Adda kursonadam, ket idi kuan, agnobiokayon. Kayatyo a maam-ammo ti maysa ken maysa tapno makitayo no agkabagayankayto kas agassawa. Ania dagiti ekspektarenyo bayat nga agin-innammokayo?

Iti daytoy nga artikulo

•  Ekspektarem a maaddaankayo iti napudno a panagsarita

•  Ekspektarem nga agdumakayo no dadduma iti kapanunotan

•  Ekspektarem a makapa-stress ti pannakinobio

 Ad-adda a maam-ammom ti boyfriend wenno girlfriend-mo bayat nga agkadkaduakayo. Adda dagiti maammuam maipapan kenkuana no obserbaram ti reaksionna kadagiti agduduma a situasion.

 Ngem adda dagiti banag a masapul a pagsaritaanyo, ket napudnokayo koma iti maysa ken maysa. Bayat nga ar-aramidem dayta, dimo koma liplipatan ti talaga a rason nga am-ammuem isuna ken saanmo nga ipalubos a ti rikriknam ti mangimpluensia iti panagdesisionmo.

 Dagitoy dagiti topiko a mabalinyo a pagsaritaan:

•   Pinansial. Adda kadi utangmo? Marigatanka kadi no dadduma a mangkontrol iti bagim nga aggastos? Inton agassawakayon, kasanokayo nga agdesision maipapan iti panagiggem iti kuarta ken panaggastos?

•   Salun-at. Nasalun-atka kadi? Adda kadi nakaro a sakitmo idi?

•   Kalat. Ania ti kayatmo nga aramiden iti biagmo? Agpada kadi ti kalatyo iti girlfriend wenno boyfriend-mo? Inton agassawakayon, naragsakkanto latta kadi uray no saanyo a nagaw-at ti kalatyo gapu iti situasionyo?

•   Pamilia. Adda kadi responsabilidadmo ita iti pamiliam? Panagkunam, posible kadi a maaddaankanto iti responsabilidad iti pamiliam? Kayatmo kadi ti maaddaan iti anak? No wen, mano?

 No pagsaritaanyo dagita a topiko, ibagayo ti pudno. Saankayo nga agilimed wenno agulbod tapno laeng agbilib kadakayo ti boyfriend wenno girlfriend-yo.—Hebreo 13:18.

 Panunotem: Ania ti masapul a maammuam maipapan iti boyfriend wenno girlfriend-mo? Ania ti masapul a maammuanna maipapan kenka? Kasano a makatulong ti panagbalin a napudno tapno nasayaatto ti komunikasionyo inton agassawakayon?

 Prinsipio ti Biblia: “Sawenyo ngarud ti kinapudno.”—Efeso 4:25.

 “Mabalin a pampanunoten ti babai, ‘Kalpasan ti innem a bulan, baka awisennakon nga agkasarkami,’ ngem mabalin a para iti lalaki, makatawen pay. Ket no kasta, mabalin a maguluan ken masaktan ti babai gapu ta saan a napasamak ti ninamnamana. Nagpateg ngarud nga ammoda ti pampanunoten ken ti rikrikna ti maysa ken maysa.”—Ariana, makatawenen nga adda asawana.

 Awan ti dua a tao nga agpada, isu a saanmo nga ekspektaren a kanayon nga agpada ti kayatyo wenno agpada ti kapanunotanyo iti amin a banag. Ngamin, dakkel ti epekto ti kultura ken pannakapadakkelyo.

 Panunotem: No agdumakayo iti kapanunotan kadagiti babassit a banag, nakasaganakayo kadi nga agpabus-oy tapno mataginayon ti talna no la ket ta awan ti masalungasing a prinsipio ti Biblia?

 Prinsipio ti Biblia: “Maammuan koma ti amin a tattao a nainkalintegankayo.”—Filipos 4:5.

 “Uray no panagkunam ket agkabagayankayo a permi, adda latta nga adda pagdumaanyo. Napateg nga ikabilanganyo no agkabagayankayo, ngem adayo a napatpateg dagiti kualidad nga ipakitayo no adda dagiti saanyo a pagtunosan.”—Matthew, lima a tawenen nga adda asawana.

 No adda nobio wenno nobiam, kasapulam ti mangiwaya iti adu a tiempo, ket mabalin a makapa-stress dayta. Ania ti makatulong?

 Mangikeddeng iti limitasion. Saan koma a ti relasionyo ti pagrikusan ti biagmo nga uray la mabaybay-amon ti dadduma a responsabilidadmo wenno ti dadduma a gagayyemmo. Kuna ni Alana a lima a tawenen nga adda asawana: “Kasapulamto latta dagiti gagayyemmo uray inton adda asawamon, ken kasapulandakanto latta. Saanmo ida a liplipatan gapu laeng ta adda boyfriend wenno girlfriend-mon.”

 Laglagipem, inton adda asawamon, masapulto a balansiem ti amin nga aspeto ti biagmo, isu a nasayaat no rugiam itan nga aramiden dayta bayat ti panagnobioyo.

 Panunotem: Kayatmo kadi a sika laeng ti pangipokusan ti boyfriend wenno girlfriend-mo iti tiempo ken atensionna? Mariknam kadi a kayatna nga isuna laeng ti pangipokusam iti tiempo ken atensionmo? Ania ti aramidenyo tapno saankayo unay a mabannog wenno mauma iti relasionyo?

 Prinsipio ti Biblia: “Adda tiempo ti tunggal banag, adda tiempo ti tunggal aramid.”—Eclesiastes 3:1.

 “No sa la agkadua dagiti agnobio no agrelrelaksda, mabalin a makigtotdanto inton agassawadan. Mayat met nga agkaduada a mangaramid kadagiti inaldaw nga aktibidad, kas iti panaggatang, panagtrabaho iti balay, ken panagdaydayaw iti Dios. Makatulong dayta tapno agbalinto a natibker ti pundasion ti panagasawada.”—Daniel, dua a tawenen nga adda asawana.

 Laglagipenyo a ti panagin-innammoyo ket limitado laeng a tiempo a makatulongto kadakayo nga agdesision no agkasarkayo wenno ag-break-kayo. Mailawlawagto iti Paset 3 daytoy a serye dagiti masapul nga ikonsideraryo inton aramidenyo dayta a desision.