Naibasar ti panangmatmatmi iti edukasion kadagiti prinsipio a masarakan iti Biblia. Us-usaren ti tunggal Saksi ti nasanay iti Biblia a konsiensiana a mangikeddeng no kasanona nga iyaplikar dagiti nadiosan a prinsipio a kas iti sumaganad. a

•  Napateg ti edukasion

•  Masapul nga umiso ti panangmatmat iti edukasion

•  Mabalin nga agpeggad ti moral ken naespirituan a kasasaad ti maysa gapu iti nangato nga edukasion

•  Adda kadi Sunday school dagiti Saksi ni Jehova?

 Makatulong ti edukasion tapno mapatanor ti maysa a tao ti “praktikal a sirib ken abilidad nga agpanunot,” dagiti kababalin nga ap-apresiaren unay ti Biblia. (Proverbio 2:10, 11; 3:21, 22) Maysa pay, imbaga ni Jesus kadagiti pasurotna nga isuroda dagiti bambanag nga imbilinna. (Mateo 28:19, 20) Gapuna, parparegtaen ken tultulonganmi dagiti kapammatianmi a maaddaan iti nasayaat nga edukasion, a pakairamanan ti panagbasa, panagsurat, ken pannakisarita, b kasta met iti maipapan iti dadduma a relihion ken kultura.—1 Corinto 9:20-22; 1 Timoteo 4:13.

 Ammo met dagiti gobierno ti kinapateg ti edukasion ken masansan nga ikalikagumda kadagiti agtutubo nga ageskuelada iti elementaria ken sekundaria. Tungtungpalenmi dagita a linteg kas panangsurot iti daytoy a bilin: “Tunggal tao ket agpaituray koma kadagiti nangatngato nga autoridad,” wenno gobierno. (Roma 13:1) Malaksid iti dayta, parparegtaenmi dagiti annakmi nga ageskuela ken ipapatida ti agadal. c Kas kuna ti Sao ti Dios: “Aniaman nga aramidenyo, ipapusoyo a kasla maipaay iti Apo, a saan a kadagiti tattao.”—Colosas 3:23, Ti Baro a Naimbag a Damag Biblia.

 Makatulong ti edukasion a mangipaay iti kasapulan ti pamilia. Sigun iti Biblia, “no saan nga ipaay ti asinoman ti kasapulan dagiti adda iti poderna, nangnangruna dagiti miembro ti pamiliana, tinallikudannan ti pammati ken dakdakes ngem iti tao nga awanan pammati.” (1 Timoteo 5:8) Makatulong ti sekular nga edukasion tapno matungpaltayo dayta a sagrado nga obligasion a mangipaay iti kasapulan ti pamiliatayo. Kas ibaga ti The World Book Encyclopedia, ti kangrunaan a panggep ti edukasion ket tapno “agbalin a produktibo a miembro ti kagimongan dagiti tattao . . . kas trabahador para iti ekonomia.” Ti nalaing ken edukado a tao ket ad-adda a nakasagana a mangipaay iti kasapulan ti pamiliana ngem iti awan abilidadna ken awan adalna.—Proverbio 22:29.

 Ipapaay met dagiti nagannak ti kasapulan dagiti annakda babaen ti panangisaganada kadakuada iti biag ti adulto, ket dakkel ti maitulong ti sekular nga edukasion iti dayta. (2 Corinto 12:14) Parparegtaenmi dagiti nagannak nga ipaayanda iti pormal nga edukasion dagiti annakda uray no saan a libre dayta iti lugarda, narigat a magun-odan, wenno uray saan a kasta ti kulturada. d Mangmangtedkami met kadagiti praktikal a singasing no kasano a makatulong dagiti nagannak iti edukasion dagiti annakda. e

 Siaannad nga us-usigenmi dagiti pagpilian iti sekular nga edukasion. Kuna ti Biblia: “Patien ti awan ammona ti tunggal sao, ngem panunoten ti masirib ti tunggal addangna.” (Proverbio 14:15) Iyap-aplikarmi daytoy a prinsipio babaen ti panangusigmi a naimbag kadagiti pagpilian para iti kanayonan nga edukasion (kalpasan ti hayskul) ken ti magastos ken pateg dagita. Kas pagarigan, masansan a nasayaat nga opsion dagiti bokasional a kurso ta bassit laeng a tiempo ti mabusbos iti dayta.

 Napatpateg ti naespirituan nga edukasion ngem ti sekular nga edukasion. Saan a kas iti sekular nga edukasion, ti naibatay iti Biblia a naespirituan nga edukasion ket mangipaay iti makaited iti biag a pannakaammo maipapan iti Dios. (Juan 17:3) Isurona pay ti nasayaat a wagas ti panagbiag—“no ania ti nalinteg ken umiso ken patas, ti intero a dalan ti kinaimbag.” (Proverbio 2:9) Ti adal ni apostol Pablo ket katupag ti adal a maipapaay kadagiti unibersidad iti agdama, ngem binigbigna ti “di maartapan a pateg ti pannakaammo maipapan ken Apo Jesu-Kristo.” (Filipos 3:8; Aramid 22:3) Adu met a Saksi ni Jehova ita ti nangato ti adalna, ngem mamatida a napatpateg ti naespirituan nga edukasion a naawatda. f

 Kuna ti proverbio ti Biblia: “Makita ti masirib a tao ti peggad ket aglemmeng.” (Proverbio 22:3) Patien dagiti Saksi ni Jehova a mabalin nga agpeggad ti moral ken naespirituan a kasasaad ti maysa gapu iti impluensia ti dadduma nga unibersidad wenno umasping a pagadalan. Gapu iti dayta, pinili ti adu a Saksi ti saan a sumrek wenno saanda nga iserrek dagiti annakda kadagiti kasta nga unibersidad. Mamatida a kadagiti kasta a pagadalan, maiparparegta dagiti di umiso a kapanunotan a kas kadagiti sumaganad:

•   Di umiso: Ti kuarta ket mangyeg iti ragsak ken kinatalged

   Masansan a maibagbaga a tapno makastrekka iti trabaho a nangato ti sueldona, masapul a mangalaka iti nangatngato nga edukasion. Isu nga umad-adu dagiti estudiante a sumsumrek kadagiti unibersidad tapno maaddaandanto iti ad-adu a kuarta. Adu ti mangnamnama a ti kuarta ti mangyeg iti ragsak ken kinatalged, ngem ibaga ti Biblia nga awan serserbi ti kasta a kapanunotan. (Eclesiastes 5:10) Napatpateg pay, isursuro ti Biblia a “ti ayat iti kuarta ti ramut ti amin a kita ti makadangran a banag” ken masansan a mangdadael iti pammati. (1 Timoteo 6:10) Ikagkagumaan dagiti Saksi ni Jehova ti di agpaallilaw iti “kinabaknang a mangal-allilaw iti adu.”—Mateo 13:22.

•   Di umiso: Masapul a gun-oden ti maysa a tao ti kinatan-ok ken posision babaen ti nangato nga edukasion

   Kas pagarigan, insurat ni Nika Gilauri a dati a prime minister ti Georgia maipapan iti gagangay a panangmatmat dagiti kalugaranna: “Tapno nangato ti panangmatmatda kenka iti Georgia, masapul a makagraduarka iti unibersidad. . . . [Iti napalabas,] pakaibabainan ti pamilia dagiti agtutubo nga awan ti naileppasna a kurso.” g Maikontra iti dayta, adda pakdaar ti Biblia kadagiti mayat nga agbalin a nalatak iti daytoy a lubong. Imbaga ni Jesus kadagiti lider ti relihion a kayatda ti maitan-ok iti kaaldawanna: “Kasano koma ngarud a mamatikayo ket magustuanyo met ti agpipinnadayaw?” (Juan 5:44) Mabalin nga impluensiaan ti unibersidad ti maysa nga agbalin a natangsit, ket kagura dayta ti Dios.—Proverbio 6:16, 17; 1 Pedro 5:5.

•   Di umiso: Ipasdek ti tunggal tao ti pagalagadanna iti umiso ken di umiso

   Sursuroten dagiti Saksi ni Jehova dagiti pagalagadan ti Dios iti umiso ken di umiso. (Isaias 5:20) Ngem sigun iti maysa nga artikulo a naipablaak iti Journal of Alcohol and Drug Education, gapu iti impluensia dagiti kakadua kadagiti unibersidad, adu nga estudiante ti “makaaramid iti desision a maikontra iti nadakkelanda a pannakaammo iti umiso ken di umiso.” h Maitunos daytoy iti prinsipio ti Biblia: “Dagiti dakes a kakadua dadaelenda dagiti nasayaat nga ugali.” (1 Corinto 15:33) Iti unibersidad, gagangay ken maiparparegta pay ketdi dagiti aramid a kagura ti Dios, kas iti panagbarbartek, panagdroga, ken panagdenna ti saan nga agassawa.—1 Corinto 6:9, 10; 2 Corinto 7:1.

•   Di umiso: Ti nangato nga edukasion ti kasayaatan a pamay-an tapno sumayaat ti lubong

   Ammomi nga adu ti mangal-ala iti nangato nga edukasion, saan a tapno agpabaknang, maitan-ok, wenno gapu iti dakes a tarigagay, no di ket tapno sumayaat ti bagida ken ti lubong. Nagsayaat dagita a kalat, ngem pinili dagiti Saksi ni Jehova ti sabali a dana. Kas ken Jesus, bigbigenmi a ti Pagarian ti Dios ti kakaisuna a namnama tapno sumayaat ti lubong. (Mateo 6:9, 10) Ngem saanmi a basta ur-urayen lattan ti Pagarian a mangsolbar kadagiti problema iti lubong. Imbes ketdi, kas ken Jesus, ipakpakaammomi “ti naimbag a damag maipapan iti Pagarian” iti intero a daga. Tinawen a ginasut a ribu a tattao ti matultulonganmi nga agbalbaliw. i—Mateo 24:14.