Dandani amin a pamilia ket addaan kadagiti pagannurotan. Kas pagarigan, mabalin a maipapan iti curfew, panagusar iti gadyet, ken nasayaat a kababalin.

 Kasanon no sinukirmo ti pagannurotan ti pamiliayo? Saanmon a mabalbaliwan ti napasamak, ngem adda maaramidam tapno saanen a kumaro dagiti bambanag. Maammuam dayta iti daytoy nga artikulo.

•  Ti saanmo nga ar-aramiden

•  Ti nasaysayaat nga aramidem

•  Ti kuna dagiti padam nga agtutubo

•   No saan nga ammo dagiti nagannakmo a sinukirmo ti maysa a pagannurotan, mabalin a mapanunotmo nga ilimed dayta.

•   No naammuanda a sinukirmo ti maysa a pagannurotan, mabalin a mapanunotmo nga irasonan ti bagim wenno pabasolen ti sabali.

 Agpada a saan a nasayaat dagita. Apay? No ilimedmo ti inaramidmo wenno irasonam ti bagim, ipakpakitam a saanka pay a nataengan ken ipakpakitam laeng kadagiti nagannakmo nga adu pay ti sursuruem.

 “Saan a solusion ti panagulbod. Rummuarto met la a rummuar ti kinapudno, ket nakarkaronto ti dusam ngem no inaminmo koma idin a dagus.”—Diana.

•   Aminem ti inaramidmo. Ibaga ti Biblia: “Saanto nga agballigi ti mangabbong kadagiti basolna.” (Proverbio 28:13) Ammo dagiti nagannakmo a makaaramidka iti kamali. Ngem ti saludsod, Maipudnom kadi dayta iti nagannakmo?

   “Naas-asi dagiti nagannakmo no ibagam ti pudno. No saanka nga agul-ulbod, ad-adda a patiendaka ken agtalekda kenka.”—Olivia.

•   Dumawatka iti pammakawan. Ibaga ti Biblia: “Ikawesyo amin ti kinapakumbaba.” (1 Pedro 5:5) Kasapulam ti kinapakumbaba tapno maibagam ti “sorry” ken saanmo nga irasonan ti bagim.

   “Maapektaran ti konsiensia dagidiay kanayon nga agikalkalintegan. Intono kuan, saandan a makonsiensia uray agar-aramidda iti dakes.”—Heather.

•   Awatem ti resulta dagiti inaramidmo. Ibaga ti Biblia: “Ipangagyo ti disiplina.” (Proverbio 8:33) Dika agrekreklamo. Awatem ti aniaman nga iparparit ti nagannakmo nga aramidem.

   “No agreklamoka pay kadagiti dusa nga itedda, kumaro laeng ti situasionmo. Ikagumaam a suroten dagiti iparitda nga aramidem, ken dika agpokus kadagiti saanmon a maaramidan.”—Jason.

•   Ikagumaam a pasublien ti panagtalek kenka dagiti nagannakmo. Ibaga ti Biblia: “Ikkatenyo ti daan a personalidadyo a kas kadagiti dati nga ar-aramidenyo.” (Efeso 4:22) Ikagumaam ti agaramid kadagiti umiso a desision tapno maisubli ti panagtalek kenka dagiti nagannakmo.

   “No kanayon a nasayaat dagiti desisionmo ken ipakpakitam kadagiti nagannakmo a dimon ar-aramiden dagiti nagkamaliam, agtalekdanto manen kenka.”—Karen.

 TIP: Saanmo laeng a tungpalen dagiti ipapaaramidda. Aramidem pay dagiti banag a mangnayon iti panagtalekda kenka. Kas pagarigan, no adda napanam, mabalinmo a tawagan dagiti nagannakmo tapno ibagam nga agaw-awidkan—uray no saanka met a marabiyan. No kasta ti aramidem, kasla ibagbagam a kayatmo a pagtalkandaka manen.