Maragragsakan ni Jehova a mangisuro iti ilina. Gapu iti dayta, nangipasdek ti organisasionna kadagiti eskuelaan a mangsanay kadagiti estudiante tapno maitungpalda dagiti asaynmentda. Maysa kadagita ket ti School for Kingdom Evangelizers (SKE). Iti nabiit pay a tawtawen, impaayan ti organisasion ti Dios iti atension saan laeng a ti kurikulum no di pay ket dagiti pasilidad a pakaangayan dagiti nateokratikuan nga eskuelaan. Ti kangrunaan a kalat ket tapno mapasayaat ti panagadal dagiti estudiante ken ti panangisuro dagiti instruktor. Kasano a makatulong dagiti donasionyo tapno maragpatmi dayta a kalat?

 Iti adu a tawen, maang-angay dagiti nateokratikuan nga eskuelaan kadagiti Kingdom Hall ken Assembly Hall. Apay ngarud nga iti nabiit ket nangibangon wenno nang-renovate-tayo kadagiti kanayonan a pasilidad a mausar laeng para kadagiti nateokratikuan nga eskuelaan? Kitaentayo ti tallo a rason.

 Dakdakkel a panagkasapulan. “Inreport dagiti sanga nga opisina nga adda dakkel a panagkasapulan iti tay-ak,” imbaga ni Christopher Mavor a katulongan ti Service Committee ti Bagi a Manarawidwid. “Kas pagarigan, idi 2019, natantia ti sangay iti Brazil a kasapulan ti agarup 7,600 a kanayonan a naggraduar iti SKE a mangasikaso iti kasapulan ti teritoria ti sangayda.” Inreport ti sangay iti United States nga adda dakkel a panagkasapulan kadagiti kualipikado a payunir a mabalin a mangsanay iti dadduma para iti special metropolitan public witnessing, harbor witnessing, ken prison witnessing. Kasapulan met dagiti brother nga agserbi iti Local Design/Construction Department ken iti Hospital Liaison Committee. Mabalin a dagita ti pakausaran dagiti naggraduar iti SKE.

 Umad-adu dagiti estudiante. Adu a sangay ti nakaawat iti ad-adu nga aplikasion ngem iti bilang dagiti mabalin nga agadal. Kas pagarigan, ti sangay iti Brazil ket nakaawat iti agarup 2,500 nga aplikasion para iti SKE iti maysa laeng a tawen. Ngem gapu ta kurang dagiti pasilidad a pakaangayan ti eskuelaan, 950 laeng nga estudiante ti mabalin nga awaten ti sangay.

 Nasayaat a pagdagusan. No ageskuela dagiti estudiante iti maysa a Kingdom Hall wenno Assembly Hall, kaaduanna a makidagusda iti balbalay dagiti kakabsat iti dayta a lugar. Mayat dayta nga urnos para kadagiti pagilian a sumagmamano la a klase ti nayeskediul iti kada tawen. Ngem kadagiti pagilian nga ad-adu a klase ti maang-angay, mabalin a saan a mapadagus dagiti kakabsat dagiti estudiante iti adu a bulan. Gapuna, adda dagiti naaramid a pasilidad nga asideg iti classroom ken nadisenio a para kadagiti estudiante.

 Ti pasilidad nga addaan iti maysa a classroom, kasta met iti pagdagusan dagiti instruktor ken ti agarup 30 nga estudiante a pakairamanan dagiti serbisio a kasapulanda, ket mabalin nga aggatad iti sumagmamano a milion a doliar (U.S.), depende iti lokasion ken dadduma pay a banag.

 Kaaduanna a maikabil dagiti eskuelaan iti naulimek a lugar nga adayo iti siudad ngem asideg iti transportasion. Mapili dagiti lugar nga adu ti agibumbunannag a makatulong kadagiti kasapulan ti eskuelaan ken iti panangmantener kadagiti building ken equipment.

 Addaan dagiti pasilidad kadagiti libraria, study area, computer, printer, ken dadduma pay nga equipment. Kaaduanna nga adda dining room a panganan dagiti estudiante ken instruktor. Adda met umdas nga espasio a pag-exercise-san ken pagrelaksanda.

 Naiplano met a naimbag dagiti classroom. “Nagkonsultakami iti Theocratic Schools Department tapno makaaramidkami kadagiti disenio ti classroom a makatulong para iti nasaysayaat a panagadal dagiti estudiante,” kuna ni Troy, nga agtrabtrabaho iti Worldwide Design/Construction Department iti Warwick, New York. “Nangtedda kadagiti guideline maipapan iti kadakkel ken disenio dagiti classroom, kasta met kadagiti kasapulan a silaw ken audio/video equipment.” Maipapan iti pannaka-install dagiti audio equipment, kuna ni Zoltán a maysa nga instruktor ti SKE idiay Hungary: “Idi damo, awan a pulos ti microphone-mi, isu a kaaduanna a palagipanmi dagiti estudiante a pigsaanda ti agsao. Ngem ita ta addan microphone iti tunggal lamisaan, awanen ti problemami!”

 Ania ti epekto dagiti napasayaat a pasilidad kadagiti instruktor ken estudiante? “Nakataltalna ti aglawlaw,” kuna ni Angela, nga immatender iti SKE iti Palm Coast, Florida, U.S.A. “Naiplano a naimbag ti amin, a pakairamanan dagiti classroom ken dagiti kuartomi tapno makapagpokuskami nga agadal ken agsursuro.” Magusgustuan ni Csaba, nga instruktor idiay Hungary, ti makisango a mangan kadagiti estudiante. Imbagana a kadagita a gundaway, “kaaduanna nga adu ti maestoria dagiti estudiante maipapan iti bagida ken kadagiti kapadasanda. Isu a mas maam-ammomi dagiti estudiante ket mas maibagaymi dagiti kurikulum kadagiti kasapulanda.”

 Ibilang dagiti estudiante ken instruktor dagiti napasayaat a pasilidad ti eskuelaan kas bendision manipud ken Jehova, ti ‘Naindaklan nga Instruktortayo.’ (Isaias 30:20, 21) Kastoy ti panangiladawan ti maysa a sister a taga-Pilipinas nga immatender iti SKE iti maysa a pasilidad a napagbalin nga eskuelaan: “Ipalagip ti disenio ti eskuelaan a saankami la a basta estudiante no di ket espesial a bisita ni Jehova. Kayatna nga ag-enjoy-kami bayat nga ad-adalenmi a naimbag ti Saona.”

 Mabalin a maipatakder, ma-renovate, ken mamantener dagiti pasilidad ti eskuelaan gapu kadagiti donasionyo, nga adu kadagita ket mait-ited babaen ti donate.dan124.com. Pagyamanan unay iti kinaparaburyo.