“Aniaman ti ar-aramidenyo, aramidenyo dayta iti amin a kararua para ken Jehova, ket saan a para iti tattao.”—Colosas 3:23, Baro a Lubong a Patarus.

 “Aniaman nga aramidenyo, ipapusoyo a kasla maipaay iti Apo, a saan a kadagiti tattao.”—Colosas 3:23, Ti Baro a Naimbag a Damag Biblia.

 Masapul nga ikagumaan ti maysa a Kristiano ti agbalin a nagaget a trabahador ta ti kababalinna iti trabaho ket konektado iti panagdaydayawna ken Jehova a Dios.

 “Aniaman ti ar-aramidenyo.” Dagidiay mayat nga agdayaw ken Jehova ikagumaanda a suroten ti kuna ti Biblia maipapan iti amin nga aramidenda. Ikagumaanda ti agbalin a nagaget, napudno, ken mapagtalkan kadagiti inaldaw nga ar-aramidenda iti pagtaengan, pagtrabahuan, ken eskuelaan.—Proverbio 11:13; Roma 12:11; Hebreo 13:18.

 “Ipapusoyo.” Ti sao nga “ipapusoyo” ket manipud iti Griego a sasao a “mangiladawan iti determinasion ti maysa a tao a mangaramid wenno mangitungpal iti pagayatan ti Dios iti amin a pigsana.” a

 Gapuna, ti kasta a trabahador usarenna ti amin a pigsana ken abilidadna nga agpanunot tapno maitedna ti kasayaatanna a mangaramid iti maysa a trabaho. Ti dadduma a bersion ti Biblia impatarusda dayta a sao kas “iti amin a puso.”—Kitaem “Ti  Colosas 3:23 iti Dadduma Pay a Patarus.”

 “Para ken Jehova, ket saan a para iti tattao.” Aniaman a trabaho ti ar-aramiden dagiti Kristiano, seriosoda iti dayta ta bigbigenda a maapektaranna ti relasionda ken Jehova a Dios. Kangrunaanna nga interesadoda a mangparagsak kenkuana, imbes nga iti amoda wenno iti asinoman a tao. No nagaget ken positibo ti maysa a Kristiano, nasayaat ti reputasionna ken maidaydayaw ti Dios a pagserserbianna. No kasta ti ar-aramiden ti maysa a Kristiano, “saan[na] a pulos maumsi ti nagan ti Dios.”—1 Timoteo 6:1; Colosas 3:22.

 Ti Colosas a libro ti Biblia ket insurat ni apostol Pablo para kadagiti Kristiano iti nagkauna a siudad ti Colosas. b Mabalin nga insuratna dayta iti ngudo ti umuna a pannakaibaludna idiay Roma, idi agarup 60-61 C.E.

 Naglaon dayta a surat iti balakad a tumulong kadagiti Kristiano aniaman ti nalikudan ken kasasaadda tapno agkaykaysa nga agdayawda iti Dios. (Colosas 3:11) Naiparegta a tuladenda dagiti kualidad ti Dios, kas iti ayat, kinaimbag, ken asi. (Colosas 3:12-14) Ilawlawag met dayta no kasano a ti panagdaydayaw ti maysa a tao iti Dios apektaranna ti tunggal aspeto ti biagna.—Colosas 3:18–4:1.

 “Dagup ti aramidenyo, aramidenyo a napusoan, a cas la maipaay iti Apo, ket saan a maipaay cadagiti tattao.”—Ti Biblia.

 “Ken aniaman nga aramidenyo, aramidenyo a naimpusuan, para iti Apo, saan a para iti tattao.”—King James Version.

Buyaem daytoy ababa a video tapno makitam ti pakabuklan ti libro a Colosas.