“Idi ubingak, inaldaw a kabkabilen ken pagsasawannak iti nasakit ni manongko. Idi nagasawaak, saan met laeng a nasayaat ti panangtrato kaniak ti katugangak a babai. Trinatodak a kas adipen dagiti katugangak. Isu a mapampanunotko idin ti agpakamatay.”—Madhu, a India.

 Imbaga ti World Health Organization, “Ti panangabuso kadagiti babbai ket gagangayen iti intero a lubong.” Matantia a maysa iti tallo a babbai ti nakapadasen iti pisikal wenno seksual a panangabuso.

 No napasamaken dayta kenka, baka mariknam nga uray no sadino ti papanam, posible a maulit manen dayta. Gapu iti dayta a kinaranggas ken iti saan a nasayaat a pannakatrato dagiti babbai, mabalin a mapanunot ti kaaduan a saan a napateg dagiti babbai. Ngem talaga kadi a saan a napateg iti Dios dagiti babbai?

 Teksto: ‘Pinarsua ida ti Dios a lalaki ken babai.’—Genesis 1:27.

 Kaipapananna: Pinarsua ti Dios ti lalaki ken babai. Para kenkuana, agpada a maikarida a marespeto. Kasta met, namnamaenna nga ‘ayaten ti asawa a lalaki ti asawana a babai a kas iti panagayatna iti bagina,’ ken saanna a padasen a kontrolen babaen ti nasakit a panagsasao wenno panangkabil. (Efeso 5:33; Colosas 3:19) Nalawag ngarud a kayat ti Dios a maprotektaran dagiti babbai.

 “Idi ubingak, minolestiadak dagiti kabagiak. Idi agtawenakon iti 17, binutbutengnak ti amok nga ikkatennak iti trabaho no saanak a makiseks kenkuana. Idi adultoakon, tinagibassit ken ininsultonak ti asawak, dagiti nagannakko, ken dagiti kaarrubak. Ngem idi kuan, naam-ammok ti Namarsua a ni Jehova. b Trattratuenna dagiti babbai nga addaan respeto. Gapu iti dayta, nariknak nga ay-ayatennak ken napategak kenkuana.”—Maria, Argentina.

 Teksto: “Adda gayyem a nadekdekket ngem iti kabsat.”—Proverbio 18:24.

 Kaipapananna: Suportarannaka ti pudno a gayyem. No panagkunam ket makatulong kenka, ibagam ti marikriknam iti maysa a pagtaltalkam.

 “Duapulo a tawen nga awan ti nangibagbagaak a namolestiaak. Isu a dimmakkelak a saan a naragsak, madandanagan, ken madepdepres. Ngem idi imbagak ti napasamak kaniak iti maysa a gayyem a nakasagana a dumngeg, permi a nabang-aranak.”—Elif, Türkiye.

 Teksto: “Ipalladawyo [iti Dios] ti amin a pakadanaganyo, ta ipatpategnakayo.”—1 Pedro 5:7.

 Kaipapananna: Talaga a denggennaka ti Dios no agkararagka. (Salmo 55:22; 65:2) Gapu ta ipatpategnaka, tulongannaka tapno mariknam a talaga a napategka.

 “Idi naam-ammok ni Jehova, in-inut nga immimbag dagiti nauuneg a sugatko. Ita, maibagakon iti Dios ti amin a marikriknak babaen ti kararag. Isu ket kas iti maysa a gayyem a talaga a makaawat iti marikriknak.”—Ana, Belize.

 Teksto: ‘Ipakatto ni Jehova ti hustisia kadagiti mairurrurumen ken awanan ama, tapno awanen ti tao a mangbutbuteng kadakuada.’—Salmo 10:​17, 18.

 Kaipapananna: Dandanin pukawen ti Dios ti amin a di kinahustisia, agraman ti pannakaranggas ken pannakairurumen dagiti babbai.

 “Kasla naagasan ti pusok idi naammuak a dandanin pagpatinggaen ni Jehova ti saan a nasayaat a pannakatrato dagiti babbai ken ubbing. Naaddaanak iti talna ti panunot.”—Roberta, Mexico.

 Tapno maammuam ti ad-adu pay no kasano a mangted ti Biblia iti namnama, no apay a mapagtalkam dagiti karina, ken no kasano a tumultulong dagiti Saksi ni Jehova babaen ti Biblia, ag-request-ka nga adda mangbisita kenka.

 I-download ti mayimprenta a bersion daytoy nga artikulo.