Nasurok a sangapulo a tawenen a maus-usar dagiti literature cart iti ministerio tapno maala ti atension dagiti tattao. Iti intero a lubong, nalaka a makita dagita ken pamiliar dagiti tattao no asino ti makinkukua kadagita. Saan la a napintas dagiti disenioda no di ket nalakada met nga usaren. Mabalin nga umanamongka iti imbaga ni sister Asenata a taga-Poland: “Simple ti disenio dagiti cart ngem napintas. Nalakada met nga ipuesto ken iyakar.”

 Napanunotmo kadin no kasano a nadisenio ken naaramid dagiti cart?

 Idi 2001, inaprobaran ti Bagi a Manarawidwid a padasen dagiti kakabsattayo idiay France dagiti sabali a pamay-an ti public witnessing a pakairamanan ti panagusar kadagiti cart. Adu a disenio ti pinadasda. Kas pagarigan, nagusarda kadagiti maleta ken trolley a pang-grocery a pagidispleyan ken pagidulinan kadagiti literatura. Idi agangay, nangpili ti sangay ti France iti maysa a disenio nga inusar dagiti kakabsat iti adu a tawen.

 Napalalo ti ragsak dagiti kakabsat idiay France iti resulta ti panangirugida iti dayta a pamay-an ti public witnessing. Isu nga idi 2011, inaprobaran ti Bagi a Manarawidwid a marugian ti programa a public witnessing idiay New York City, U.S.A., nga agusar kadagiti cart ken lamisaan. Di nagbayag, nakita dagiti payunir a nakiraman iti programa nga adu ti pagsayaatan dagiti cart a pakairamanan ti nalaka a pannakayakarna. Nangipaay met dagiti payunir kadagiti suhestion no kasano a mas mapasayaat pay ti disenio ti cart. Dagiti immun-una a kayo a cart ket nadagsen ken narigat nga ibaba ken ingato kadagiti agdan. Isu a nabalbaliwan ti disenioda tapno nalaglag-an, ngem saan met a nakalaglag-an unay nga uray la matumba no agangin. Naikkan met ti baro a disenio iti daddadakkel ken nalaglagda a pilid tapno nalaklaka a guyoden dagita iti saan a sementado a dalan. Kasta met, adda naikabil a pagikabilan kadagiti reserba a literatura.

 Nagsayaat ti resulta dagita nga immuna a panangpadas! Isu nga idi 2012, inaprobaran ti Bagi a Manarawidwid a mausar dagiti literature cart iti intero a lubong. Adda nabirokan dagiti kakabsat a manufacturer a makaaramid iti adu a cart nga agusar iti nalag-an ngem nalagda a materiales.

 Kadagiti napalabas a tawen, adda naaramid a bassit a panagbalbaliw tapno mapasayaat dagiti cart. Kas pagarigan, idi 2015, naikkan dayta iti clear a plastic cover tapno saan a matuduan. Naapresiar dayta ni Dina a taga-Georgia. Imbagana, “Adda ‘kapote’ ti cart tapno saan a mabasa dagiti publikasion.” Idi 2017, addan dagiti magnetic poster iti sumagmamano a lengguahe. Imbaga ni Tomasz, a maysa a brother a taga-Poland: “Nagrigat a sukatan dagiti naipigket a poster isu a nagmayat a solusion dagiti magnetic poster.” Idi 2019, ad-adu pay a panagbalbaliw ti naaramid kadagiti material ken iti panagaramid kadagiti cart tapno mas nalaglagda dagita.

 Maymaysa laeng a manufacturer ti agar-aramid kadagiti cart ken maipatpatulod dagita kadagiti kongregasion iti intero a lubong. Iti agdama, ti presio ti maysa a cart ket $43 U.S. Saan pay a karaman ti bayad ti pannakaipatulodna ken ti dadduma a gastos. Ita, nasuroken a $16 milion U.S. ti nagastos para kadagiti cart, ken nasurok a 420,000 ti naipatuloden kadagiti kongregasion iti intero a lubong.

 Tapno mausar a naimbag dagiti donasion, gulpientayo ti agorder kadagiti literature cart. Kasta met, mabalin nga agorder dagiti kongregasion kadagiti pasetna ken tarimaanenda dagiti cart imbes a masukatan dagita.

 Maragragsakan dagiti kakabsat iti intero a lubong nga agusar kadagiti literature cart. Imbaga ni Martina a taga-Ghana: “Kaaduan a pamay-an ti panangasabatayo ket datayo ti umasideg kadagiti tattao. Ti magusgustuak iti cart witnessing ket dagiti tattao ti umasideg kadatayo. Makasabaan met uray dagiti lumablabas.”

 Iti maysa a pagilian idiay Africa, immasideg ti maysa a lalaki iti cart ken nangala kadagiti publikasion iti lengguahena. Kalpasan ti makalawas, nagsubli ket imbagana: “Nabasakon ti amin nga innalak. Nagpateg dagiti linaonna. Iyestoriakto dagiti nabasak kadagiti kapamiliak idiay bariomi,” nga agarup 500 a kilometro (311 mi) ti kaadayona. Kalpasan ti dua a bulan, nagsubli ket imbagana: “Nabasan dagiti kalugarak ti amin a publikasion nga innalak ket maragragsakanda iti nabasada. Kayatda ti agbalin a Saksi ni Jehova. Ngem adu ti saludsodda. Kas pagarigan, naawatanda a masapul a maitanebda iti danum no mabautisaranda. Ngem awan ti karayan nga asideg iti lugarmi. Masapul kadi nga umaykami ditoy tapno mabautisarankami?” In-refer ti kakabsat daytoy a lalaki iti maysa a payunir nga agsasao iti lengguahena. Sipud idin, regularen ti panagadalda.

 Makaparagsak a makita a maus-usar dagiti literature cart tapno maikasaba ti naimbag a damag iti amin a nasion iti intero a daga. (Mateo 24:14) Pangal-alaantayo ti pagbayad kadagiti cart nga ipapaaramidtayo? Kadagiti donasion iti sangalubongan a trabahotayo, nga adu kadagita ti mait-ited babaen ti donate.dan124.com. Pagyamanan iti kinaparaburyo.