Idi nagpatingga ti Gubat Sangalubongan II idi 1945, nadadael ti adu a paset ti Germany. Nadadael dagiti siudad, saanen a nausar dagiti eskuelaan ken ospital, ken agkaiwara dagiti saan a bimtak a bomba. Bassit met ti suplay ti makan, isu a ngimmato ti presio dagiti gagatangen. Kas pagarigan, iti black market, ti media kilo a butter ket katupag ti innem a lawas a sueldo!

 Karaman kadagiti naapektaran ket ti ginasut a Saksi ni Jehova a naikulong iti adu a tawen kadagiti pagbaludan ken kampo konsentrasion gapu iti pammatida. Idi 1945, nawayawayaanda a ti laeng tugotda ket ti badoda kas balud. Napukaw ti dadduma a Saksi dagiti sanikuada. Adu ti nakaro ti bisinda nga urayda la natalimudaw bayat dagiti Nakristianuan a gimong.

 Dagus a timmulong dagiti Saksi ni Jehova iti dadduma a pagilian tapno ipaayanda dagitoy a kakabsat iti makan ken bado. Dagiti kakabsat iti sangalubongan a hedkuarter iti United States kiniddawda iti sanga nga opisina iti Bern, Switzerland, a tumulong kadagiti kakabsat iti Germany. Ni Nathan H. Knorr, a pannakabagi ti hedkuarter, binisitana ti Europe tapno maorganisar ken mapapartak ti panangsaranay.

 Sipaparabur a nangted dagiti Saksi iti Switzerland iti makan, bado, ken kuarta. Umuna a naipatulod dagita a donasion idiay Bern, a sadiay a napaglalasin ken nayempake dagita sakbay a naipatulod idiay Germany. Dagiti Saksi iti dadduma a pagilian, a pakairamanan ti Sweden, Canada, ken ti United States, ket timmulong met iti panangsaranay. Saan laeng a dagiti adipen ni Jehova idiay Germany ti nagunggonaan no di pay ket dagiti kakabsat iti adu a pagilian a dinadael ti gubat iti Europe ken Asia.

 Iti uneg ti sumagmamano a bulan, nangipatulod ti sangay ti Switzerland iti kape, gatas, asukar, cereal, napakebbet a prutas, natnateng ken de lata a karne ken ikan. Adda met dagiti naidonar a kuarta.

 Nangipatulod met dagiti Saksi iti Switzerland iti lima a tonelada a bado, a pakairamanan dagiti naimeng a lupot ken bado a pangbabai ken panglalaki. Kinuna ti Enero 15, 1946 a ruar ti The Watchtower: “Ti inted dagiti kakabsat ket dagiti kasayaatan, saan a dagiti nagum-umaanda. Impakitada ti pudno a sakripisio kadagiti kakabsatda idiay Germany.”

 Nagdonar met dagiti Saksi iti Switzerland iti dandani 1,000 a paris ti sapatos, a nasigurado a saan a depektibo sakbay a naipatulod. Nasdaaw dagiti kakabsat iti Wiesbaden, Germany, ta dekalidad ken nagduduma dagita. “Awan ti aniaman a paglakuan ti bado iti Germany nga addaan iti kasta a dekalidad a produkto,” insurat ti maysa a Saksi.

 Nagtultuloy ti pannakaipatulod dagiti donasion agingga idi Agosto 1948. Agdagup iti 444 a kahon dagiti relief goods, nga agdagsen iti 25 a tonelada, ti impatulod dagiti Saksi iti Switzerland kadagiti kakabsatda idiay Germany. Kas nadakamaten, saan la a dagiti Saksi iti Switzerland ti timmulong iti daytoy a panangsaranay. Karamanda kadagiti kabassitan a grupo a timmulong. Addaan laeng idi ti Switzerland iti 1,600 a Saksi!

 Imbaga ni Jesu-Kristo: “Maammuanto ti amin a dakayo dagiti adalak​—no agiinnayatkayo.” (Juan 13:34, 35) Ayat ti mangtigtignay iti ili ni Jehova a mangipaay iti kasayaatanda, saan nga iti sobsobrada. (2 Corinto 8:1-4) Kuna ti maysa a surat manipud Zurich: “Adu a kakabsat ti agkasapulan met. Ngem kayatda latta ti tumulong isu a nangtedda iti kuarta ken uray iti card-da a pangala iti rasion.”

 Dagus a nakabangon dagiti adipen ni Jehova idiay Germany manipud iti pannakaidadanes ken iti epekto ti gubat. Ti maysa a rason ket ti nakaur-urnos ken nakaad-adu a tulong nga impaay dagiti kapammatianda a nangipakita iti pudpudno a managsakripisio nga ayat.