Ni Irma ket agtawen iti dandani 90 ken aggigian iti Germany. Kalpasan ti dua a nakaro a pannakaaksidentena ken sumagmamano nga operasionna, saanen a makapangasaba iti binalaybalay a kas iti ar-aramidenna idi. Ita, ipakpakaammo ni Irma dagiti patpatienna babaen iti panagsuratna kadagiti kabagian ken am-ammona. Agar-aramid ni Irma kadagiti surat ti pammaregta ken pangliwliwa kadagiti natayan ket magusgustuan dayta dagiti tattao. Kaaduanna a tumawagda ken damagenda no kaano manen a suratanna ida. Adu met a surat ti panagyaman ti maaw-awat ni Irma, ket kidkiddawen dagiti tattao a suratanna manen ida. Kuna ni Irma, “Dagitoy ti mangparparagsak kaniak ken tumultulong tapno makapagtultuloyak a mangasaba.”

 Sursuratan met ni Irma dagiti lallakay ken babbaket nga adda iti nursing home. Inyestoriana: “Adda baket a timmawag kaniak ket imbagana a naliwliwa unay iti suratko kalpasan ti ipapatay ni lakayna. Insigpitna ti suratko iti Bibliana ken masansan a basaenna iti rabii. Maysa pay a babai, a nabiit pay a natay ti asawana, ti nangibaga a dakdakkel ti naitulong ti suratko ngem iti sermon ti padi. Adu ti saludsodna ket dinamagna no mabalinna ti bumisita kaniak.”

 Maysa a saan a Saksi nga am-ammo ni Irma ti immakar iti adayo a lugar ket kiniddawna a suratan ni Irma. “Inur-urnong ti babai ti amin a suratko,” kuna ni Irma. “Idi natay, tinawagannak ti anakna. Imbagana a nabasana amin a suratko ken nanangna ket dinamagna no mabalinko met a patulodan kadagiti surat a naibatay iti Biblia.”

Maragragsakan ni Irma iti ministeriona. “Ipakpakaasik ken Jehova nga agtultuloy nga ikkannak iti pigsa tapno makapagserbiak kenkuana,” kunana. “Uray saanakon a makapangasaba iti binalaybalay, ar-aramidek ti amin a kabaelak.”