Sigun iti Catholic News Service, iti maysa a seremonia idiay St. Peter’s Basilica idi Marso 25, 2022, nakatakder ni Pope Francis iti sango ti rebulto ni Maria a “nakakidem ken nakadumog nga agkarkararag.” “Ipakpakaasina ken Maria” ti talna. Innayon pay ti maysa a report iti Vatican News a “kidkiddawen ti Papa iti Immaculate Heart of Mary a bendisionanna ti sangatauan, nangnangruna dagidiay adda idiay Russia ken Ukraine.”

 Ania ti makunam? Rumbeng kadi ti agkararag wenno agusar kadagiti imahen iti panagdaydayaw? Panunotem dagiti sumaruno a bersikulo ti Biblia:

•   “Dika mangaramid iti kinitikitan nga imahen wenno iti kapada ti aniaman nga adda iti langit, daga, wenno iti danum. Dika agruknoy wenno agserbi kadagita, ta siak ni Jehova a Diosmo nga agkidkiddaw iti naipamaysa a debosion.”—Exodo 20:4, 5. a

•   “Pirak ken balitok dagiti idoloda, nga inaramid dagiti tattao. Adda ngiwatda, ngem saanda a makasao; adda matada, ngem saanda a makakita; adda lapayagda, ngem saanda a makangngeg; adda agongda, ngem saanda a makaangot; adda imada, ngem saanda a makarikna; adda sakada, ngem saanda a makapagna; awan ti timek a rummuar iti karabukobda. Dagiti tattao nga agar-aramid kadagita ket agbalinto a kas kadagita, ken uray ti amin nga agtaltalek kadagita.”—Salmo 115:4-8.

•   “Siak ni Jehova. Dayta ti naganko; diak ibingay ti dayagko iti asinoman, wenno ti dayawko kadagiti kinitikitan nga imahen.”—Isaias 42:8, footnote.

•   “Adaywanyo ti idolatria.”—1 Corinto 10:14.

•   “Adaywanyo dagiti idolo.”—1 Juan 5:21.

 Para iti ad-adu pay nga impormasion no ania ti ibaga ti Biblia maipapan iti panangusar kadagiti imahen iti panagdaydayaw, basaem ti artikulo a “No Ania ti Kuna ti Biblia—Dagiti Imahen” wenno buyaem ti video a Kayat Kadi ti Dios nga Agusartayo iti Imahen iti Panagdaydayawtayo?

 Baka kayatmo met a maammuan no ania ti kuna ti Biblia maipapan kadagitoy a topiko:

•   “Ania ti Kuna ti Biblia Maipapan ken Birhen Maria?”

•   “Rumbeng Aya nga Agkararagka ken Birhen Maria?”

•   “Dagiti Milagro ken Aparision—Pagilasinan a Naggaput’ Dios?”

•   “Talna Ditoy Daga—Kasano a Mapasamak?”

Photo credit: Vincenzo Pinto/AFP via Getty Images