Idi Mayo 23, 2023, maysa a nangato a health official iti United States ti nangpakdaar iti publiko a madi ti epekto ti social media iti adu nga agtutubo.

•   “Adda met ketdi maitulong ti social media iti dadduma nga ubbing ken tin-edyer, ngem adu met dagiti ebidensia a mangipakita a dakkel ti maited a pagdaksan ti social media iti pisikal ken mental a salun-at dagiti ubbing ken tin-edyer.”—Social Media and Youth Mental Health: The U.S. Surgeon General’s Advisory, 2023.

 Sigun iti dayta nga advisory, adda dagiti panagadal a mangipakita a masapul a maikkan dayta iti atension.

•   Dagiti agtutubo nga agedad iti 12 agingga iti 15 nga “agus-usar iti social media iti nasurok a 3 nga oras kada aldaw ket doble ti posibilidadna nga agproblemada iti mental a salun-at agraman dagiti sintoma ti depresion ken panagdandanag.”

•   Kadagiti agedad iti 14, “no ad-adu nga oras nga ag-social media-da, kaaduanna a kurang ti turogda, ma-bully-da online, naalas ken nababa ti panagkitada iti bagida, ken madepresda. Ket nangatngato ti tsansa a mapasamak dayta kadagiti babbai ngem kadagiti lallaki.”

 Kasano a maprotektaran dagiti nagannak dagiti annakda kadagita a pagdaksan? Mangipaay ti Biblia kadagiti praktikal a suhestion.

 Dim baybay-an ti anakmo. Kas nagannak, panunotem dagiti peggad ken agdesisionka no masapul nga agusar ti anakmo iti social media wenno saan.

•   Prinsipio ti Biblia: “Sanayem ti ubing iti dalan a rumbeng a papananna.”—Proverbio 22:6.

•   Tapno ad-adu pay ti maammuam, basaem ti artikulo nga “Okey Laeng Kadi nga Agusar ti Anakko iti Social Media?”

 No palubosam ti anakmo nga agusar iti social media, alertoka koma kadagiti posible a peggad. Kanayonmo met nga itsek dagiti ar-aramidenna online. Kasano?

 Protektaram ti anakmo kadagiti delikado a content. Sanayem ti anakmo a mangilasin ken mangliklik kadagiti delikado a content wenno linaon ti social media.

•   Prinsipio ti Biblia: “Saan man la koma a madakamat iti tengngayo ti seksual nga immoralidad ken ti tunggal kita ti kinarugit wenno kinaagum . . . uray ti nakababain nga aramid wenno minamaag a panagsasao wenno naalas a panagang-angaw.”—Efeso 5:3, 4.

•   Para kadagiti makatulong a tip, basaem ti artikulo nga “Isuroyo ti Tin-edyeryo iti Naannad a Panagusar iti Social Media.”

 Mangaramidka kadagiti limitasion. Kas pagarigan, ibagam iti anakmo no kaano ken kasano kapaut a mabalin nga agusar iti social media.

•   Prinsipio ti Biblia: “Itultuloyyo ti agannad a naimbag a ti pannagnayo . . . ket kas kadagiti masirib, nga usarenyo ti tiempoyo iti kasayaatan a pamay-an.”—Efeso 5:15, 16.

•   Usarem ti whiteboard animation nga Agannadka no Agusarka iti Social Network tapno maipaawatmo iti anakmo no apay a masapul nga adda limitasionna iti social media.