Ti antikristo ket saan laeng a maymaysa a tao wenno grupo, ta kuna ti Biblia nga ‘adu ti antikristo.’ (1 Juan 2:18) Imbes ketdi, ti termino nga “antikristo,” a nagtaud iti Griego a sao a ti kaipapananna “maibusor ken (wenno imbes a ni) Kristo,” tukoyenna ti aniaman kadagiti sumaganad:

•   Di umanamong a ni Jesus ti Kristo (Mesias) wenno di umannugot nga isu ket Anak ti Dios.—1 Juan 2:22.

•   Bumusbusor iti Kristo, a Pinulotan ti Dios.—Salmo 2:1, 2; Lucas 11:23.

•   Agpampammarang nga isu ti Kristo.—Mateo 24:24.

•   Mangidaddadanes kadagiti pasurot ni Kristo, gapu ta ibilang ni Jesus a maar-aramid kenkuana dagiti banag a maaramid kadakuada.—Aramid 9:5.

•   Agkunkuna a Kristiano ngem agar-aramid iti kinakillo wenno panangallilaw.—Mateo 7:22, 23; 2 Corinto 11:13.

 Saan laeng a dakamaten ti Biblia dagiti indibidual a mangar-aramid kadagita kas antikristo, no di ket tukoyenna met ida kas grupo a “ti antikristo.” (2 Juan 7) Immuna a nagparang ti antikristo idi panawen dagiti apostol ken nagtultuloyda sipud idin. Impadto ti Biblia a kasta ti mapasamak.—1 Juan 4:3.

•   Itantandudoda dagiti palso a sursuro mainaig ken Jesus. (Mateo 24:9, 11) Kas pagarigan, dagidiay mangisursuro iti Trinidad wenno ni Jesus ti Mannakabalin-amin a Dios konkontraenda ti pannursuro ni Jesus a nangikuna: “Ti Ama dakdakkel ngem siak.”—Juan 14:28.

•   Laksiden dagiti antikristo ti kinuna ni Jesus maipapan iti panagtignay ti Pagarian ti Dios. Kas pagarigan, kuna ti dadduma a lider ti relihion nga us-usaren ni Kristo dagiti gobierno ti tao. Ngem dayta a pannursuro kontraenna ni Jesus, a nangibaga: “Ti pagariak saan a paset daytoy a lubong.”—Juan 18:36.

•   Kunada nga Apoda ni Jesus, ngem saanda met a tungtungpalen dagiti bilinna, a pakairamanan ti panangikasaba iti naimbag a damag ti Pagarian.—Mateo 28:19, 20; Lucas 6:46; Aramid 10:42.