Idi 1987, nagsao ni Lyman Swingle, a miembro ti Bagi a Manarawidwid dagiti Saksi ni Jehova, iti sanguanan ti 63,580 a tattao iti estadium ti Plaza Monumental iti Valencia, Venezuela. Adu ti agpatpatnag a nagbiahe babaen ti bus tapno laeng dumngegda kenkuana. Kinuna ni Brother Swingle iti adu a dimngeg: “Saankayon a bassit a sangay. Kalkalaingannan ti kadakkel ti sangayyo. Ket iti panagkunak, addanto aldaw a maysakayto kadagiti addaan iti bilang a ‘100,000 a manangaskasaba’!”

Idi 1987, nasurok laeng a 38,000 ti manangaskasaba—dagiti Saksi ni Jehova nga aktibo a mangiwarwaragawag iti naimbag a damag iti Pagarian—iti Venezuela. Iti dayta a tiempo, walo laeng a pagilian ti addaan iti bilang a nasurok a 100,000 a manangaskasaba.

Nakaskasdaaw ti panagadu dagiti Saksi ni Jehova iti intero a lubong. Kalpasan ti Gubat Sangalubongan I, sumagmamano laeng a ribu dagiti mangipakpakaammo iti publiko ti maipapan iti Pagarian ni Jehova. Ngem nagbaliw dayta. Kuna ti 1943 Yearbook of Jehovah’s Witnesses: “Ti napagtitipon a report iti 1942, nupay saan a kompleto, gapu iti limitado a komunikasion, ket maikuna a nabendisionan . . . , ta iti intero a lubong, addan nasurok a 106,000 a nagreport nga agibumbunannag a nakiraman iti trabaho [panangikasaba iti naimbag a damag].” Uray idi madama ti Gubat Sangalubongan II, adu a tattao ti dimngeg iti kinapudno a linaon ti Biblia. Idi 1950, ti laengen United States, nalab-awanna ti bilang a 100,000 a manangaskasaba.

Ti Nigeria ti simmaganad a pagilian a nakadanon iti 100,000 a bilang dagiti agibumbunannag idi 1974.

Iti simmaganad a tawen, agpada a nalab-awan ti Brazil ken Germany ti bilang dagiti manangaskasaba a 100,000. Ti kasta a panagrang-ay kadagiti uppat a kontinente paneknekanna a ti kinapudno a linaon ti Biblia ket makaallukoy iti amin a kita ti tattao.

Iti intero a lubong, agtultuloy nga umad-adu ti bilang dagidiay umaw-awat iti naimbag a damag. Maitunos daytoy iti naipadto iti Biblia: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.”—Isaias 60:22.

Sigun iti report iti 2014 a tawen serbisio, addan 24 a pagilian a nasurok a 100,000 ti bilang dagiti Saksi. Karaman ti Venezuela kadagiti pagilian a nakadanon iti dayta a bilang idi 2007. Iti intero a lubong, adda 115,416 a kongregasion dagiti Saksi ni Jehova ken 8,201,545 a manangaskasaba.