NO APAY NGA AGDUADUA TI DADDUMA: Adu a tao ti mangipapan a saanda a maikari, managbasol, ken narugitda iti imatang ti Dios. Nadepres ken nakonsiensia ni Kendra gapu ta dina maar-aramid dagiti kalikaguman ti Dios, isu a naikunana, “Insardengkon ti agkararag.”

NO ANIA TI ISURSURO TI SAO TI DIOS: Saan a dagiti pagkapuyam ti kitkitaen ni Jehova no di ket ti pudno a kinataom. Kuna ti Biblia: “Pagaammona unay ti pannakapormatayo, a laglagipenna a tapoktayo.” Kasta met, saannatayo a dusaen “maitutop kadagiti basoltayo,” no di ket siaasi a pakawanennatayo no agbabawitayo.—Salmo 103:10, 14.

Usigem ni Ari David iti Israel a nadakamat iti immuna nga artikulo. Inkararagna iti Dios: “Dagita matam nakitada uray pay ti maisiksikog a bagik; ket iti librom naisurat dagiti amin a pasetna . . . Sukisokennak, O Dios, ket ammuem ti pusok.” (Salmo 139:16, 23) Wen, kombinsido ni David nga uray no nakaaramid iti nadagsen a basol, nakita ni Jehova ti naimpusuan a panagbabawina.

Ad-adda a maawatannaka ni Jehova ngem iti asinoman a tao. Kuna ti Biblia: “Ti maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.” (1 Samuel 16:7) Ammo ti Dios no ania ti kinataom—gapu kadagiti natawidmo a kababalin, ti pannakapadakkelmo, ti aglawlawmo, ken ti personalidadmo. Makita ken ipategna ti panangikagumaam nga agaramid iti umiso uray no agkamalika.

Ngem kasano nga usaren ti Dios ti nauneg a pannakaawatna iti pudno a kinataom tapno liwliwaennaka?