KASAKAR hafa í gegnum tíðina lifað hirðingjalífi. Enn ferðast sumir kasakskir hirðingjar eftir árstíðum með hjarðir sínar á milli beitilanda. Yfir sumarið dvelja þeir á beitilöndum á hálendinu en flytja hjarðir sínar niður á hlýrri svæði þegar veturinn nálgast með snjó og kulda.

Þó að margir Kasakar búi í nútímalegum borgum endurspeglast hirðingjalíf forfeðranna í mörgum hefðum þeirra, mat og handiðn. Þeir eiga ríka arfleifð ljóða, söngva og tónlistar sem leikin er á hljóðfæri innfæddra.

Færanleg tjöld hirðingja – kölluð júrt – eru orðin táknmynd fólks sem lifir í sátt og samlyndi við náttúruna. Hirðar kjósa enn að búa í þessum tjöldum og  Kasakar, sem búa í þéttbýli, nota þau oft við sértök tækifæri. Þau eru einnig þægilegar vistarverur fyrir ferðamenn. Tjöldin eru gjarnan skreytt fallegum vefnaði, útsaumi og teppum sem endurspegla fjölbreytilega handiðn kasakskra kvenna.

Kasakskar fjölskyldur, sem búa í sveitum, meta hesta mikils. Kasakar eiga að minnsta kosti 21 orð yfir hesta, hvert með sínum merkingarblæ. Þar að auki eiga þeir fleiri en 30 orð og orðasambönd yfir lit hesta. Góður hestur er enn þá verðmæt gjöf í Kasakstan. Á landsbyggðinni læra drengir snemma að sitja hest.

Hefðbundin máltíð Kasaka inniheldur alltaf kjöt og er yfirleitt ekki mikið krydduð. Meðal eftirlætisdrykkja Kasaka er kúmis sem er búið til úr merarmjólk og talið hin mesta heilsubót og shúbat sem er saðsamur og örlítið súr drykkur gerður úr úlfaldamjólk.

Vottar Jehóva bjóða gesti velkomna til að skoða deildarskrifstofu sína í Almaty.