Panagkunam?

•   Adda kadi pagdaksan ti panagkonsulta iti horoscope, Ouija board, wenno espiritista?

•   Dagiti kadi estoria maipapan iti espiritismo ket inimbento laeng​—a simboliko a panaglaban dagiti nasayaat ken dakes​—wenno agpayso ken peligroso dagita?

 Ilawlawag daytoy nga artikulo no apay a kasla makaawis ti espiritismo ken no apay a masapul nga agannadka.

•  Apay a makaawis?

•  Apay nga agannadka?

•  Ti mabalinmo nga aramiden

•  Ti kuna dagiti padam nga agtutubo

 Nagadu a kuarta ti mapaspastrek ti industria ti paglinglingayan iti panagaramidna kadagiti pelikula, pabuya iti TV, video game, ken libro a mangitampok iti espiritismo isu nga adu nga agtutubo ti nagbalin nga interesado iti astrolohia, demonio, bampira, ken panagkulam. Apay? Dagitoy ti rason:

•   Panagusioso: Tapno maammuanda no talaga nga adda dagiti espiritu a persona

•   Panaginteres: Tapno maammuanda ti mapasamak iti masanguanan

•   Pannakikomunikar: Tapno padasenda a kasarita ti natayen nga ipatpategda

 Saan met ketdi a dakes dagita a rason. Kas pagarigan, natural laeng a panunotentayo ti masanguanan wenno kailiwtayo ti natayen nga ipatpategtayo. Ngem adda dagiti pagdaksanna a masapul a maammuam.

 Adda dagiti nadagsen a pakdaar ti Biblia maibusor iti aniaman a konektado iti espiritismo. Kas pagarigan, ibagana:

 “Awan koma kadakayo ti . . . mammuyon, salamangkero, agbirbirok iti partaan, mangkukulam, agor-orasion, makiuman iti espiritista wenno mammadles, wenno makisarita iti natay. Ta kagura ni Jehova ti asinoman nga agar-aramid kadagita a banag.”​—Deuteronomio 18:10-12.

 Apay a di pulos anamongan ti Biblia ti espiritismo?

•   No makikomunikartayo kadagiti demonio, supsuportarantayo ida. Isursuro ti Biblia a nagrebelde iti Dios ti dadduma nga anghel isu a nagbalinda a kabusorna. (Genesis 6:2; Judas 6) Dagitoy dakes nga anghel, a maawagan iti demonio, ti mangus-usar kadagiti espiritista, mammadles, mammuyon, ken astrolohia tapno allilawenda dagiti tattao. No makiramantayo kadagiti ar-aramidenda, agbalintayo a kabusor ti Dios.

•   Isursuro ti espiritismo ti ulbod a patpatien nga adda dagiti tao a kayada nga ammuen ti masanguanan. Ngem ti Dios laeng ti makaibaga: “Manipud pay idi un-unana, ipadtok ti mapasamak, ken nabayagen nga imbagak dagiti saan pay a napasamak.”​—Isaias 46:10; Santiago 4:13, 14.

•   Isursuro ti espiritismo ti ulbod a patpatien a kaya dagiti sibibiag ti makikomunikar kadagiti natay. Ngem kuna ti Biblia: “Awan a pulos ti ammo dagiti natay . . . Awan ti aramid wenno plano wenno pannakaammo wenno sirib iti Tanem.”​—Eclesiastes 9:5, 10.

 Gapu kadagita, saan a makiramraman dagiti Saksi ni Jehova kadagiti aramid a konektado iti espiritismo. Liklikanda met ti paglinglingayan a mangitampok kadagiti zombie, bampira, ken karkarna a banag. “No adda karamanna nga espiritismo, diak buyaen dayta,” a kuna ni Maria.

•   Determinadoka koma a mangmantener iti ‘nadalus a konsiensia’ iti sanguanan ni Jehova babaen ti saanmo a pannakipaset iti aniaman nga aramid wenno paglinglingayan a konektado iti espiritismo.​—Aramid 24:16.

•   Ibellengmo ti aniaman nga adda kenka a konektado iti espiritismo. Basaem ti Aramid 19:19, 20, ket kitaem ti nasayaat nga inaramid dagiti Kristiano idi umuna a siglo iti daytoy a banag.

 Tandaanam: No saanka a makiraman kadagiti aramid wenno paglinglingayan a konektado iti espiritismo, nalawag nga ipakpakitam a supsuportaram ni Jehova. Dayta ti mangparagsak iti pusona!​—Proverbio 27:11.