Ania ti aramidem kadagitoy a situasion?

1.   Pinagungtannaka ti titsermo gapu ta naguloka iti klaseyo.

    Masapul kadi nga ag-sorry-ka iti titsermo, uray no iti panagkunam ket sobra ti inaramidna?

2.   Naammuan ti gayyemmo nga adda madi a naibagam maipapan kenkuana.

    Masapul kadi nga ag-sorry-ka iti gayyemmo, uray no ammom a husto ti imbagam?

3.   Nasuronka ken tatangmo isu a sinungbatam.

    Masapul kadi nga ag-sorry-ka ken tatangmo, uray no iti panagriknam ket basolna a nasuronka?

 Ti sungbat kadagita a tallo a saludsod ket wen. Ngem apay nga ag-sorry-ka, uray no iti panagriknam ket saan la a sika ti makimbasol?

•  Apay nga ag-sorry-ka?

•  No kasano ti ag-sorry

•  Ti kuna dagiti padam nga agtutubo

•   No ag-sorry-ka, ipakitana a manakemka. No akuem ti naibagam wenno naaramidmo, ipakpakitam a parparang-ayem dagiti napapateg a kualidad a kasapulam inton adultokan.

   “Nalaklakatayo nga ag-sorry ken dumngeg iti ibaga ti nasaktantayo no napakumbaba ken naanustayo.”—Rachel.

•   No ag-sorry-ka, ipakitana a kayatmo ti makikappia. Dagiti tattao a mangibagbaga iti “sorry” ipakpakitada a mas interesadoda a makikappia ngem iti panangpaneknek a hustoda ken kamali ti sabali.

   “Uray no ti panagriknam ket saan a sika ti makimbasol, masapul a makikappiaka. Libre laeng ti ag-sorry, ken maisublina pay ti panaggayyemyo.”—Miriam.

•   No ag-sorry-ka, nalaglag-an ti riknam. Nadagsen ti riknam no adda nasaktam gapu iti naibagam wenno naaramidmo. Ngem no ag-sorry-ka, lumag-an ti riknam, ta kasla adda naikkat a nadagsen nga aw-awitem. a

   “No dadduma, masungbatak ni Mama wenno ni Papa. Makonkonsiensiaak, ngem marigatanak nga ag-sorry. Ngem no ag-sorry-ak, okeykami manen a pamilia.”—Nia.

 Narigat kadi ti ag-sorry? Wen! Namin-ano a masapul nga ag-sorry ni Dena ken nanangna gapu ta madi ti panagsungsungbatna. Inaminna: “Nagrigat ti ag-sorry. Kasla adda nakabara iti karabukobko ken saanak a makasao!”

•   No posible, personal nga ag-sorry-ka. No personal nga ag-sorry-ka iti maysa a tao, makitana a naimpusuan ti panagbabawim. No ag-sorry-ka babaen ti teks, baka saan a mamati nga agbabbabawika. Uray no ikkam iti sad face emoji, baka saanna a marikna a naimpusuan ti panagbabawim.

   Tip: No saanka a personal a makapag-sorry, mabalin a tawagam wenno ikkam iti kard. Aniaman kadagita ti piliem, panunotem a naimbag ti ibagam.

   Prinsipio ti Biblia: “Ti puso ti nalinteg agpanunot nga umuna sakbay a sumungbat.”—Proverbio 15:28.

•   Dagus nga ag-sorry-ka. No itantanmo ti ag-sorry, baka kumaro laeng ti problema, ken saanton a kas iti dati ti relasionyo nga aggayyem.

   Tip: Mangaramidka iti kalat—kas pagarigan, ‘Ag-sorry-ak ita nga aldaw.’ Iplanom no kaanoka nga ag-sorry ket aramidem dayta.

   Prinsipio ti Biblia: “Alistuam ti makiareglo.”—Mateo 5:25.

•   Naimpusuan nga ag-sorry-ka. Ti panangibaga a, “Sorry a, kasta gayam ti marikriknam” ket saan a panagpadispensar! “Gagangay a respetuennaka ti tao a nakabasolam, no akuem ti inaramidmo,” kuna ti balasang a ni Janelle.

   Tip: Ag-sorry-ka nga awan ur-urayem a kasukatna. Saanmo nga ibaga, “Ag-sorry-ak iti inaramidko, no ag-sorry-ka met iti inaramidmo.”

   Prinsipio ti Biblia: “Surotentayo koma ngarud dagiti bambanag a mamataud iti talna.”—Roma 14:19.