Biblían segir hvorki hvenær sköpun alheimsins hófst né hve lengi hún stóð. Hún segir einfaldlega: „Í upphafi skapaði Guð himin og jörð.“ (1. Mósebók 1:1) Biblían tilgreinir ekki hvenær upphafið átti sér stað. En atburðarásin í 1. Mósebók tímasetur það á undan sköpunartímabilunum, eða „dögunum“, sex.

•  Voru sköpunardagarnir sex bókstaflegir 24 klukkustunda dagar?

•  Hvað gerðist á sköpunardögunum sex?

•  Stenst frásaga 1. Mósebókar vísindalega skoðun?

•  Hvenær voru sólin, tunglið og stjörnurnar skapaðar?

•  Hve gömul er jörðin samkvæmt Biblíunni?

 Nei. Í Biblíunni getur orðið „dagur“ átt við mislöng tímaskeið allt eftir samhenginu. Til dæmis lýsir frásagan á einum stað öllu sköpunarferlinu sem einum degi. – 1. Mósebók 2:4.

 Guð breytti jörðinni frá því að vera „auðn og tóm“ í byggilega plánetu. (1. Mósebók 1:2) Síðan skapaði hann líf á jörðinni. Biblían lýsir sex atburðarásum sem gerðust á þessum dögum, eða tímaskeiðum, sköpunarinnar.

•  Dagur 1: Guð lét ljós ná til yfirborðs jarðar. Þannig hófst hringrás dags og nætur . – 1. Mósebók 1:3–5.

•  Dagur 2: Guð myndaði víðáttu milli vatnsins á yfirborði jarðar og vatnsins hátt yfir yfirborði hennar. – 1. Mósebók 1:6–8.

•  Dagur 3: Guð lét þurrlendið birtast. Hann skapaði líka gróðurinn. – 1. Mósebók 1:9–13.

•  Dagur 4: Guð gerði sólina, tunglið og stjörnurnar sýnilegar sem ljósgjafa frá yfirborði jarðarinnar. – 1. Mósebók 1:14–19.

•  Dagur 5: Guð skapaði sjávardýr og fleyg dýr. – 1. Mósebók 1:20–23.

•  Dagur 6: Guð skapaði landdýr og menn. – 1. Mósebók 1:24–31.

 Þegar sjötta deginum lauk hvíldist Guð eftir verk sín, eða hætti að skapa. – 1. Mósebók 2:1, 2.

 Biblían heldur því ekki fram ekki að frásagan af sköpun heimsins sé vísindalega ítarleg greinargerð. Hún lýsir sköpuninni með þeim hætti að lesendur allt frá biblíutímanum gátu áttað sig á atburðarásinni í stórum dráttum. Frásagan af sköpuninni stangast ekki á við vísindalegar staðreyndir. Stjarneðlisfræðingurinn Robert Jastrow skrifar: „Öll smáatriðin eru ólík en aðalatriðin í stjarnfræðilegu sögunni og sögu 1. Mósebókar eru eins. Atburðarásin allt fram að tilkomu mannsins gerist allt einu og með látum á ákveðnum tímapunkti.“

 Sólin, tunglið og stjörnurnar voru þegar til sem hluti himinsins sem Guð skapaði „í upphafi“. (1. Mósebók 1:1) En birtan frá þeim náði ekki til yfirborðs jarðar vegna mjög þétts andrúmslofts. (1. Mósebók 1:2) Þó að dreifð birta hafi orðið sýnileg á fyrsta degi var enn ekki hægt að greina ljósgjafana. Á fjórða sköpunardeginum létti til í andrúmslofti jarðarinnar. Biblían segir að sól, tungl og stjörnur hafi farið að „bera jörðinni birtu“, sem greinilega lýsir því hvernig það hefði litið út frá sjónarhóli einhvers á jörðinni. – 1. Mósebók 1:17.

 Biblían segir ekkert um aldur jarðarinnar. Fyrsta Mósebók 1:1 segir einfaldlega að alheimurinn og þar með talin jörðin eigi sér upphaf. Þessi fullyrðing stangast hvorki á við vísindalegar staðreyndir né ályktanir vísindamanna um aldur jarðar.