Siasino Dagiti Mapan Idiay Langit?

I-PLAY

Sungbat ti Biblia

Adda laeng limitado a bilang dagiti pinili ti Dios a matalek a Kristiano a mapagungar idiay langit kalpasan ti ipapatayda. (1 Pedro 1:3, 4) No mapilida, masapul nga agtultuloy a nabileg ti pammatida ken nasayaat ti ar-aramidda kas Kristiano tapno saan a mapukaw ti namnamada nga agbiag idiay langit.—Efeso 5:5; Filipos 3:12-14.

Ania ti aramidenda idiay langit?

Makipagturayda ken Jesus kas ar-ari ken papadi iti 1,000 a tawen. (Apocalipsis 5:9, 10; 20:6) Isuda ti mangbukel iti “baro a langlangit,” wenno nailangitan a gobierno, a mangituray iti “baro a daga,” wenno kadagiti tattao ditoy daga. Tumulongto dagiti agturay idiay langit a mangisubli iti nalinteg a kasasaad ti tao—ti orihinal a panggep ti Dios.—Isaias 65:17; 2 Pedro 3:13.

Mano ti mapagungar idiay langit?

Kuna ti Biblia nga adda 144,000 a tattao a mapagungar idiay langit. (Apocalipsis 7:4) Iti sirmata a nairekord iti Apocalipsis 14:1-3, nakita ni apostol Juan ti “Kordero nga agtaktakder iti Bantay Sion, ket kaduana ti sangagasut uppat a pulo ket uppat a ribu.” Iti daytoy a sirmata, ti napagungar a ni Jesus ti irepresentar ti “Kordero.” (Juan 1:29; 1 Pedro 1:19) Irepresentar ti “Bantay Sion” ti naitan-ok a saad ni Jesus ken ti 144,000 a makipagturay kenkuana idiay langit.—Salmo 2:6; Hebreo 12:22.

Natukoy kas “bassit nga ipastoran” dagidiay “naayaban ken napili” a makipagturay ken Kristo iti Pagarian. (Apocalipsis 17:14; Lucas 12:32) Ipakita dayta a bassit ti bilangda no ikompara iti amin a karnero ni Jesus.—Juan 10:16.

Di umiso a kapanunotan maipapan kadagiti mapan idiay langit

Di umiso: Mapan idiay langit ti amin a nasingpet a tattao.

Umiso: Inkari ti Dios nga agbiag nga agnanayon ditoy daga ti kaaduan a nasingpet a tattao.—Salmo 37:11, 29, 34.

Kinuna ni Jesus: “Awan ti tao nga immuli sadi langit.” (Juan 3:13) Ibagbaga ngarud ni Jesus a dagiti nasingpet a tattao a natay sakbay ti panagbiagna ditoy daga, a kas kada Abraham, Moises, Job, ken David, ket saan a napan idiay langit. (Aramid 2:29, 34) Ngem addaanda iti namnama a mapagungar ditoy daga.—Job 14:13-15.
Ti panagungar idiay langit ket maawagan iti “umuna a panagungar.” (Apocalipsis 20:6) Ipakita dayta nga adda pay sabali a panagungar—ti panagungar ditoy daga.
Isursuro ti Biblia nga ‘awanton ti matay’ iti panagturay ti Pagarian ti Dios. (Apocalipsis 21:3, 4) Mapasamak ngarud dayta a kari ditoy daga ta awan ti ipapatay idiay langit.

Di umiso: Pilien ti maysa no idiay langit wenno ditoy daga ti papananna.

Umiso: Ti Dios ti mangpili no asino kadagiti matalek a Kristiano ti ikkanna iti “gunggona a panagpangato,” kayatna a sawen, ti namnama nga agbiag idiay langit. (Filipos 3:14) Dayta a pannakapili ket saan nga agdepende iti arapaap wenno kayat ti maysa.—Mateo 20:20-23.

Di umiso: Nababbaba dagiti addaan iti namnama nga agbiag nga agnanayon ditoy daga ta saanda a maikari a mapan idiay langit.

Umiso: Awagan ti Dios dagiti addaan iti namnama nga agbiag ditoy daga iti “ilik,” “dagidiay pinilik,” ken ‘dagidiay binendisionan ni Jehova.’ (Isaias 65:21-23) Maaddaandanto iti pribilehio a mangitungpal iti orihinal a panggep ti Dios para iti tao—ti perpekto nga agnanayon a biag iti paraiso a daga.—Genesis 1:28; Salmo 115:16; Isaias 45:18.

Di umiso: Simboliko, wenno saan a literal, ti 144,000 a nadakamat iti Apocalipsis.

Umiso: Addaan ti Apocalipsis kadagiti simboliko a numero, ngem literal ti dadduma a numero a linaonna. Kas pagarigan, tukoyenna ti maipapan iti “sangapulo ket dua a nagan ti sangapulo ket dua nga apostol ti Kordero.” (Apocalipsis 21:14) Kitaentayo ti pammaneknek no apay a masapul a panunotentayo a literal ti 144,000.

Ibaga ti Apocalipsis 7:4 ti “bilang dagidiay naselioan [wenno, sigurado nga agbiag idiay langit], sangagasut uppat a pulo ket uppat a ribu.” Kadagiti bersikulo nga asideg dayta a teksto, adda sabali a grupo a nadakamat: “maysa a dakkel a bunggoy, nga awan ti tao a nakabael a mangbilang.” Isalakanto met ti Dios uray ti “dakkel a bunggoy.” (Apocalipsis 7:9, 10) No simboliko ti 144,000, a tumukoyen iti grupo a di masigurado ti bilangna, awanen ti serserbina ti panangidilig, wenno panangikompara, kadagita a grupo. a

Kanayonanna, nailadawan ti 144,000 a ‘nagatang manipud iti sangatauan kas umuna a bungbunga.’ (Apocalipsis 14:4) Tumukoy ti sasao nga “umuna a bungbunga” iti maysa a bassit grupo dagiti napili a pannakabagi. Maitutop a mangiladawan dayta kadagidiay kadua ni Kristo nga agturay idiay langit a mangiturayto iti di mabilang a tattao ditoy daga.—Apocalipsis 5:10.

a Kasta met, insurat ni Professor Robert L. Thomas maipapan iti 144,000 a nadakamat iti Apocalipsis 7:4: “Dayta ket espesipiko a bilang a naiduma iti di masigurado a bilang a nadakamat iti 7:9. No maibilang a simboliko dayta, awan ti numero a mabalin nga ibilang a literal iti dayta a libro.”—Revelation 1-7: An Exegetical Commentary, panid 474.