Foreldrar, sem setja börnum sínum gott fordæmi, breyta eftir því sem þau kenna. Til dæmis gætirðu varla ætlast til þess að sonur þinn væri sannsögull ef hann heyrði þig segja: „Segðu honum að ég sé ekki heima,“ þegar þú vilt ekki tala við einhvern sem bankar upp á.

„Algengt er að fólk segi: ,Gerðu eins og ég segi, ekki eins og ég geri.‘ En það virkar ekki að segja þetta við börn. Þau eru eins og svampar sem drekka í sig allt sem við segjum og gerum. Og þau láta okkur vita þegar við erum ekki samkvæm sjálfum okkur.“ – David.

MEGINREGLA: „Þú prédikar að ekki skuli stela og stelur þó.“ – Rómverjabréfið 2:21.

Foreldrar hafa meiri áhrif á börn sín og unglinga en nokkur annar, meira að segja jafnaldrarnir. Það þýðir að þú ert í bestu aðstöðunni til að leiða börn þín í rétta átt – svo framarlega sem þú breytir í samræmi við það sem þú kennir.

„Við getum sagt það sama hundrað sinnum og velt fyrir okkur hvort barnið sé að hlusta. En í eina skiptið sem við gerum ekki eins og við segjum mun barnið benda á það. Börnin fylgjast með öllu sem við gerum, líka þegar við höldum að þau taki ekki eftir.“ – Nicole.

MEGINREGLA: „Sú speki sem að ofan er, hún er ... hræsnislaus.“ – Jakobsbréfið 3:17.

Skoðaðu þína eigin staðla. Hvers konar skemmtiefni horfir þú á? Hvernig kemur þú fram við maka þinn og börn? Hvers konar vini átt þú? Tekur þú tillit til annarra? Í stuttu máli, ert þú fyrirmyndin sem þú vilt að börnin þín líki eftir?

„Við hjónin ætlumst ekki til að börnin okkar fylgi stöðlum sem við fylgjum ekki sjálf.“ – Christine.

Biðstu fyrirgefningar á mistökum þínum. Börnin þín vita að þú ert ekki fullkominn. Ef þú segir fyrirgefðu við maka þinn og börn, þegar við á, setur þú gott fordæmi í heiðarleika og auðmýkt.

„Börnin okkar þurfa að heyra okkur viðurkenna mistök okkar og biðjast afsökunar á þeim. Ef við gerum það ekki læra þau bara að fela mistök sín.“ – Robin.