No i-click-mo ti lengguahe ti site iti jw.org iti daytoy a panid, makitam ti listaan ti nasurok a 300 a lengguahe​—banag a saanmo a makita iti aniaman a website!

Ania ti nakaidumaan dayta a bilang no idilig iti dadduma a nalatak a site? Panunotem: Idi Hulio 2013, ti website ti United Nations ket mabasa iti 6 a lengguahe. Ti Europa, ti opisial a website ti European Union ket mabasa iti 24 a lengguahe. Mabasa ti Google iti 71 a lengguahe, idinto ta 287 ti Wikipedia.

Adu nga oras a trabaho ti panagipatarus iti website iti nasurok a 300 a lengguahe! Kaaduan iti daytoy a trabaho ket ar-aramiden ti ginasut a Saksi ni Jehova iti intero a daga a mayat a mangidaydayaw ken Jehova. Agtrabtrabahoda kadagiti organisado a team wenno grupo para iti tunggal lengguahe. Us-usarenda dagiti abilidadda a mangipatarus iti Ingles iti lenguaheda.

Ti jw.org ket addaan iti adu a panid a naglaon kadagiti impormasion a maipatpatarus iti nasurok a 300 a lengguahe, isu a nagadu ti panid iti website—nasurok a 200,000!

Saan laeng a nakaad-adu ti makabasa iti jw.org no di ket nalatak met dayta. Agminar dayta a kinapudno iti ranking dagiti website nga inurnong ti Alexa, maysa a kompania a mangan-analisar iti kaadu dagiti agus-usar iti Internet iti intero a lubong. Ti kategoriana a “Religion and Spirituality (Relihion ken Espiritualidad)” ket aglaon iti listaan ti agarup 87,000 a website, agraman ti website dagiti kadakkelan a relihion iti lubong a pakairamanan dagiti agipabpablaak a relihion ken dadduma pay nga umasping nga organisasion. Iti dayta a listaan, idi Hulio 2013, numero dos ti jw.org! Ti numero uno iti listaan ket ti maysa a komersial a site a pakabasaan online iti nadumaduma a patarus ti Biblia.

Idi Oktubre 2013, nasurok a 890,000 ti mangbisbisita iti jw.org iti kada aldaw. Itultuloymi ti mangipaay iti praktikal nga impormasion manipud iti Biblia a libre a magun-odan dagiti tattao iti aniaman a lugar.