No sobra ti panagdandanagmo, delikado dayta iti salun-at ken emosionmo. Baka agresulta pay ketdi dayta kadagiti nakarkaro a problema ngem iti dati a pagdandanagam.

•  Limitaram ti buyaem, basaem, wenno denggem a negatibo a damdamag. Saan a masapul a maammuam ti amin a detalye ti maysa a problema. Lallalo laeng a mabuteng ken agdanagka no kanayon nga agbuya, agbasa, wenno dumngegka kadagiti negatibo a report.

   Prinsipio ti Biblia: “Ti naladingit nga espiritu ibusenna ti pigsa.”—Proverbio 17:22.

   “Naglaka laeng ti maadik iti panangkita kadagiti kabaruan ken makapainteres nga impormasion iti internet, ngem saan a nasayaat a mayugalim dayta. Maksayan ti panagdandanagko no basbassit ti maammuak a news.”—John.

   Panunotem: Talaga kadi a kasapulan a maammuam dagiti kabaruan a damdamag?

•  Mangaramidka iti rutina ken surotem dayta. Agpapada koma ti oras ti panagriing, pannangan, panangaramid kadagiti trabaho iti balay, ken pannaturogmo iti kada aldaw. No adda eskediulmo a mangaramid kadagiti bambanag, agbalin a mas normal ti biagmo ken maksayan ti panagdandanagmo.

   Prinsipio ti Biblia: “Sigurado nga agballigi dagiti plano ti nagaget.”—Proverbio 21:5.

   “Idi nangrugi ti COVID-19 pandemic, interamente a nagbaliw ti rutinak ken sobran ti orasko nga agpalpaliwa. Kayatko nga usaren a naimbag ti orasko, isu nga inyeskediulko dagiti kasapulak nga aramiden iti kada aldaw.”—Joseph.

   Panunotem: Adda kadi rutinam a pakariknaam nga adda maar-aramidam iti kada aldaw?

•  Agpokuska iti positibo. No kanayon a pampanunotem dagiti bambanag a saanmo a naaramidan iti napalabas wenno dagiti dakes a mabalin a mapasamak iti masanguanan, ad-adda laeng nga agdanagka. Agpanunotka ketdi iti dua wenno tallo a banag a pagyamanam.

   Prinsipio ti Biblia: “Ipakitayo a managyamankayo.”—Colosas 3:15.

   “No agbasbasaak iti Biblia, saan a dagiti negatibo nga impormasion ti mapampanunotko, isu a makapagpokusak kadagiti positibo. Kasla nagsimple laeng dayta, ngem epektibo!”—Lisa.

   Panunotem: Kanayon kadi a dagiti negatibo a bambanag iti biagmo ti pampanunotem ket malipatamon dagiti positibo?

•  Panunotem ti dadduma. No kanayon a madandanaganka, mabalin a kayatmo ti agmaymaysa. Imbes a kasta ti aramidem, panunotem ketdi no kasano a matulongam dagiti agkasapulan.

   Prinsipio ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.

   “Naragsakak no tultulongak ti dadduma. Mangar-aramidak iti banag a pagimbaganda, ket no kasta ti aramidek, maksayan ti panagdanagko. Malipatak pay ketdin dagiti problemak.”—Maria.

   Panunotem: Asino kadagiti am-ammom ti talaga nga agkasapulan, ken kasano a matulongam ida?

•  Agtalinaedka a nasalun-at. Maaddaanka iti umdas nga ehersisio ken turog. Manganka kadagiti makapasalun-at. No aywanam ti salun-atmo, sumayaat ti panangkitam iti biag ken maksayan ti panagdandanagmo.

   Prinsipio ti Biblia: ‘Makagunggona ti pisikal a panagehersisio.’—1 Timoteo 4:8, footnote.

   “Saankami a makapag-exercise iti anakko iti ruar uray no kayatmi, isu nga agek-exercise-kami lattan iti uneg ti balaymi. Gapu iti dayta, naragragsakkami ken nasaysayaat pay ti panangtratomi iti maysa ken maysa.”—Catherine.

   Panunotem: Kasapulan kadi a manganka kadagiti nasustansia a makan ken regular nga ag-exercise tapno nasalsalun-atka?

 Malaksid iti panangsurot kadagitoy a tip tapno maksayan ti panagdanag, adu a tattao ti natulongan idi naammuanda ti maipapan kadagiti mapagtalkan a kari ti Biblia a nasaysayaat a masakbayan. Kitaem ti artikulo nga “Ania ti Aramiden ti Pagarian ti Dios?”