Ti sapata nga agtalinaed a birhen ket maysa a naisurat wenno naisawang a kari a saan a makiseks no di pay nagkasar.

 Idi dekada 90, nagbalin a nalatak ti sapata nga agtalinaed a birhen idi inrugi ti Southern Baptist Convention idiay United States ti programa a “Makauray ti Pudno nga Ayat.” Dayta a programa ket napagtipon a prinsipio ti Biblia ken positibo a panangguyugoy dagiti kapatadan tapno maparegta dagiti agtutubo a saan a makiseks sakbay ti kasar.

 Di nagbayag kalpasan dayta, nairugi ti umasping a programa nga addaan iti paset a maikkan dagiti nagsapata iti singsing a pirak a mangisimbolo (ken mangipalagip kadakuada) iti sapatada a saanda a makiseks no di pay nagkasar.

 Ti sungbat ket agdepende iti pagsaludsodam.

•   Sigun iti researcher a da Christine C. Kim ken Robert Rector, “natakuatan iti adu a panagadal a ti panagsapata dagiti agtutubo nga agtalinaed a birhen ket nainaig iti panangitantan wenno basbassit a gundaway a pannakiseks dagiti tin-edyer.”

•   Sigun iti research nga impablaak ti Guttmacher Institute, ipakita dagiti panagadal nga “adda posibilidadna a makiseks dagiti tin-edyer a ‘nagsapata nga agtalinaed a birhen’ a kas met laeng kadagiti saan a nagsapata.”

 Apay a saan nga agpapada dagiti resulta?

•   Ti dadduma a panagadal pinagkomparada dagiti nagsapata ken saan a nagsapata a nagduma ti panangmatmatda iti pannakiseks.

•   Ti dadduma met a panagadal pinagkomparada dagiti nagsapata ken saan a nagsapata nga agpada ti panangmatmatda iti pannakiseks.

 Ania ti ipakita ti naud-udi a nadakamat a panagadal? Ni Dr. Janet Rosenbaum, nga espesialista kadagiti isyu mainaig iti salun-at dagiti agtutubo, kunana a kalpasan ti lima a tawen, “awan nagdumaan dagidiay nagsapata ken saan a nagsapata iti kababalinda iti pannakiseks.”

 Nasayaat met ti panggep dagiti programa a panagsapata nga agtalinaed a birhen. Ti laeng problema, saanda a mangmangted kadagiti makatulong a prinsipio tapno matungpal dagiti nagkari ti sapatada. Adu dagiti agkari nga agtalinaed a birhen ti “saan a talaga a mangipappapuso iti sapata,” kuna ni Dr. Rosenbaum. “Ti panangliklik ket agpannuray iti determinasion ti maysa a tao, saan ketdi nga iti pannakipasetna iti maysa a programa.”

 Iparparegta ti Biblia a maaddaan ti maysa a tao iti kasta a determinasion, saan a babaen iti naisurat wenno naisawang a kari no di ket babaen iti panangtulong kenkuana a maaddaan iti ‘pannakabalin ti pannakaawat a mangilasin agpadpada iti umiso ken di umiso.’ (Hebreo 5:14) Total, ti panagtalinaed a birhen ket saan laeng a tapno maliklikan ti sakit ken panagsikog. Panangipakita pay dayta iti panagraem iti Namunganay iti panagasawa.—Mateo 5:​19; 19:​4-6.

 Dagiti pagalagadan nga adda iti Biblia ket agpaay a pagimbagantayo. (Isaias 48:17) Isu nga amin a tattao, aniaman ti edadda, kabaelanda a patibkeren ti determinasionda nga agtulnog iti bilin ti Dios nga ‘adaywan ti pannakiabig.’ (1 Corinto 6:18) Iti kasta, inton makiasawadan, naan-anay a matagiragsakda ti panagdenna nga awan ti pakaburiboran ken pagbabbabawyanda, a masansan a resulta ti pannakiseks sakbay ti kasar.