Sigun iti Encyclopædia Britannica, ti Easter ti “kangrunaan a piesta ti Kristiano a relihion a mangselselebrar iti Panagungar ni Jesu-Kristo.” Ngem Nakristianuan kadi dayta a selebrasion?

Tapno maammuantayo no pudpudno ti maysa a nagkauna a banag, sukimatentayo a naimbag ti detalyena. Kasta met laeng iti Easter, masapul a kitaentayo a naimbag dagiti detalyena tapno maammuantayo no Nakristianuan a selebrasion dayta.

Umuna iti amin, binilin ni Jesus dagiti pasurotna a laglagipenda, saan a ti panagungarna, no di ket ti ipapatayna. Inawagan ni apostol Pablo daytoy nga okasion kas “pangrabii ti Apo.”—1 Corinto 11:20; Lucas 22:19, 20.

Maysa pay, adu a tradision ti Easter ti “awan unay pakainaiganna” iti panagungar ni Jesus, kuna ti Britannica, “no di ket natawid dagita a kostumbre kadagiti inapo.” Kas pagarigan, kuna ti The Encyclopedia of Religion maipapan iti itlog ken koneho a nalatak a simbolo ti Easter: “Ti itlog isimbolona ti baro a biag a nagpessa iti kasla natay (natangken) nga ukis ti itlog.” Kunana pay: “Ti koneho ket pagaammo nga alisto nga agpaadu, isu nga isimbolona ti iyaay ti primavera (spring).”

Inlawlawag ni Philippe Walter a propesor ti nagkauna a literatura no kasano a nagbalin a paset ti selebrasion ti Easter dagiti kasta a kostumbre. Insuratna nga iti “proseso a panangkomberte kadagiti pagano a relihion iti Kristianismo,” naglaka nga inaig ti panagungar ni Jesus iti pagano a piesta a mangselebrar iti “panagbalbaliw manipud iti ipapatay ti lam-ek nga agturong iti biag ti primavera.” Innayon pay ni Walter a napateg a pamay-an dayta tapno mairaman dagiti “Nakristianuan a selebrasion” iti kalendario dagiti pagano, iti kasta, nalaklaka ti pannakakomberte ti adu a tattao.

Saan a napasamak ti kasta a panangkomberte idi sibibiag pay dagiti apostol gapu ta nagserbida kas “pangtiped” maibusor iti paganismo. (2 Tesalonica 2:7) Impakdaar ni apostol Pablo a kalpasan ti ‘ipapanawna,’ “tumakderto dagiti tattao ket agsaodanto iti tiritir a bambanag tapno iyadayoda a pasuroten kadakuada dagiti adalan.” (Aramid 20:29, 30) Ken iti maudi a paset ti umuna a siglo, insurat ni apostol Juan nga inyaw-awanen ti dadduma dagiti Kristiano. (1 Juan 2:18, 26) Dayta ti nangrugian ti panangakseptar kadagiti pagano a kostumbre.

Ngem kuna ti dadduma a saan met a dakes nga akseptaren ti sumagmamano a kostumbre ti Easter ta ad-adda kano pay a matarusan dagiti “pagano” ti kaipapanan ti panagungar ni Jesus. Nupay kasta, saan a pulos nga umanamong iti dayta ni Pablo. Adu a pagano a kostumbre ti nakitana iti panagdaliasatna iti Imperio ti Roma, ngem dina pulos inakseptar ti aniaman kadagita tapno laeng ad-adda a matarusan dagiti tattao ti maipapan ken Jesus. Pinakdaaranna ketdi dagiti Kristiano: “Dikay agbalin a di agkaasmang a naisangol kadagiti di manamati. Ta ania ti pagkaduaan ti kinalinteg ken kinakillo? Wenno ania ti pakiramanan ti lawag iti sipnget? ‘Gapuna rummuarkayo manipud iti tengngada, ket isinayo ti bagbagiyo,’ kuna ni Jehova, ‘ket isardengyo a sagiden ti di nadalus a banag.’”—2 Corinto 6:14, 17.

Ania ti resulta ti ababa a panangsukimattayo kadagiti detalye? Nalawag a ti Easter ket saan a Nakristianuan a selebrasion.