Ni Maria Kadi ti Ina ti Dios?

I-PLAY

Sungbat ti Biblia

Saan. Saan nga isuro ti Biblia a ni Maria ti ina ti Dios. Saanna met nga ibaga a masapul a dayawen dagiti Kristiano ni Maria. a Panunotem:

Saan a pulos nga imbaga ni Maria nga isu ti ina ti Dios. Ilawlawag ti Biblia nga inyanakna ti “Anak ti Kangatuan” wenno “Anak ti Dios,” saan a ti mismo a Dios.—Lucas 1:32, 35.
Saan a pulos nga imbaga ni Jesu-Kristo a ni Maria ti ina ti Dios wenno isu ket maikari iti espesial a debosion. Kinapudnona, inlintegna ti babai a nangpadayaw iti papel ni Maria kas inana. Imbagana: “Saan, imbes ketdi, Naragsak dagidiay dumdumngeg iti sao ti Dios ken mangsalsalimetmet iti dayta!”—Lucas 11:27, 28.
Awan iti Biblia dagiti termino nga “Ina ti Dios” ken “Theotokos” (Nangyanak iti Dios).
Ti sasao a “Reyna ti Langlangit” iti Biblia ket saan a tumukoy ken Maria, no di ket iti ulbod a dios a dinaydayaw dagiti apostata nga Israelita. (Jeremias 44:15-19) Ti “Reyna ti Langlangit” ket mabalin a ni Ishtar (Astarte), maysa a dios dagiti taga-Babilonia.
Saan nga indaydayaw dagiti nagkauna a Kristiano ni Maria wenno impaayan iti espesial a pammadayaw. Kuna ti maysa a historiador a dagiti nagkauna a Kristiano “mabalin a saanda nga inawat dagiti kulto ken maamakda a mapagsuspetsaan nga agdaydayawda iti didiosen no ipaayanda iti nalabes a pammadayaw ni Maria.”—In Quest of the Jewish Mary.
Kuna ti Biblia a datin nga adda ti Dios. (Salmo 90:1, 2; Isaias 40:28) Gapu ta awan ti nangrugianna, awan ngarud ti inana. Maysa pay, saan nga umanay ti Dios iti aanakan ni Maria ta nalawag nga ibaga ti Biblia nga uray ti langit saanna a malaon ti Dios.—1 Ar-ari 8:27.

Ni Maria—Ina ni Jesus saan nga “Ina ti Dios”

Nayanak a Judio ni Maria ken kaputotan ni Ari David. (Lucas 3:23-31) Inanamongan unay ti Dios gapu iti pammati ken debosionna. (Lucas 1:28) Isu ti pinili ti Dios nga agbalin nga ina ni Jesus. (Lucas 1:31, 35) Adda pay sabali nga annakda iti asawana a ni Jose.—Marcos 6:3.

Ipakita ti Biblia a nagbalin ni Maria nga adalan ni Jesus ngem bassit laeng nga impormasion ti nadakamat maipapan kenkuana.—Aramid 1:14.

Apay nga ibilang ti dadduma a ni Maria ti ina ti Dios?

Ti kaunaan nga ebidensia ti panagdaydayaw ken Maria ket idi maudi a paset ti 300’s C.E. Iti dayta a tiempo a nagbalin ti Romano Katoliko a relihion ti Estado iti Imperio ti Roma. Kas resultana, adu a dati a pagano ti nangibaga a Kristianodan. Inawat met ti simbaan ti sursuro a Trinidad a saan a naibatay iti Biblia.

Gapu iti doktrina a Trinidad, adu ti mangibagbaga a no ni Jesus ti Dios, ni Maria ngarud ti ina ti Dios. Idi 431 C.E., opisial nga improklamar ti maysa a konsilio ti simbaan iti Efeso a ni Maria ti “Ina ti Dios.” Kalpasan dayta a proklamasion, nagsaknap ti nalabes a panagdaydayaw ken Maria. Bayat a nakitipon iti simbaan dagiti pagano, in-inut a nasukatan iti imahen ken ladawan ni Birhen Maria dagiti diosda iti kinabunga a kas kada Artemis (Diana, kadagiti Romano) ken Isis.

Idi 432 C.E., imbilin ni Pope Sixtus III a maibangon ti maysa a simbaan kas pammadayaw iti “Ina ti Dios.” Masarakan dayta iti asideg ti immun-una a naibangon a templo kas pammadayaw ken Lucina, ti Romano a dios ti panaganak. Dineskribir daytoy ti maysa nga autor kas “manayon a simbolo ti panangawat ti Naindaklan nga Ina dagiti pagano a kulto iti kulto nga agdaydayaw ken Maria kalpasan ti pannakakomberte dagiti Romano iti Kristiano.—Mary—The Complete Resource.”

a Adda dagiti relihion a mangisursuro a ni Maria ti ina ti Dios. Aw-awaganda kas “Reyna ti Langlangit” wenno kas Theotokos, Griego a sao a kaipapananna, “Nangyanak iti Dios.”