Iti daytoy nga artikulo

•  Ania ti panaginnarem ken panagnobio?

•  Nakasaganaka kadin a makideyt?

  Ibilang daytoy ti dadduma a tattao kas maysa laeng a naragsak a pannakikadua. Ngem iti daytoy nga artikulo, ti “panaginnarem ken panagnobio” tukoyenna ti tiempo nga agkadua ti lalaki ken babai tapno makitada no agkabagayandanto kas agassawa. No kasta, adda panggep dayta, saan la a tapno ma-enjoy-mo ti atension ti saanmo a kasekso.

 Inton agangay, makatulong koma kenka dayta tapno makapagdesisionka no makiasawaka wenno maki-break-ka. No makiinnaremka, masapul a nakasaganaka iti aniaman kadagita a resulta.

 Laglagipem: No kombinsidoka a nakasaganakan a makiinnarem, masapul met a kombinsidoka a nakasaganakan a makiasawa.

  Ti pannakiinnarem ket mabalin nga agturong iti pannakiasawa, isu a nasayaat a panunotem no ania dagiti kualidadmo a mabalin a makatulong wenno mangperdi iti relasionyo. Kas pagarigan, panunotem dagiti sumaganad:

•   Relasion iti Pamilia. Ti panangtratom kadagiti nagannakmo ken kakabsatmo—nangruna no mais-stress-ka—ti masansan a mangipakita no kasano a tratuemto ti asawam.

   Prinsipio ti Biblia: “Ikkatenyo kadakayo ti amin a kita ti sakit ti nakem, panagunget, panagpungtot, panagbugkaw, nasakit a panagsasao, ken amin a banag a makapainsulto.”—Efeso 4:31.

   Isaludsodmo iti bagim: ‘Maibaga kadi dagiti nagannakko ken kakabsatko a resrespetuek ida? No adda saanko a makatunosan kadakuada, kalmadoak kadi a makisarita, wenno makapungtotak ken makiririak?’

•   Panagsakripisio. No addanton asawam, masapul nga ikonsiderarmo ken masansan nga isakripisiom ti kayatmo tapno mapagustuam ti kayat ti asawam.

   Prinsipio ti Biblia: “Itultuloy koma ti tunggal maysa a sapulen ti pagimbagan ti sabali, saan a ti bukodna a pagimbagan.”—1 Corinto 10:24.

   Isaludsodmo iti bagim: ‘Kanayon kadi nga ipilitko ti kayatko? Ibilbilangdak kadi ti dadduma a nainkalintegan? Kadagiti ania a pamay-an nga ipakpakitak nga iyun-unak ti pagimbagan ti dadduma ngem iti pagimbagak?’

•   Kinapakumbaba. Ti nasayaat nga asawa aminenna dagiti kamalina ken naimpusuan a dumawat iti pammakawan.

   Prinsipio ti Biblia: “Mamin-adu nga agkamalitayo amin.”—Santiago 3:2, footnote.

   Isaludsodmo iti bagim: ‘Dagus kadi nga aminek dagiti kamalik, wenno agikalinteganak? Agsakit kadi ti nakemko no mabalakadanak?’

•   Kuarta. Ti tao nga ammona ti agiggem iti kuarta maliklikanna ti maysa kadagiti kangrunaan a pakaigapuan ti riri dagiti agassawa.

   Prinsipio ti Biblia: “Asino kadakayo ti mayat a mangbangon iti torre ti saan nga agtugaw nga umuna ket kuentaenna ti magastos tapno makitana no adda umanay a pangleppasna?”—Lucas 14:28.

   Isaludsodmo iti bagim: ‘Ammok kadi a kontrolen ti panaggastosko wenno kanayon nga umutangak? Ania dagiti inaramidkon a pakakitaan nga ammok ti agiggem iti kuarta?’

•   Espiritualidad. No maysaka a Saksi ni Jehova, masapul nga adda koma regular a rutinam nga agadal iti Biblia ken makigimong.

   Prinsipio ti Biblia: “Naragsak dagiti sipapanunot iti naespirituan a kasapulanda.”—Mateo 5:3.

   Isaludsodmo iti bagim: ‘Ikagkagumaak kadi a pagtalinaeden a nasayaat ti espiritualidadko? Iyun-unak kadi ti naespirituan a rutinak, wenno ti dadduma a banag?’

 Laglagipem: Ti tao a pakiasawaam ket maikari iti nagsayaat nga asawa. No ikagkagumaam itan ti agbalin a nasaysayaat a tao, dakdakkel ti posibilidadna a makabirokka iti kasta met laeng a tao.