“Ibatik kadakayo ti talna nga itedko ngem saan a kas iti talna nga ited ti lubong. Saankayo a mariribukan wenno agbuteng.”—Juan 14:27, Baro a Lubong a Patarus.

 “Ti talna ibatic cadacayo, ti talnac itdec cadacayo: saan a cas iti panangited ti lubong ti panangitedco cadacayo. Saan coma nga agpulcoc ti pusoyo ken di agbuteng.”—Juan 14:27, Ti Biblia.

 Naimpusuan nga impasigurado ni Jesus kadagiti apostolna babaen kadagitoy a sasao a saanda a masapul nga agdanag unay no maipasangoda iti narigat a kasasaad. Kas kenkuana, mapagtalinaedda ti talna ti panunot iti tulong ti Dios.

 Ania a kita ti talna ti imbati wenno inted ni Jesus kadagiti apostolna? Inted ni Jesus ti talna nga adda kenkuana, kayatna a sawen, ti talna a marikriknana. Daytoy a talna dina kaipapanan nga awan ti riribuk wenno pakarigatan. (Juan 15:20; 16:33) Uray no napadasan ni Jesus ti di kinahustisia a nagresulta iti pannakapapatayna, natalna latta ti panunot ken pusona. (Lucas 23:27, 28, 32-34; 1 Pedro 2:23) Nariknana ti kasta a talna ta ammona nga ay-ayaten ken ap-aprobaran isuna ti Amana, ni Jehova. a—Mateo 3:16, 17.

 Inted ni Jesus kadagiti apostolna ti talna babaen ti panangipasiguradona kadakuada nga ay-ayaten ken ap-aprobaranna ida, ket kasta met laeng ti marikrikna ti Amana kadakuada. (Juan 14:23; 15:9, 10; Roma 5:1) Daytoy a talna, a naibase iti pammatida ken Jesus kas Anak ti Dios, ti nakatulong kadakuada nga agtalinaed a kalmado ken saan a madanagan. (Juan 14:1) Uray no saandanton a kadua ni Jesus ditoy daga, inkarina kadakuada a tulongan ida ti nasantuan nga espiritu ti Dios tapno maaddaanda iti kompiansa ken talna ti panunot. (Juan 14:25-27) Kabaelan dagiti pasurot ni Jesus a situtured a sanguen dagiti narigat a situasion ta ammoda nga adda kadakuada ti anamong ken suporta ni Jehova.—Hebreo 13:6.

 Idi adda ni Jesus ditoy daga, kaugalian dagiti tattao nga iraman iti kablaawda a maaddaanda koma iti talna. (Mateo 10:12, 13) Ngem saan la a tartarigagayan ni Jesus a maaddaan dagiti apostolna iti talna, inikkanna ida iti talna. Kasta met, ti talna nga inted ni Jesus kadakuada ket naiduma iti talna a mabalin a maited ti lubong. b Uray kaskasano adda met talna a maited ti lubong babaen ti nasayaat a relasion, kinabaknang, kinapopular, wenno posision. Ngem ti talna nga ited ni Jesus ket saan a nakadepende kadagiti situasion iti biag. Manayon dayta a talna.

 Imbaga ni Jesus dagitoy a sasao kadagiti matalek nga apostolna iti rabii sakbay ti ipapatayna. Iti dayta a rabii, imbagana kadakuada a dandanina idan panawan. (Juan 13:33, 36) Gapu iti dayta, naladingitan unay dagiti apostolna. (Juan 16:6) Isu a liniwliwa ida ni Jesus, ken inlawlawagna a saanda a pakadanagan ti ipapanawna.

 Makaparegta met kadagiti Kristiano ita dagiti sasao ni Jesus. Maaddaantayo met iti talna. (2 Tesalonica 3:16) No agbalintayo nga adalan ni Jesus, masursurotayo nga ipatpateg ken ap-aprobarannatayo ni Jesus ken ti Amana, a ni Jehova. (Colosas 3:15; 1 Juan 4:16) Gapu iti dayta, saantayo unay a madanagan. Apay? Gapu ta kaduatayo ti Dios.—Salmo 118:6; Filipos 4:6, 7; 2 Pedro 1:2.

 Buyaem daytoy ababa a video tapno makitam ti pakabuklan ti libro a Juan.