Idi 2023, nabigbig dagiti eksperto iti salun-at a ti kinaliday ket serioso a problema a masapul a labanan. Kasanotayo a malabanan dayta?

•   “Dakes ti epekto iti salun-at ken emosiontayo ti kinaliday ken panagmaymaysa,” kuna ni Dr. Vivek Murthy, maysa a U.S. surgeon general. Ngem imbagana met nga adda maaramidantayo. Ania? “Inaldaw nga agaramidtayo kadagiti simple wenno babassit a banag a mangpatibker iti relasiontayo iti dadduma.” a

 Saan laeng a panagmaymaysa ti rason a malidayantayo. Mabalin a mariknatayo latta dayta uray adu ti kakaduatayo. Ngem aniaman ti rason, makatulong ti Biblia. Naglaon dayta kadagiti praktikal a balakad no kasano a mapatibkertayo ti pannakigayyemtayo iti dadduma tapno saantayo unay marikna ti kinaliday.

 Nalaingka koma a makikomunikar. Saanna laeng a kaipapanan nga ibagam ti marikriknam iti dadduma, no di ket nalaingka koma a dumngeg. No ad-adda nga ipakitam ti personal nga interes iti dadduma, mas tumibker met ti relasionmo kadakuada.

•   Prinsipio ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.

 Saanmo a limitaran ti pakigayyemam. Makigayyemka kadagiti mas natataengan wenno ub-ubing kenka ken mabalin met a kadagidiay sabali ti kultura wenno pagilian a naggapuanda.

•   Prinsipio ti Biblia: “Luktanyo a naimbag dagiti pusoyo.”—2 Corinto 6:13.

 Tapno maammuam ti ad-adu pay nga impormasion no kasanom a pabilgen ti pannakigayyemmo iti dadduma, basaem ti artikulo a “Panangpennek iti Nasged a Tarigagaytayo a Makigayyem.”