Saan. Dagiti Saksi ni Jehova ket saan a kontra iti bakuna. Ibilangmi a personal a desision ti maysa a Kristiano ti panagpabakuna. Pinili ti adu a Saksi ni Jehova ti agpabakuna.

 Kayatmi ti dekalidad a pannakaagas ken apresiarenmi ti nakaad-adu a panagrang-ay ti medisina tapno malapdan ti panagwaras dagiti nakaro a sakit. Agyamyamankami iti panangikagumaan dagiti nagagaget nga agtrabtrabaho iti medisina, aglalo kadagiti kritikal a situasion.

 Makikokooperar dagiti Saksi ni Jehova kadagiti public health official. Kas pagarigan, manipud idi nangrugi ti pandemia a COVID-19, agtultuloy a mangiruruar dagiti Saksi ni Jehova kadagiti pammalagip iti daytoy a website, a maipatpatarus iti ginasut a lengguahe, tapno iparegtada kadagiti tattao ti kinapateg ti panangsurot kadagiti safety protocol. Karaman kadagita ti physical distancing ken panangsurot kadagiti urnos iti public gathering, panag-quarantine, panagbuggo, ken ti panangisuot kadagiti pangprotektar iti rupa kasta met ti panangsurot kadagiti ipatpatungpal wenno irekrekomenda dagiti autoridad.—Roma 13:1, 2.

 Adun a dekada a maiparparegta kadagiti publikasion dagiti Saksi ni Jehova dagitoy a prinsipio:

•   Ti panangaywan iti salun-at ket personal a desision ti maysa.—Galacia 6:5.

   “Saan a mangirekrekomenda [daytoy a magasin] iti maysa nga agas wenno pamay-an ti panagpaagas ken saan a mangipapaay kadagiti medikal a balakad. Ti panggepna ket mangipresenta laeng kadagiti impormasion ket bay-anna a dagiti agbasbasa ti mangaramid iti desision.”—Awake!, Pebrero 8, 1987.

   “Ti parikut a no dakayo wenno dagiti annakyo ket masapul a mabakunaanda isu’t maysa a banag nga agpaay iti personal a panangikeddeng.”—Agriingkayo!, Mayo 8, 1966.

•   Agpaagastayo gapu ta importante unay kadatayo ti biag.—Aramid 17:28.

   “Gunggundawayan dagiti Saksi ni Jehova dagiti nadumaduma a kinalaing a medikal a mangtulong kadakuada kadagiti parparikutda iti salun-at. Inayatda ti biag ket kayatda nga aramiden ti aniaman a rasonable ken Nainkasuratan a mangpaunday iti dayta.”—Ti Pagwanawanan, Enero 1, 1976.

   “Maragsakan dagiti Saksi ni Jehova nga umawat iti medisina ken agpaagas. Kayatda a mataginayon ti nasayaat a salun-atda ken mapaatiddog ti biagda. Kinapudnona, kas iti Kristiano a ni Lucas idi umuna a siglo, dodoktor ti dadduma kadagiti Saksi ni Jehova. . . . Dagiti Saksi ni Jehova apresiarenda la ketdi ti kinaanep ken dedikasion dagiti mangay-aywan iti salun-at. Agyamanda met iti pannakabang-arda gapu iti serbisio medikal nga ipapaay dagitoy nga indibidual.”—Ti Pagwanawanan, Pebrero 1, 2011.