Idi Oktubre 4, 2014, agarup 19,000 ti nagtataripnong para iti maika-130 a tinawen a miting ti Watch Tower Bible and Tract Society of Pennsylvania. Naangay ti programa iti Assembly Hall of Jehovah’s Witnesses iti Jersey City, New Jersey, U.S.A., ken naikonektar daytoy iti nagduduma a lokasion babaen ti video.

Ti tserman iti miting ket ni Mark Sanderson a miembro ti Bagi a Manarawidwid dagiti Saksi ni Jehova. Iti panglukat a sasao ni Brother Sanderson imbagana a nagpateg dayta a tinawen a miting. Selebrasion ngamin dayta iti maika-100 nga anibersario ti panagturay ti Mesianiko a Pagarian.

Dinakamat ni Brother Sanderson ti tallo a nagpateg a nagapuanan ti Pagarian bayat ti umuna a 100 a tawen a panagturayna:

• Sangalubongan a trabaho a panangasaba. Iti tulong ni Jehova, sigagaget nga insaknap ti ilina ti naimbag a damag maipapan iti Pagarian. Ti sumagmamano a ribu nga agibumbunannag idi 1914 ket nagbalinen a nasurok a walo a milion bayat ti 2014 a tawen serbisio. Itultuloytayo ti mangasaba a sireregta agingga nga ibaga ni Jehova a nalpasen ti trabaho.

• Proteksion para iti iturayan ti Pagarian kas maysa a grupo. Napalalo ti panangbusor kadatayo dagiti narelihiosuan ken napolitikaan nga agtuturay ken pinanggepda pay ketdi a pukawen ti amin a Saksi ni Jehova. Ngem prinotektaran ni Jehova dagiti adipenna kas grupo. Adu a kaso iti korte ti nangabakantayo a pakairamanan dagiti kaso iti United States Supreme Court ken iti European Court of Human Rights. Paneknekan dagita a tultulongannatayo ni Jehova agingga ita.

• Ti panagkaykaysa ti nagduduma a kita ti tattao. Pinagkaykaysa ti Pagarian ti Dios dagiti tattao a nagduduma ti kasasaadna iti biag, nasionalidad, ken lengguahe ket napagballigianda ti adu a problema ken nagbalinda kas maysa a nagkaykaysa a grupo dagiti agdaydayaw iti Dios. “Maysa daytoy a milagro a ni laeng Jehova a Dios ti makaaramid,” kuna ni Brother Sanderson. Inulitna a dakkel a pribilehio para kadagiti presente ti kaaddada iti dayta a nagpateg a tinawen a miting.

Ti Serye nga Agbalinka a Gayyem ni Jehova.

Ti simmaganad a paset ti programa ti tinawen a miting ket maipapan iti serye ti video para kadagiti ubbing a natagiragsaktayo iti nasuroken a dua a tawen. Impabuya nga umuna ni Brother Sanderson ti video dagiti nainterbiu nga ubbing manipud iti nagduduma a paset ti lubong. Naragsakan dagiti timmabuno iti natural ken naimpusuan a panangapresiar dagiti ubbing kadagiti nasursuroda kadagita a video.

Kalpasanna, naipabuya ti maysa a baro a video iti dayta a serye a napauluan iti “Tulongannaka ni Jehova nga Agbalin a Natured.” Daytoy 12 a minuto a video pinagbalinna a nabiag ti estoria iti Biblia maipapan iti balasitang nga Israelita a situtured a nangibaga ti maipapan ken Jehova iti asawa ni Naaman. (2 Ar-ari 5:​1-​14) Naikabil daytoy a video iti jw.org idi Lunes, Oktubre 6, 2014, ken mabuya ken mai-download iti nasurok a 20 a lengguahe.

JW Language.

Impakaammo ni Brother Sanderson daytoy a baro nga application para kadagiti digital device a tumulong kadagiti Saksi ni Jehova a mayat nga agsursuro iti sabali a lengguahe tapno mapalawada ti ministerioda. Naglaon daytoy nga application iti nasurok nga 4,000 a sasao ken grupo dagiti sasao iti 18 a lengguahe. Maiplamplano met ti pannakairaman ti kanayonan a sasao ken grupo ti sasao, presentasion iti panangasaba, ken dadduma pay a feature.

JW Broadcasting.

Naragsakan dagiti presente idi naammuanda nga adda baro nga Internet TV station nga isponsoran dagiti Saksi ni Jehova. Kas pangpadasan, naipabuya dayta iti English laeng. Manipud iti sangalubongan a hedkuartertayo iti Brooklyn, New York, U.S.A., maibrodkas ditoy dagiti inaramidtayo a video, musika, ken dramatiko a pannakaibasa ti Biblia. Mai-feature met ti binulan a programa nga idauluan ti maysa a miembro ti Bagi a Manarawidwid wenno katulongan ti maysa kadagiti komite dayta.

Impabuya ni Brother Sanderson ti dadduma a paset ti umuna kadagita a programa. Ni Stephen Lett a miembro ti Bagi a Manarawidwid ti host iti dayta a programa. Nairaman iti programa ti video a mangipakita no kasano a naisagana ken naaramid ti baro a TV station. Ti JW Broadcasting ket nangrugi a mabuya idi Oktubre 6, 2014, ken ma-access daytoy iti tv.dan124.com.

“Ti Pagarian—100 a Tawenen ken Agpatpatuloy.”

Naipabuya ti maysa a video no kasano a ti Pagarian ti Dios in-inut a tinulongannatayo a rumang-ay iti trabahotayo a panangasaba. Ni Samuel Herd a miembro ti Bagi a Manarawidwid ti parasalaysay (narrator) iti dayta. Karaman iti dayta dagiti napagtitipon a video iti napalabas, pannakayakto dagiti pasamak (reenactment) ken kapkapadasan nga insalaysay dagiti nabayagen a Saksi. Naitampok kadagita ti pannakaaramid ken nasaknap a pannakaipabuya ti “Photo-Drama of Creation”; pannakausar dagiti ponograpo, testimony card, plakard a naglaon kadagiti impormasion, ken sound car; ken ti naitulong dagiti eskuelaan a mangsanay kadatayo iti ministerio.

Kasanotayo a mabenepisiaran iti pananglagip kadagiti naibanagen ti Pagarian iti umuna a 100 a tawen a panagturay dayta? Makatulong dayta tapno ad-adda nga agbalin a pudpudno ti Pagarian kadatayo ken mas pagseggaennatayo iti aramidenna iti masanguanan.

Kanta iti Panagdaydayaw.

Naragsakan ti amin a presente idi impakaammo ni David Splane a miembro ti Bagi a Manarawidwid ti maipapan iti plano a pannakarebisar ti pagkantaantayo a Kantaanyo ni Jehova. Ti akkubna ket kapadanto ti material a nausar iti rebisado a New World Translation ken silver-to met ti kolor ti igidna. Ti mausar a dekalidad a material ipakitana a napateg ti musika iti panagdaydayawtayo.

Impakaammo met ni Brother Splane a manayonan iti sumagmamano a kanta ti pagkantaantayo. Ngem saanen a kasapulan nga urayen pay a mayimprenta ti rebisado a pagkantaan sakbay a kantaentayo dagiti baro a kanta. No malpas dagita, maikabil a dagus iti jw.org.

Nakanta iti tinawen a miting dagiti baro a kanta a nasaksakbay a prinaktis ti pamilia ti Bethel. Indauluan ni Brother Splane ti maysa a koro a nangkanta iti baro a kanta a napauluan iti “Naipasdeken ti Pagarian—Umay Koman!” Naaramid daytoy a kanta para iti maika-100 a tawen nga anibersario ti panagturay ti Pagarian. Kalpasan a kinanta dayta ti koro, nakipagkanta kadakuada dagiti timmabuno. Iti katengngaan ti programa, kinanta ti koro ken dagiti timmabuno ti sabali pay a baro a kanta a napauluan iti “Ikkannakami iti Tured.”

Interbiu.

Naipabuya ti maysa a nairekord nga interbiu ti tallo a pagassawaan nga adun a tawen nga agserserbi iti Bethel. Ni Gerrit Lösch a kameng ti Bagi a Manarawidwid ti nanginterbiu kadakuada. Inyestoriada ti adu a panagbalbaliw a nasaksianda iti panaglabas ti adu a tawen, a mangipakita nga umab-abante ti ili ti Dios. Dinakamat ni Brother Lösch a naipakpakauna iti Biblia ti panagrang-ay ti organisasion, ken pinaregtana ti amin a makidanggayda iti umab-abante nga organisasion ni Jehova.—Isaias 60:17.

“Tipiko ken Antitipiko.”

Imparang ni Brother Splane daytoy a palawag. Inlawlawagna no apay a kadagiti kallabes a tawen, saanen a kas idi ti kasansan ti pannakadakamat kadagiti publikasiontayo maipapan iti tipiko (maysa a tao, pasamak, wenno banag nga adda dakdakkel nga iladladawanna iti masanguanan) ken antitipiko (ti isimsimbolo ti tipiko).

Iti napalabas, adu a matalek a lallaki ken babbai iti Biblia ti nadakamat nga adda isimsimboloda a grupo dagiti matalek a Kristiano iti kaaldawantayo. Adu met a salaysay iti Biblia ti naipagarup nga adda kaitungpalanna a pasamak kadagiti adipen ti Dios ita. Kinaagpaysuanna, makapainteres nga adalen dagita. Ngem apay ngarud a sagpaminsan laengen a madakdakamat iti publikasiontayo ti maipapan kadagiti tipiko ken antitipiko?

Ipakita ti Kasuratan a ti sumagmamano a tattao ken pasamak ket adda dakdakkel nga iladladawanda. No nalawag nga ibaga ti Biblia ti koneksion ti tipiko ken ti antitipiko, maragsakantayo a mangawat iti dayta. “No awan ti ibaga ti Biblia, saantayon a pakaringgoran dayta,” kuna ni Brother Splane. Liklikantay koma ti nalabes a pananganalisar iti maysa a salaysay iti Biblia. Kasta met, no adu unay ti busbusbosentayo a tiempo a mangbirbirok iti maipapan iti tipiko ken antitipiko, mabalin a saantay a makita dagiti napateg a leksion iti Biblia a makatulong kadatayo iti inaldaw—nailangitan man wenno naindagaan ti namnamatayo.—Roma 15:4. *

“Agtultuloyka Kadi nga Agbantay?”

Daytoy a palawag nga imparang ni Brother Lett binaliwanna ti pannakaawattayo iti ilustrasion ni Jesus maipapan iti sangapulo a birhen. (Mateo 25:​1-​13) Kastoyen ti pannakaawattayo iti dayta nga ilustrasion: Ni Jesus ti nobio, ket dagiti met napulotan a pasurotna ti iladawan dagiti birhen. (Lucas 5:​34, 35; 2 Corinto 11:2) Agaplikar iti kaaldawantayo ti ilustrasion a mapasamak ti tampokna bayat ti dakkel a rigat. Idi dineskribirna dagiti ampang wenno maag a birhen, saan a kayat a sawen ni Jesus nga adu a napulotan nga adipenna ti agbalin a di matalek ken masapul a masukatan. Ibagbagana laeng ti maysa a serioso a pakdaar. Ti lima a birhen a masirib ken lima a birhen a maag, ipakitana nga adda iti tunggal napulotan no kayatna ti agbalin a sisasagana ken alerto wenno agbalin a di matalek.

Kas panangyaplikar iti panangliklik iti nalabes a pananganalisar iti maysa a salaysay iti Biblia, saantay koma ngarud nga adalen daytoy nga ilustrasion tapno laeng agbirok kadagiti detalye nga adda kaitungpalanna. Imbes ketdi, magunggonaantayo no dagiti masursurotayo iti dayta nga ilustrasion ti kitaentayo. Napulotantayo man wenno paset ti “sabsabali a karnero,” responsabilidadtayo nga isilnag a siraraniag ti lawag ken ‘itultuloy ti agbantay.’ (Juan 10:16; Marcos 13:37; Mateo 5:16) Awan ti asinoman a makapagmatalek para kadatayo. Tunggal maysa kadatayo masapul a ‘pilienna ti biag’ babaen ti panangtaginayontayo iti nabileg nga espiritualidad ken panagtalinaedtayo nga aktibo iti ministerio.—Deuteronomio 30:19.

“Ti Ilustrasion Maipapan Kadagiti Talento.”

Ti simmaruno a nagpalawag ket ni Anthony Morris a miembro ti Bagi a Manarawidwid. Tinulonganna dagiti agdengdengngeg a mangtarus iti nagbalbaliw a pannakailawlawag ti ilustrasion maipapan kadagiti talento. (Mateo 25:14-​30) Maawatantay itan a gunggonaanto ti apo iti ilustrasion (ni Jesus) dagiti adipenna (dagiti matalek a napulotan a pasurotna ditoy daga) iti masanguanan inton dumteng ken pagungarenna ida tapno agbiagda idiay langit. Idi dinakamatna ti mapasamak iti “nadangkes ken nabuntog [wenno nasadut] nga adipen,” saan nga ipakpakauna ni Jesus nga adu kadagiti napulotan a pasurotna ti agbalin a saan a matalek. Imbes ketdi, pakpakdaaranna dagiti napulotan a liklikanda dagiti ugali ken aramid ti maysa a nadangkes nga adipen, isu a napateg nga agtalinaedda a nagaget.

Ania dagiti makatulong kadatayo a leksion iti daytoy nga ilustrasion? Adda nagpateg a banag nga intalek ti apo iti ilustrasion kadagiti adipenna. Adda met intalek ni Jesus kadagiti pasurotna nga ibilangna a napateg a banag—ti trabaho a panangasaba ken panangtulong kadagiti tattao nga agbalin nga adalanna. Namnamaenna a makiramantayo amin a sireregta iti trabaho a panangasaba sigun iti kasasaadtayo. Inapresiar ni Brother Morris dagiti timmabuno gapu iti kinaregtada a makiramraman kadagiti aktibidad ti Pagarian.

“Siasinonto ti Mangraut iti Ili ti Dios?”

Dayta ti mamagpanunot a tema ti maudi a palawag ti programa nga imparang ni Geoffrey Jackson a miembro ti Bagi a Manarawidwid. Inlawlawag ni Brother Jackson ti maipapan iti masanguanan a pannakaraut ti ili ti Dios nga idauluan ti Gog iti Magog.—Ezequiel 38:14-​23.

Iti napalabas, ti dati a pannakatarustayo ket Gog ti sabali nga awag ken Satanas a Diablo kalpasan a napapanaw idiay langit. Ngem kinuna ni Brother Jackson nga adda dagiti saludsod a patauden dayta a pannakaawat. Kas pagarigan, impakpakauna ni Jehova a no maabak ni Gog, ited ni Jehova ni Gog ‘kadagiti tumatayab nga agsippayot, ken kadagiti atap nga animal iti tay-ak kas taraon.’ (Ezequiel 39:4) Impakpakauna pay ni Jehova a ni “Gog ken ti intero a bunggoyna” ket maitabon ditoy daga. (Ezequiel 39:11) Ngem kasano a mapasamak dagita iti maysa nga espiritu? Maipupokto ni Satanas iti mangliwengliweng nga abut iti 1,000 a tawen, saan ket a makan wenno maitabon. (Apocalipsis 20:​1, 2) Kanayonanna, iti ngudo ti 1,000 a tawen, maruk-atan ni Satanas manipud iti mangliwengliweng nga abut ken “iyaw-awanna dagidiay nasion nga adda iti uppat a suli ti daga, da Gog ken Magog.” (Apocalipsis 20:7, 8) Ngem kasano a mayaw-awan ni Satanas ni Gog no isu met laeng ni Gog?

Inlawlawag ni Brother Jackson a ti nadakamat a Gog iti Magog iti padto ni Ezequiel ket saan a tumukoy ken Satanas. Imbes ketdi, tumukoy dayta iti aliansa dagiti nasion a mangrautto iti ili ti Dios iti masanguanan. Agparang a ti iraraut ti Gog ket isu met la ti iraraut ti “ari ti amianan” ken ti iraraut “ti ar-ari ti daga.”—Daniel 11:40, 44, 45; Apocalipsis 17:12-14; 19:19.

Siasino ngarud ti iladladawan ti “ari ti amianan”? Dayta ti padaanantayo. Ania man ti mapasamak, mapabileg ti pammatitayo iti pannakakitatayo a sumaysayaat ti pannakatarustayo kadagiti mapasamak iti masanguanan bayat nga umas-asideg ti kaitungpalan dagita. Saantayo a pagbutngan ti mapaspasungad a pannakaraut ti ili ti Dios ta ammotayo nga inton aramiden dayta ti Gog iti Magog isu ket maabak ken naan-anayto a madadael ngem agtalinaedto iti agnanayon ti ili ti Dios. *

Konklusion.

Impakaammo ni Brother Sanderson a mabalinen ti mangala iti kopia ti bassit (pocket-size) a rebisado a New World Translation. Maisagsagana metten ti audio a bersion daytoy a Biblia. Mangngeganto iti dayta ti boses dagiti agduduma nga indibidual a mangbasa kadagiti sasao nga imbaga dagiti karakter iti Biblia. In-inutto a mai-post dagita iti jw.org a mangrugi iti libro ti Mateo.

Impakaammo ni Brother Sanderson a ti tinawen a tekstotayo para iti 2015 ket Salmo 106:1: “Agyamankayo ken Jehova, ta isu naimbag.” Pinaregtana ti amin a mangkitada kadagiti rason nga agyaman iti Dios iti inaldaw.

Ti pangserra a kanta iti miting ket ti maikatlo kadagiti baro a kantatayo a napauluan “Jehova ti Naganmo.” Nakipagkanta iti entablado ti amin a pito a miembro ti Bagi a Manarawidwid iti koro. Dinanggayan met ida dagiti timmabuno iti panangkantada iti daytoy nagpintas a baro a kanta a maitutop la unay a pangserra iti nagpateg a miting!