Ages-eskuela itan ti adu nga estudiante iti sabali a “classroom”—iti mismo a balayda. No kasta ti situasionmo, kasanoka nga agballigi? Dagitoy ti sumagmamano a tip. a

•  Lima a tip tapno agballigika

•  Ti kuna dagiti padam nga agtutubo

•   Iplanom dagiti aramidem. Ikagumaam a suroten ti eskediulmo, a kas iti ar-aramidem no addaka iti eskuelaan. Mangaramidka iti eskediul para iti panagaramid iti asaynment, trabaho iti balay, ken dadduma pay nga importante a banag. Mabalinmo a baliwan dayta no kasapulan.

   Prinsipio ti Biblia: “Aramidenyo ti amin a banag . . . sigun iti urnos.”—1 Corinto 14:40.

   “Ibilangmo a kasla addaka latta iti eskuelaan. Masapul nga ileppasmo dagiti aramidem iti umiso a tiempo.”—Katie.

   Panunotem: Apay a nasayaat nga isuratmo ti eskediulmo ken ipuestom iti nalakam a makita?

•   Disiplinaem ti bagim. Tapno agbalinka a responsable, masapul nga aramidem dagiti bambanag uray no kasla saanmo koma kayat nga aramiden. Saanka nga agitantan!

   Prinsipio ti Biblia: “Agbalinkayo a nagaget, dikay agpataypatay iti aramidyo.”—Roma 12:11, footnote.

   “Nakarigrigat a disiplinaen ti bagi. Nalaka laeng nga ibaga, ‘Madamdamakton nga aramiden ti asaynmentko.’ Ngem saanmonto met laeng nga aramiden, isu a mabuntuonankanton.”—Alexandra.

   Panunotem: Kasanoka nga agbalin a mas disiplinado no aramidem dagiti asaynmentmo iti isu met laeng nga isu a lugar ken oras iti inaldaw?

•   Mangpilika iti puesto a pagadalam. Ikabilmo ti amin a kasapulam nga agadal. Komportable koma ti pagadalam, ngem saan a komportable unay nga uray la makaturogka. Pagadalam dayta, saan a pagturogan! No awan ti lugar a pagadalam, mabalinmo ti agadal iti kosina wenno iti kuartom.

   Prinsipio ti Biblia: “Sigurado nga agballigi dagiti plano ti nagaget.”—Proverbio 21:5.

   “Saanmo pay la a pampanunoten ti agbasketbol ken ag-video game. I-silent-mo ti selponmo, ken idulinmo pay lang ti gitaram. Mas makapagadalka no awan ti pakaistorboam.”—Elizabeth.

   Panunotem: Ania dagiti masapul a balbaliwam iti lugar a pagadalam tapno nalaklakaka nga agpokus?

•   Agpokuska. Saanmo a paggigiddanen ti aramidem. Agpokuska iti madama nga ar-aramidem. No ngamin paggigiddanem ti aramidem, mabalin nga agkamalika ken nabaybayagmo a maileppas ti trabaho.

   Prinsipio ti Biblia: “Usarenyo ti tiempoyo iti kasayaatan a pamay-an.”—Efeso 5:16.

   “Saanak a talaga a makapagpokus no makitkitak ti selponko. Adu ti masaysayang nga orasko ta awan ti maar-aramidak.”—Olivia.

   Panunotem: Kayam kadi nga in-inut a nayonan ti orasmo nga agpokus iti ad-adalem?

•   Ag-break-ka. Agpagnapagna, agbisikleta, wenno ag-exercise-ka. Ganadoka nga agadal no maaramidmo dagiti pagay-ayatmo. “Ngem palpasem pay nga umuna ti ar-aramidem,” kuna ti libro nga School Power. “Mas ma-enjoy-mo ti libre nga orasmo no nalpasmon ti ar-aramidem.”

   Prinsipio ti Biblia: “Nasaysayaat ti sangarakem nga inana ngem ti dua a rakem a napasnek a panagtrabaho ken panangkamat iti angin.”—Eclesiastes 4:6.

   “Idiay eskuelaan, mabalinmo ti agsursuro nga agusar iti instrumento ti musika wenno ag-enroll iti art class. Kailiwkon dagita gapu ta saankon a maar-aramid ita. Bayat nga ages-eskuelaka, mayat no adda met sabali a banag a masursurom.”—Taylor.

   Panunotem: Ania dagiti pagay-ayatmo nga aramiden a makatulong kenka tapno ganadoka a mangituloy iti panagadalmo?