lawag iti kasipngetan, nasken met nga impluensiaan dagiti Kristiano ti biag ti sabsabali.

“Saanda a Paset ti Lubong”

Yantangay imbilin ni Jesus a dagiti pasurotna masapul makilangenda iti padada a tao, ania ngarud ti rumbeng a panangmatmat dagiti Kristiano iti politika? Sakbay ti ipapatay ni Jesus, inkararagna iti Dios mainaig kadagiti pasurotna: “Kiddawek kenka, a saanmo nga ikkaten ida iti lubong, no di ket aywanam ida gapu iti daydiay nadangkes. Saanda a paset ti lubong, a kas kaniak a saan a paset ti lubong.” (Juan 17:15, 16) Kasano ngarud nga agbalin dagiti Kristiano a saan a paset ti lubong idinto a makilangenda latta kadagiti tattao iti komunidadda? Maammuantayo dayta no usigentayo pay dagitoy a saludsod:

• Ania ti panangmatmat ni Jesus iti politika?

• Ania ti rumbeng nga aramiden dagiti Kristiano ita?

• Ania ti epekto dagiti Nakristianuan a sursuro iti komunidad?

[Blurb iti panid 4]

Nabatad a saan a kayat ni Jesus a sumina dagiti pasurotna iti kagimongan