Koleksion ti Retrato iti Pilipinas (Pebrero 2014 Agingga iti Mayo 2015)
Dagiti Saksi ni Jehova ket agibangbangon kadagiti baro a patakder ken agren-renovate kadagiti agdama a pasilidad ti sanga nga opisina iti Pilipinas idiay Quezon City. Yantangay ti sangay ti Japan ti mangyim-imprenta itan kadagiti literatura para iti Pilipinas, ti dati a printery building ket napagbalinen a baro nga ayan ti Computer, Local Design/Construction (LDC), Maintenance, Shipping, ken Translation department. Ipakita daytoy a koleksion dagiti retrato ti sumagmamano a naaramid a trabaho iti dati a printery building ken dadduma pay a pasdek manipud Pebrero 2014 agingga iti Mayo 2015. Nakaeskediul a malpas ti proyekto inton Oktubre 2016.
Pannakailadawan ti kompleto a sangay ti Pilipinas. Dagiti pasdek a maibangbangon wenno maren-renovate ket:
Building 4 (Residence)
Building 5 (Audio/Video, Service Department)
Building 6 (Landscaping, Vehicle Repair, Welding)
Building 7 (Computer, LDC, Maintenance, Shipping, Translation)
Pebrero 28, 2014—Building 7
Isupsupot dagiti temporario a trabahador dagiti baro a fiberglass insulation tapno saan nga agagneb. Nakasuotda iti pangprotektar tapno saan nga aggagatel ti kudilda.
Abril 2, 2014—Building 7
Iringringpas dagiti trabahador ti bobida ti recording studio para iti Filipino Sign Language. Dagiti kuadrado nga abut iti bobida ti pakaipanan dagiti HVAC diffuser tapno agpapada ti lamiis iti intero nga studio.
Oktubre 21, 2014—Quezon City site
Maar-aramid ti panagkali para iti centralized chilled water system. Ti baro a system ti mangsuplay iti danum iti amin a pasdek iti sangay.
Disiembre 19, 2014—Overpass a mamagkonektar iti Building 1, 5, ken 7
Ti baro a nakubong nga overpass ti mamagkokonektar kadagiti amin a kangrunaan a pasdek a pakairamanan ti Building 1, nga ayan ti panganan (dining room). Daytoy ti ad-adda a pagnaan ti nasurok a 300 nga agtrabtrabaho iti Building 7.
Enero 15, 2015—Building 5
Ibagbagkat ti 50-tonelada a crane dagiti maikapet a galba. Nagduduma ti kadakkel dagiti crane a papaandaren dagiti lokal a kontraktor.
Enero 15, 2015—Building 5A (Circulation pod)
Ti dua ti kadsaaranna a pod a 125 a metro kuadrado (1,345 sq ft) ti kalawana ket addaan iti dua a kasilias, agdan, ken elebeytor. Yantangay ti pod ti ayan ti kasilias ken agdan, agbalin a nalawlawa ti espasio ti kaabayna a Building 5. Ken gapu ta naikabil ti elebeytor iti pod imbes nga iti Building 5, masigurado a ti uni ti elebeytor ket saan a makaistorbo iti audio wenno video recording.
Enero 15, 2015—Building 5A (Circulation pod)
Adda linong dagiti trabahador nga agikabkabil kadagiti landok gapu iti makasinit a pudot ti init. Ti average a temperatura iti aldaw ket agarup 29 degree Celsius (84°F) iti Enero ken agarup 34 degree Celsius (93°F) iti Abril.
Marso 5, 2015—Building 5
Agikabkabil dagiti trabahador iti tarikayo tapno nalaglagda ti roof trusses (pakaikapetan ti atep). Agarup 800 a pedaso ti nausar a natangken a tarikayo para iti Building 5.
Marso 17, 2015—Building 5
Mano-mano a mabatbatil ti semento para iti bassit a proyekto. Karaman kadagidiay timmulong iti proyekto a panagibangon ket nasurok a 100 a trabahador manipud Australia, Canada, France, Japan, New Zealand, South Korea, Spain, United States, ken dadduma pay a pagilian.
Marso 25, 2015—Building 5
Maiplasplastar dagiti galba iti Building 5 a sigud nga ayan ti Translation Department. Maren-renovate ti pasdek a pagyanan ti Audio/Video ken Service department.
Mayo 13, 2015—Building 5
Putputden ti maysa a trabahador dagiti landok babaen ti dekoriente a ragadi (chop saw). Mausar dagiti landok a balabala para kadagiti diding dagiti opisina.
Baka Kayatmo Met ti
PROYEKTO A PANAGIBANGON
Koleksion ti Retrato iti Pilipinas 2 (Hunio 2015 Agingga iti Hunio 2016)
Nabiit pay a nakompleto dagiti Saksi ni Jehova iti Pilipinas ti dakkel a renovation project iti sangayda iti Quezon City. Kitaem no kasano ti panagtrabahoda.
PROYEKTO A PANAGIBANGON
Sangaribu a Kingdom Hall ken Umad-adu Pay
Adda di malipatan dagiti Saksi ni Jehova iti Pilipinas gapu iti naisangsangayan a programada a panagibangon.
PROYEKTO A PANAGIBANGON
Dagiti Saksi ni Jehova—Agibangbangonda iti Sadinoman a Pagilian
Ti agkaykaysa nga ili ni Jehova ket agibangbangon kadagiti Kingdom Hall ken dadduma pay a pasdek uray nagduduma ti nasionalidad, kultura, ken lengguaheda. Pakaidayawan amin dagita ni Jehova.