Mangted ti Biblia kadatayo iti kasayaatan a pammagbaga iti panagaramid iti desision. Makatulong daytoy kadatayo a ‘manggun-od iti sirib ken pannakaawat.’ (Proverbio 4:5) No dadduma, ibagana kadatayo ti kasayaatan a desision. Ngem adda met gundaway a mangted iti balakad a makatulong kadatayo a mangaramid iti nasayaat a desision.

Iti daytoy nga artikulo

•  Dagiti tip a makatulong kenka a mangaramid iti nasayaat a desision

•  Masapul kadi a baliwak ti naaramidkon a desision?

•  Kasanon no nakaaramidak iti saan a nasayaat a desision a saankon a mabalbaliwan?

•   Saanka nga agap-apura nga agdesision. Ibaga ti Biblia: “Panunoten ti masirib ti tunggal addangna.” (Proverbio 14:15) No agap-apuraka nga agdesision, baka adda malipatam nga importante nga impormasion. Panunotem a naimbag dagiti pagpiliam.—1 Tesalonica 5:21.

•   Saanka nga agdesision a base laeng iti emosion wenno rikriknam. Ipakdaar ti Biblia a saantay a kanayon a mapagtalkan ti pusotayo. (Proverbio 28:26; Jeremias 17:9) Kas pagarigan, mabalin a saan a nasayaat ti desisiontayo no makapungpungtot, madepdepres, maup-upay, masursuron, wenno sobra ti bannogtayo.—Proverbio 24:10; 29:22.

•   Ikararagmo ti sirib. (Santiago 1:5) Maragsakan ti Dios a mangsungbat kadagiti kasta a kararag. Kas naayat nga Ama, saanna a kayat nga agproblema dagiti annakna. “Ni Jehova a mismo ti mangted iti sirib; rummuar iti ngiwatna ti pannakaammo ken pannakatarus.” a (Proverbio 2:6) Ipapaayna dayta a sirib kangrunaanna babaen ti Saona, ti Biblia.—2 Timoteo 3:16, 17.

•   Ag-research-ka. Tapno nasayaat ti panagdesisionmo, kasapulam ti mapagtalkan nga impormasion. Kuna ti Biblia, “dumngeg ti masirib ken agsursuro pay.” (Proverbio 1:5) Pakasarakam iti makatulong ken mapagtalkan nga impormasion?

   Umuna, ammuem ti ibaga ti Biblia maipapan iti saludsodmo. Gapu ta ammo ti Namarsua ti kasayaatan para kadatayo, adda iti Saona ti kasayaatan ken mapagtalkan a pammagbaga. (Salmo 25:12) No dadduma, nalawag nga ibaga ti Biblia ti masapul nga aramidentayo, mabalin a babaen kadagiti linteg wenno bilin. (Isaias 48:17, 18) Ngem kaaduanna, saan nga espesipiko nga ibaga ti Biblia ti aramidentayo. Imbes ketdi, mangipaay iti pammagbaga babaen kadagiti prinsipio. Makatulong dagitoy tapno makaaramidtayo iti nasayaat a desision, a mabalin a naiduma iti desision ti sabsabali. Tapno maammuam dagiti makatulong a sasao ti Biblia, ag-research-ka kadagiti naibatay-Biblia nga artikulo wenno publikasion, kas kadagiti libre a maala iti daytoy a website. b

   Para iti dadduma a desisionam, baka kasapulam a kitaen ti dadduma a mapagtalkan a paggapuan iti impormasion. Kas pagarigan, sakbay a gumatangka iti maysa a produkto—lalo no nangina—nasayaat no ag-research-ka maipapan iti dayta ken iti manufacturer-na, a pakairamanan ti warranty ken no kasano nga isubli no adda perdina. Siempre, siguraduem met no dayta a produkto ti eksakto a kasapulam.

   “Mapaay dagiti plano no awan ti panagsasarita,” kuna ti Biblia. (Proverbio 15:22) Isu a sakbay nga agdesisionka, agkonsultaka kadagiti mapagtalkan nga indibidual. Kas pagarigan, nasayaat nga agkonsultaka iti doktor sakbay nga agdesisionka maipapan iti salun-atmo. (Mateo 9:12) No dadduma, mabalinmo ti makisarita kadagiti nakapadasen iti situasionmo. Ngem laglagipem a sika—saan a dagiti nagkonsultaam—ti agdesision ken mangibaklay kadagiti resultana.—Galacia 6:4, 5.

•   Ikabilangam ti amin a banag. Base kadagiti impormasion a naammuam, mabalin a mangaramidka iti listaan dagiti pagpiliam, kasta met dagiti pagsayaatan ken pagdaksan ti tunggal maysa kadagita. Ken sipapanunotka koma kadagiti posible a pagdaksan ti aramidem a desision. (Deuteronomio 32:29) Kas pagarigan, ania ti posible nga epekto kenka ti desisionmo, iti pamiliam, wenno iti dadduma? (Proverbio 22:3; Roma 14:19) No sungbatam dagitoy a saludsod sa panunotem dagiti prinsipio ti Biblia, makaaramidka iti nasayaat ken naayat a desision.

•   Agdesisionka. No dadduma, baka ditay kayat ti agdesision ta saantayo a sigurado. Ngem no itantantayo ti agdesision, baka adda mapalabastayo nga oportunidad wenno agresulta dayta iti saan a nasayaat a situasion. Iti sabali a pannao, ti panangitantan nga agdesision ket kas met laeng iti saan a nasayaat a desision. Inkompara dayta ti Biblia iti panagtalon. Kunana: “No ur-urayem a sumayaat ti angin ken panawen, awan a pulos ti maimulam ket awanto met ti apitem.”—Eclesiastes 11:4, Ti Baro a Naimbag a Damag Biblia.

 Laglagipem met a saan a perpekto uray ti kasayaatan a desision. Masansan a no agpilitayo, adda isakripisiotayo. Kasta met, mabalin nga adda dagiti di ninamnama a mapasamak. (Eclesiastes 9:11) Isu nga usarem dagiti kasayaatan nga impormasion, ken piliem ti kasayaatan nga opsion a mabalin nga agballigi.

 Saan nga amin a desision ket pinal. Mabalin a nagbaliw ti situasionmo, wenno naammuam a ti immun-una a desisionmo ket nagresulta iti dimo ninamnama. Isu a nasayaat no panunotem manen ti situasionmo ken agpilika iti sabali nga opsion a posible nga agresulta iti kayatmo a mapasamak.

 Ngem adda dagiti desision a masapul a saan a mabaliwan. (Salmo 15:4) Kas pagarigan, ekspektaren ti Dios a tungpalen dagiti agassawa ti karida idi nagkasarda. c (Malakias 2:16; Mateo 19:6) Isu a no maipasangoda kadagiti problema, ikagumaanda koma a solbaren dagita imbes nga agsinada.

 No dadduma, agkamali wenno makaaramidtayo iti saan a nasayaat a desision. (Santiago 3:2, footnote) Normal laeng a makonsiensiatayo. (Salmo 69:5) Kinapudnona, makatulong no dadduma dagiti negatibo a rikna tapno saantayon a maulit ti kamalitayo! (Proverbio 14:9) Ngem ibaga ti Biblia ti pagdaksan ti nakaro a pannakakonsiensia—pannakaupay ken nagulo a panunot. (2 Corinto 2:7) d “Naasi ken mannakipagrikna ni Jehova,” kuna ti Biblia. (Salmo 103:8-13) Isu a makasursuroka koma kadagiti di nasayaat a desisionmo a saanmon a mabalbaliwan ken aramidem ti amin a kabaelam tapno mapasayaat dagiti bambanag.