Adda laeng iti balay ti anakmo nga awan ti ar-aramidenna. Imbagana, “Mabor-boring-ak!” Sakbay a pagbuyaem iti TV wenno pagay-ayamem iti paboritona a video game, panunotem dagitoy.

•   Ad-adda a ma-boring ti ubing no napaut nga agbuya wenno agay-ayam iti video game. Imbaga ti maysa nga ama a ni Robert: “Kaykayat ti dadduma nga ubbing ti agbuya iti TV wenno agay-ayam iti video game. Ma-boring-da iti dadduma nga aktibidad.”

   Umanamong ti baketna a ni Barbara. Imbagana: “Iti biag, masapul nga agpanunot ken agtrabahoka ken saanmo a dagus a makita dagiti resulta. Maka-boring dayta kadagiti ubbing no nasanayda nga agbuya iti TV wenno agay-ayam iti video game.”

•   No kanayon nga aglukat ti ubing iti social media, maikomparana ti situasionna iti sabali ket malidayan laeng. No makitkita ti ubing ti ar-aramiden dagiti gagayyemna, ad-adda a mariknana a boring ti biagna. Imbaga ti ubing nga agnagan Beth, “Panunotek a dagus, ‘Imbag pay ti dadduma ta agen-enjoy-da. Siak, addaak lang iti balay.’”

   Uray mano nga oras nga agbabad ti maysa iti social media, mabalin a naliday ken ma-boring latta. “Agpayso nga adda ar-aramidem, ngem awan unay ti maitulongna kenka,” kuna ti barito a ni Chris.

•   No mabor-boring ti ubing, makapanunot iti mabalinna nga aramiden. Kuna ti maysa nga ina a ni Katherine a no mabor-boring dagiti ubbing, tsansada dayta nga agpanunot iti mabalinda nga aramiden. Kas pagarigan, kunana: “Aramidenda ti simple a box a time capsule, lugan, bangka, wenno spaceship. Abbonganda ti maysa a furniture iti ules tapno agbalin a tent.”

   Nagsayaat daytoy a panangiladawan ti maysa a psychologist a ni Sherry Turkle, “No mabor-boring-ka, tsansam dayta a pagandaren ti imahinasionmo.” a Isu nga adda met pagsayaatanna no ma-boring-ka. Kinapudnona, imbaga ti libro a Disconnected: “No agbagkatka, pumigsa ti maselmo, no ma-boring-ka, agandar ti utekmo.”

 Tandaanam: No ma-boring dagiti annakmo saan a problema dayta, tulongam ketdi ida nga agbalin a creative.

•   No posible, pagay-ayamem ida iti ruar. Kuna ni Barbara, a nadakamat iti rugi: “Makatulong no mainitan ken makalang-ab iti presko nga angin ti anakmo tapno saan a ma-boring. No agay-ay-ayam iti ruar dagiti annakmi, adu ti ma-imagine-da!”

   Prinsipio ti Biblia: “Adda tiempo ti tunggal banag, . . . tiempo ti panagkatawa [ken] tiempo ti panaglagto.”—Eclesiastes 3:1, 4, footnote.

   Panunotem: Ania dagiti gundaway a mabalin nga agay-ayam dagiti annakko iti ruar? No saan a posible a makaay-ayamda iti ruar, ania dagiti mabalinda nga aramiden tapno makaay-ayamda iti uneg ti balay?

•   Tulongam dagiti annakmo a mangpanunot iti situasion ti dadduma. Imbaga ti maysa nga ina a ni Lillian: “Tulongam ti nataenganen a gayyemmo nga agiruot iti arubayanna wenno agwalis kadagiti bulong wenno ilutuam ken bisitaem. Naragsakka no tumultulongka iti dadduma.”

   Prinsipio ti Biblia: “Rumang-ayto ti naparabur a tao, ken mabang-aranto ti asinoman a mangbang-ar iti sabsabali.”—Proverbio 11:25.

   Panunotem: Kasanom a tulongan ti anakmo tapno naragsak a tumulong iti dadduma?

•   Mangipakitaka iti nasayaat a pagtuladan. Dagiti iyes-estoriam nga ar-aramidem iti inaldaw ket adda epektona iti annakmo. Imbaga ti maysa nga ina a ni Sarah: “No ti panagestoriami ket kasla saankami nga agen-enjoy a mangaramid kadagiti trabahomi, kasla sursuruanmi dagiti annakmi a ma-boring. Ngem no naragsakkami nga agestoria, tultulonganmi dagiti annakmi nga ag-enjoy nga agtrabaho.”

   Prinsipio ti Biblia: “Inaldaw nga agpiesta daydiay naragsak ti pusona.”—Proverbio 15:15.

   Panunotem: No iyes-estoriak kadagiti annakko dagiti trabahok iti inaldaw, mariknada kadi nga agen-enjoy-ak wenno saan? No mabor-boring-ak, ania ti makitkitada a reaksionko?

 Tip: Tulongam dagiti annakmo a mangdiskobre kadagiti mabalinda nga aramiden. Imbaga ti maysa nga ina a ni Allison, “Adda suggestion box iti balaymi. No adda mapanunotmi a mabalinmi nga aramiden itinnagmi laeng idiay.”