AGTULTULOYKAYO NGA AGBANTAY!

2023: Tawen a Napno iti Pakadanagan—Ania ti Ibaga ti Biblia?

I-PLAY

Iti 2023, adu kadagiti pasamak iti intero a lubong ti mangipakita nga agbibiagtayon iti ibagbaga ti Biblia a “maudi nga al-aldaw.” (2 Timoteo 3:1) Kitaem dagiti impakpakauna ti Biblia a mapaspasamak ita.

Ti Biblia ken dagiti pasamak iti lubong

“Gubat iti nadumaduma a lugar.”—Mateo 24:6.

“Umad-adu ti naranggas a panaglalaban iti agduduma a lugar iti intero a lubong.” a

Kitaem dagiti artikulo nga “Asino ti Mangisalakanto Kadagiti Sibilian?” ken “Nasurok a $2 a Trilion ti Ginastos Dagiti Gobierno iti Lubong Para iti Militar.”

‘Ginggined iti nadumaduma a lugar.’—Marcos 13:8.

“Sipud nangrugi ti 2023, tresen a ginggined a napigpigsa ngem iti magnitude 7 ti napasamak iti intero a lubong. Manipud nangrugi a mairekord dagiti ginggined, dayta ti maysa kadagiti kaaduan a ginggined a naireport iti uneg laeng ti makatawen.” b

Kitaem ti artikulo a “Dinayyeg ti Napigsa a Ginggined ti Turkey ken Syria.”

“Dagiti nakabutbuteng a buya.”—Lucas 21:11.

“Nalpasen ti tiempo ti panagbara ti globo; agburburek itan.”—António Guterres, UN secretary-general. c

Kitaem ti artikulo a “Nakabarbara a Summer ti 2023.”

“Bisin.”—Mateo 24:7.

“2023: Sabali manen a tawen a saan nga ammo dagiti marigrigat no kasanoda a mapakan ti pamiliada.” d

Kitaem ti artikulo a “Krisis iti Makan Gapu iti Gubat ken Climate Change.”

“Dagiti delikado ken narigat a tiempo.”—2 Timoteo 3:1.

“Iti intero a lubong, maysa iti kada walo a tao ti addaan kadagiti problema iti mental a salun-at.” e

Kitaem ti artikulo a “Kumarkaro a Problema iti Mental a Salun-at Dagiti Tin-edyer.”

Ania ngata ti mapasamak iti 2024?

Awan ti makaibaga. Ngem ipakita dagiti mapaspasamak iti lubong nga asidegen a suktan ti Pagarian ti Dios, wenno ti gobierno idiay langit, dagiti gobierno ti tao. Kasta met, ikkatennanto ti amin a rason nga agrigrigat ken agdandanag dagiti tattao.—Daniel 2:44; Apocalipsis 21:4.

Ngem bayat nga ur-urayentayo dayta, manamnamatayo a tulongannatayo ti Dios no madandanagantayo. Ibaga ti Biblia:

“No mabutengak, sika ti pagtalkak.”—Salmo 56:3.

Kasanotayo a maipakita nga agtaltalektayo iti Dios? Kayatmi a maammuam ti ad-adu pay maipapan iti ikarkari ti Biblia nga awanton ti panagrigat iti masanguanan. Padasem ti libre a panagadal iti Biblia tapno maammuam no kasano a makatulong kenka ken iti pamiliam dagiti kari ti Biblia.

a Foreign Affairs, “A World at War: What Is Behind the Global Explosion of Violent Conflict?” ni Emma Beals ken Peter Salisbury, Oktubre 30, 2023.

b Earthquake News, “Year 2023: Number of Major Earthquakes on Course for Record,” Mayo, 2023.

c United Nations, “Secretary-General’s Opening Remarks at Press Conference on Climate,” Hulio 27, 2023.

d World Food Programme, “A Global Food Crisis.”

e World Health Organization, “World Mental Health Day 2023,” Oktubre 10, 2023.