SUHETO ITI AKKUB: APAY A NAKARO TI PANAGSAGABA? KAANO NGA AGPATINGGA?
Nakaad-adu nga Inosente ti Natay!
Nadungngo nga ubing ni Noelle ken pagay-ayatna ti agdrowing. Maysa a rabii ti kalgaw, napan nagay-ayam iti likud ti balayda ket natinnag iti swimming pool-da. Nalmes, dua a lawas sakbay ti maikapat a kasangayna.
Charlotte, Daniel, Olivia, Josephine . . . Dagitoy ti sumagmamano kadagiti 20 nga ubbing nga agtawen iti innem wenno pito a karaman kadagiti 26 a napaltogan iti eskuelaan idiay Connecticut, U.S.A., idi Disiembre 14, 2012. Iti pumpon, dinakamat ni Presidente Obama ti nagan dagiti ubbing ken imbagana kadagiti dumdumngeg nga agladladingit: “Masapul a maisardengen dagitoy a trahedia.”
Idi 1996, pimmanaw idiay Iraq ni Bano nga agtawen iti 18 ken immakarda a sangapamiliaan idiay Norway. Sun Rays ti awag kenkuana dagiti gagayyemna. Ngem nakalkaldaang ta idi Hulio 22, 2011, maysa ni Bano kadagiti 77 a biktima ti ekstremista a nangibaga: “Ladingitek ta bassit laeng ti napapatayko.”
Iti intero a lubong, kanayon a maipadamag dagitoy a nakalkaldaang a pasamak. Panunotenyo ti ladingit ken saem a resulta ti aksidente, krimen, gubat, terorismo, didigra, ken dadduma pay a trahedia. Nakaad-adu nga inosente ti natay ken adu ti agsagsagaba nga awan gapgapuna.
Dadduma pabasolenda ti Dios. Adda dagiti mangibaga a ti Namarsua saan a maseknan kadagiti tattao. Kuna ti dadduma a makitkita ti Dios ti panagsagabatayo ngem dina kayat ti makibiang. Adda dagiti mangibaga a naikeddengen dagita a trahedia. Nakaad-adu nga opinion maipapan iti dayta. Pakasarakantayo iti mapagtalkan ken makapnek a sungbat? Iti sumaganad nga artikulo, ammuentayo ti kuna ti Sao ti Dios, ti Biblia, a pakaigapuan ti panagsagaba ken kasano nga agpatingga.
