“Makitkitak ti dadduma a klasmeytko a nakatugaw la iti klase nga awan ti libroda, naka-headphone, agdengdengngeg la iti music bayat nga agisursuro ti titsermi. Sada masdaaw no bagsakda! Idinto ta adda dagiti kas kaniak a mangar-aramid iti amin a kabaelanna, agpakpakarigat nga agadal, ngem nababa latta ti grade-na. Saanko nga ammo no apay a kasta. Talaga a nagmadi ti riknak no nababa latta ti grade-ko kalpasan ti makalawas a rinabii a panagpuypuyatko nga agadal.”—Yolanda.

 Nariknam kadi metten ti kas iti narikna ni Yolanda? Aminentayo a mabalin a makapadepres no bagsaktayo wenno agsasaruno a nababa ti grade-tayo.

 Adda dagiti agtutubo a no bumagsakda, saanda a kayaten a pasayaaten ti grades-da. Baka agsardeng payen ti dadduma nga ageskuela. Nupay kasla mayat nga aramiden dagita, adda pay nasaysayaat a solusion. Kitaem ti innem a mabalinmo nga aramiden tapno ngumato ti grades-mo.

•  Ti mabalinmo nga aramiden

•  Ti kuna dagiti padam nga agtutubo

•   Sumrekka iti klase. Kasla awan maitulongna daytoy a solusion, ngem no kanayonka nga ag-absent, sigurado a maapektaran ti grades-mo.

   “Idiay eskuelaanmi, dagiti estudiante nga awan bibiangda iti grades-da ti kaaduanna nga agab-absent, a pagproblemaandanto met laeng.”—Matthew.

   Prinsipio ti Biblia: “Aniaman nga imulmula ti maysa a tao, daytanto met ti apitenna.”—Galacia 6:7.

•   Ikagumaam ti agsursuro iti klase. Siempre, nasayaat no sumrekka. Ngem bayat ti klase, ikagumaam nga aramiden ti amin nga agsursuro. Ag-take note-ka. Ikagumaam nga awaten ti ibagbaga ti titsermo. No maipalubos, agsaludsodka iti klase.

   “Adu ti salsaludsodek bayat ti klase gapu ta makitak a nasaysayaat ti panangilawlawag ti titsermi iti topiko no ammona nga adda estudiante a saan a makaawat iti isursurona.”—Olivia.

   Prinsipio ti Biblia: “Dumngegkayo a naimbag.”—Lucas 8:18.

•   Liklikam ti agkusit. Saanka a mapagtalkan no agkusitka. Adu ti pamay-an ti panagkusit iti eskuelaan. Ti maysa ket panangkopia iti inaramid ti kaklasem. Saanka la ngaruden a mapagtalkan, saanka pay a nakasursuro.

   “No adda dimo maawatan, saanmo a kopiaen ti sungbat ti kaklasem iti eksam. No ag-cheat-ka, saanmo a tultulongan ti bagim. Imbes a masursurom a solbaren ti problemam a bukbukodmo, sursuruam ketdi ti bagim nga agdepende iti sabsabali.”—Jonathan.

   Prinsipio ti Biblia: “Masapul nga usigen ti tunggal maysa ti bukodna nga aramid. No naimbag, mabalinna a pagpannakkel ti gapuananna.”—Galacia 6:4, Ti Baro a Naimbag a Damag Biblia.

•   Iyun-unam nga aramiden ti asaynmentmo. No posible, iyun-unam nga aramiden ti asaynmentmo ngem iti dadduma pay nga aramidem—lalo no aglinglingayka laeng. a Ngamin no nalpasmon ti asaynmentmo, mas ma-enjoy-mo nga aramiden ti dadduma pay a kayatmo nga aramiden!

   “Implanok nga aramiden nga umuna ti asaynmentko, ket ngimmato ti grades-ko. No makaawidak, kanayon a kasla kayatko ti maturog apagbiit wenno agdengngeg iti music. Ngem ikagumaak nga aramiden nga umuna ti asaynmentko, saakto agrelaks.”—Calvin.

   Prinsipio ti Biblia: ‘Siguraduenyo ti napatpateg a bambanag.’—Filipos 1:10.

•   Agpatulongka. Saanka a mabain nga agpatulong. Dumawatka iti balakad kadagiti nagannakmo. Agpatulongka iti titsermo tapno ngumato ti grades-mo. No dadduma, mabalin met nga agpa-tutor-ka.

   “Umasidegka a mismo iti titsermo. Agpatulongka tapno maawatam ti subject ken tapno sumayaat ti grades-mo. Mabalin nga apresiaren ti titsermo ti determinasionmo a pumasa ket tulongannaka.”—David.

   Prinsipio ti Biblia: “Adda maitungpal no adu ti mamalbalakad.”—Proverbio 15:22.

•   Gundawayam ti amin a nakalukat nga oportunidad. Iti dadduma a pagilian, adda dagiti bonus question iti eksam a mangnayon iti iskormo. Baka mabalinmo a kiddawen nga agipasaka iti special project. No saanka a nakapasa, mabalinmo a kiddawen nga uliten ti eksam.

   “No kayatko a ngumato ti grade-ko iti maysa a subject, masapul nga adda aramidek. Damagek kadagiti titserko no mabalinak nga agipasa iti special project wenno pasayaaten ti impasak tapno ngumato ti grade-ko.”—Mackenzie.

   Prinsipio ti Biblia: “Makagunggona ti tunggal kita ti napinget a panagtrabaho.”—Proverbio 14:23.