Pinadas da Ed ken ti asawana a ni Jennie ti damo a panangasaba babaen ti telepono idi 2010. a “Diak pulos nagustuan dayta,” kuna ni Jennie. “Imbagak ken lakayko a diakto pulos ulitenen!” Kasta met laeng ti narikna ni Ed. Imbagana, “Saanko a kayat a tawtawagandak dagiti telemarketer, isu a diak maimadyin ti bagik a mangaskasaba babaen ti telepono.”

 Idi kuan, nangrugi ti COVID-19 pandemic, ket saanen a makapangasaba iti binalaybalay dagiti Saksi ni Jehova. Ngem kas panagtulnog iti bilin ni Jesus nga ipakaammo ti naimbag a damag, intultuloyda ti ministerioda, kaaduanna babaen ti surat ken telepono. (Mateo 24:14; 28:19, 20) Kasta met, dagiti gimong, a pakairamanan ti taripnong sakbay ti panangasaba, ket maar-aramid babaen ti videoconference. Kalpasan ti maysa a taripnong ti panangasaba, inturtured ni Ed a padasen manen ti mangasaba babaen ti telepono. Ania ti nariknana iti umuna a tawagna? “Permi ti nerbiosko isu a nagkararagak!” imbagana. “Kalpasanna, timmawagak ket naam-ammok ni Tyrone.” b

 Ni Tyrone ken ti asawana a ni Edith ket aggigian iti away ti Kentucky, U.S.A. Agtawenen ni Tyrone iti 83, ket nakapuyen ti panagkitana. Ngem inawatna latta ti inyawis ni Ed a panagadal iti Biblia. Agusar iti magnifying glass tapno mabasana ti mapagadalan a material. Regular a nakipagadal iti Biblia ken Ed babaen ti telepono.

 Kalpasan ti agarup makabulan, nangrugin nga umatender kadagiti gimong da Tyrone ken Edith. Ngem gapu ta awan ti Internet-da, agkonkonektada babaen ti telepono. Ania ti naginteresan ni Edith?

 Bayat ti panangyadal da Ed ken Jennie, mangmangngegda ni Edith a tumultulong ken Tyrone iti sungbatna ken mangbirbirok kadagiti teksto iti Bibliada. Ngem agingga laeng iti dayta ni Edith. “Madlawmi iti boses ni Edith a naladingit,” kuna ni Jennie, “ngem dimi ammo ken Ed no apay.”

 Maysa nga aldaw, pinadas ni Jennie ti makisarita ken Edith. Isu nga iti umiso a tiempo, imbagana ken Ed nga isu ti makisarita iti telepono. Kuna ni Jennie, “Tyrone, mangmangngeko ti boses ni baketmo, kayatko koma a pagbasaen iti teksto wenno pagkomentuen met.”

 Kalpasan ti sumagmamano a segundo, nagsao ni Edith. “Nabayagen a kayatka a kasarita,” siaalumamay nga imbaga ni Edith. Sa kinunana: “Maysaak met a Saksi ni Jehova, ket 40 a tawenen a saanak nga aktibo.”

 Nakigtot ni Jennie. “Agkabsatta!” imbagana, ket nagsangsangitdan a dua.

 Di nagbayag, inikkan ni Ed ni Edith iti broshur nga Agsublika ken Jehova. Sumagmamano a lawas kalpasanna, nadlaw da Ed ken Jennie ti nasayaat a nagbalbaliwan ni Edith. “Idi damo, nakalidliday ti bosesna,” kuna ni Ed. “Ngem nabnabiag itan ti bosesna.” Nasayaat ti naespirituan a panagrang-ay ni Edith ket maysa manen a naragsak a manangikaskasaba iti naimbag a damag. Nabautisaran ni lakayna kas Saksi ni Jehova idi Hulio 2022.

 No panunoten ni Ed ti dati a panangmatmatna iti panangasaba babaen ti telepono, malagipna met ti pannakisaritana idi ken Tyrone. Idi imbasa ni Ed ti Juan 6:44 sa inlawlawagna nga iyas-asideg ni Jehova dagiti tattao iti kinapudno, immanamong ni Tyrone sa imbagana: “Nabayagen nga ur-urayek ti tawagyo.” Naragsak met ni Jennie ta inturturedda ken lakayna ti mangasaba babaen ti telepono. “No aramidentayo ti maysa a banag para ken Jehova, uray no narigat dayta, sigurado a bendisionannatayo,” imbaga ni Jennie.